Lokombo laki Nzambi tanemaka mbala suke la 7 000 lo Afundelo wa lo Hɛbɛru l’alɛta 4 w’ekuku יהוה, wa lo Hɛbɛru. Lo ekadimwelo kɛnɛ, alɛta 4 asɔ weyama oko Tetragramɛ wakakadimɔma ɔnɛ “Jehowa.” Lokombo lɔsɔ mbaleka tanema mbala efula lo Bible. Kaanga mbakamba afundji wa Bible la titrɛ efula ndo nkombo ya lɔtɛtɛmɔla lo dikambo dia Nzambi, ɛnyɛlɔ oko “Kanga-Wolo-Tshɛ,” “Ɔnɛ-Laheme-Tshɛ,” ndo “Nkumadiɔndjɔ,” Tetragramɛ mbele tshɔi ya lokombo l’oshika lakakambe la wɔ dia ntɛkɛta dikambo dia Nzambi.

Jehowa Nzambi ndamɛ mbakalɔmbɔla afundji wa Bible dia vɔ nkamba la lokombo lande. Ɛnyɛlɔ, nde akasambiya omvutshi Jɔɛlɛ dia mfunda ɔnɛ: “Onto tshɛ lelɛ lokombo la Jehowa ayoshimbamɛ.” (Jɔɛlɛ 2:32) Ndo Nzambi akakonya omembi w’esambo ɔmɔtshi dia mfunda ɔnɛ: “Anto weye dia wɛ, lele lokombo layɛ Jehowa, wɛmɛ kele Ɔnɛ-Laheme-Tshɛ lo nkɛtɛ k’otondo.” (Osambo 83:18) Lo mɛtɛ, lokombo laki Nzambi tanemaka mbala suke la 700 lo dibuku dia Esambo to, dibuku diakafundama la ɛtɛkɛta wa lɔlɛnga wakahombe membamaka ndo mbutamaka oma le ekambi waki Nzambi. Ko lande na kahatanema lokombo laki Nzambi lo dikadimwelo efula dia Bible? Lande na kakamba ekadimwelo kɛnɛ la lokombo “Jehowa”? Ndo lokombo laki Nzambi Jehowa alembetshiyalɔ?

Lande na kahatanema lokombo laki Nzambi lo dikadimwelo efula dia Bible? Ekɔ l’ɔtɛ w’ɛkɔkɔ efula. Anto amɔtshi fɔnyaka dia Nzambi Kanga-Wolo-Tshɛ bu l’ohomba wa tshɔi ya lokombo di’anto mbeeya. Akina wakasɛngiyama la mbekelo k’ase Juda ka mbewɔ dia nkamba la lokombo lɔsɔ, ondo la wɔma waha vɔ ndjolisha nsɔnyi. Akina nto mbutaka dia lam’ele ndooko onto lakoka mbeya l’eshikikelo tshɛ woho wakatɛkɛtamaka lokombo laki Nzambi, laasɔ, ndeka dimɛna nkamba la titrɛ kele oko “Nkumadiɔndjɔ” kana “Nzambi.” Koko kaanga mbatawɔ ngasɔ, vɔ bu la shadiya l’ɔtɛ wa ɛkɔkɔ ɛnɛ:

• Wanɛ wata dia Nzambi Kanga-Wolo-Tshɛ bu l’ohomba wa tshɔi ya lokombo mbohɛka tolembetelo tɛnya dia efundelo wa ntondotondo  wa Ɔtɛkɛta ande, mbidja ndo wanɛ wakalamema la ntondo ka nshi ya Kristo, wekɔ la lokombo l’oshika laki Nzambi. Oko wakataditshi la diko, Nzambi akalɔngɔsɔla dia lokombo lande tanema lo Ɔtɛkɛta ande mbala suke la 7000. Mbokɛmaka hwe dia nde nangaka sho mbeya ndo nkamba la lokombo lande.

• Akadimudi wanɛ wakanya lokombo lɔsɔ l’ɔtɛ wa mbekelo k’ase Juda wakohɛ dui dimɔtshi di’ohomba efula. Kaanga mbakatone afundji amɔtshi w’ase Juda dia mbuta lokombo lɔsɔ, vɔ kolinya oma lo Bible yawɔ. Wɛɔmbɔ w’edjedja wakashɔma la Qoumrân, suke la Ndjale Kambovɔ, waki la lokombo laki Nzambi lo ahole efula. Akadimudi amɔtshi wa Bible mbutaka dia lokombo laki Nzambi latanema lo efundelo wa ntondotondo, mbokɛmaka hwe lam’ahɛnyamalɔ la titrɛ “NKUMADIƆNDJƆ” lo alɛta wa weke. Ko dimbola diatetemala mimbɔma diɔ nɛ: Akɔna akasha akadimudi lotshungɔ la mpɛnya lokombo laki Nzambi la nkombo nkina kana linya oma lo Bible etena kasuyawɔ dia lɔ tanemaka lo Bible mbala nunu? Akɔna akawasha lotshungɔ la nsala etshikitanu ɛsɔ? Paka vɔ mbakoka totɛ.

• Wanɛ wata dia hatohombe nkamba la lokombo laki Nzambi lam’ele hateye shikaa woho wakawalielɛka wekɔ lo ntetemala nkamba la lokombo Yeso aha l’okakatanu. Koko ambeki waki Yeso wa lo ntambe ka ntondo wakelɛka lokombo lande lo yoho yotshikitanyi yema la woho walielɛ Akristo efula ɛlɔ kɛnɛ. Akristo w’ase Juda wakelɛka lokombo Yeso ondo ɔnɛ Ye·shuʹa‛. Ndo titrɛ “Kristo” aki ɔnɛ Ma·shiʹach, kana “Mɛsiya.” Akristo wakatɛkɛtaka Grɛkɛ wakawelɛka ɔnɛ I·e·sousʹ Khri·stosʹ, ndo Akristo wakatɛkɛtaka Latino wakawelɛka ɔnɛ Ieʹsus Chriʹstus. Lo ɛlɔmbwɛlɔ ka nyuma, ekadimwelo ka lo Grɛkɛ ka lokombo laki Nzambi akafundama lo Bible dia mɛnya di’Akristo wa lo ntambe ka ntondo wakayele mbekelo kaki l’anto ka nkamba la yoho yakalekaka mbeyama lokombo lakɔ lo ɔtɛkɛta awɔ. Woho akɔ waamɛ mbele, Kɔmite k’Okadimwelo wa Bible k’andja w’oyoyo akɛnyi dia ekɔ dimɛna nkamba la lokombo “Jehowa,” kaanga mbele aha yoho shɔ mɛtɛ mɛtɛ mbakelamɛka lokombo laki Nzambi lo Hɛbɛru k’edjedja.

Lande na kakamba Ekadimwelo k’andja w’oyoyo la “Jehowa”? Lo Ɔtɛtɛla, alɛta 4 wa lo Tetragramɛ (יהוה) kadimɔmaka lo alɛta w’ekuku anɛ YHWH. Oko wakidiɔ lo dikambo dia tɔtɛkɛta tshɛ ta lofunda ta lo Hɛbɛru k’edjedja, Tetragramɛ komonga l’alɛta wa londjo. Etena kakawakambaka la Hɛbɛru k’edjedja lushi la lushi, ambadi vɔamɛ wakadjaka alɛta wa londjo wasungana.

Ɛnɔnyi oko kinunu l’ɔkɔngɔ w’Afundelo wa lo Hɛbɛru nshila fundama, nomb’ewo y’awui wa lo Bible y’ase Juda wakayotondja ɛlɛmbɛ wendana la woho wa ntɛkɛta kana tolembetelo takɛnyaka alɛta wa londjo wahomba kambema etena kadiema Hɛbɛru. Koko l’etena kɛsɔ, ase Juda efula wakafɔnyaka lo yoho ya kɔlɔ dia keema dimɛna nimola lokombo laki Nzambi la dui dia wolo, diɔ diakɔ diakawalihɛnya la tɔtɛkɛta tokina. Laasɔ mɛnamaka dia lam’akawasangola Tetragramɛ, vɔ wakasanganyaka la alɛta wa londjo lo nkombo yakawahɛnyaka alɛta 4 w’ekuku wafundama lokombo laki Nzambi. Oma lɔkɔ, efundelo wa  l’anya wɛnya alɛta wa londjo wasungana kotshama ɛsɔ hawokimanyiya dia shikikɛ woho wakelamɛka lokombo laki Nzambi ntondo lo Hɛbɛru. Anto amɔtshi fɔnyaka dia lokombo lakɔ lakelamɛka ɔnɛ “Yahweh,” etena kele akina mbutaka toho tokina. Wɔɔmbɔ ɔmɔtshi w’oma lo Ndjale Kambovɔ wele la etenyi ka dibuku dia Akambo w’ase Lɛwi lo Grɛkɛ wakakadimola lokombo laki Nzambi ɔnɛ Iao. Laadiko wa yoho shɔ, afundji wa Grɛkɛ wa ntondotondo wakalangaka mbeelɛ ɔnɛ Iae, I·a·beʹ, ndo I·a·ou·eʹ. Koko ndooko ɔkɔkɔ wɛnya dia pombaka ntshininala lo kanyi mɔtshi. Sho hateye woho wakatɛkɛtaka ekambi waki Nzambi wa lo nshi y’edjedja lokombo lakɔ lo Hɛbɛru. (Etatelo 13:4; Etombelo 3:15) Kɛnɛ keyaso ele Nzambi akakambaka la lokombo lande mbala la mbala etena kakandasawolaka l’ekambi ande, vɔ wakawelɛka lo lokombo lande, ndo wakakambaka la lɔ etena kakawasawolaka l’anto akina.—Etombelo 6:2; 1 Nkumi ya dikanga 8:23; Osambo 99:9.

Ko lande na kele ekadimwelo kɛnɛ kambaka la “Jehowa”? Nɛ dia yoho yelamɛ lokombo laki Nzambi shɔ yambokambema edja lo Ɔtɛtɛla.

Mbala ka ntondo kakatanema lokombo laki Nzambi l’oshika lo Bible ka l’Ɔtɛtɛla aki lo 1946 lo ekadimwelo ka Bible ka Dikelemba di’Oyuyu k’aseka Mupɛ kakakadimola Hagendorens. Nde akakambe la lokombo “Yehowa (Nsambi)” lo lɛkɛ la Diɔmbɔɛlɔ di’akambo amɔtshi. Lam’ele ɔtɛkɛta w’Ɔtɛtɛla wakatatshikitanaka ndo ofundelo wa lokombo laki Nzambi wakayɔtɔnganyiyama la yoho yɔtɛkɛta anto nshi nyɛ. Ɛnyɛlɔ lo 1953, ase Asɔnyi wakayokamba la lokombo “Jehowa-Jire” lo Bible k’Ekila lo Etatelo 22:14. Lo Embadi 6:24 “Jehowa-shaloma” ndo “Jehowa” lo “Vocabulaire y’aui amotshi wa lu Bible.” Laadiko dia laasɔ, lo Dibuku di’esambo di’ase Asɔnyi, diakatombe lo 1979, lo osambo 2 ndo 13 wakakambe la lokombo “Jehowa.” L’edja ka ntambe efula, ɛtɛkɛta ekina wakakambe la toho takɔ taamɛ ta lokombo la Nzambi. Ɛnyɛlɔ, mbala ka ntondo kakatanema lokombo la Nzambi l’oshika lo Bible ka l’Angɛlɛ aki lo 1530 lo ekadimwelo kaki William Tyndale ka Pantatɛkɛ. Nde akakambe la “Iehouah.”

L’edjedja ka wonya, ɔtɛkɛta w’Angɛlɛ wakatatshikitanaka ndo ofundelo wa lokombo laki Nzambi wakayɔtɔnganyiyama la yoho yɔtɛkɛta  anto. Ɛnyɛlɔ, lo 1612, yɔnɛ Henry Ainsworth akakambe la “Iehovah” lo ekadimwelo kande k’otondo ka dibuku dia Esambo. Oma laasɔ, lo 1639, lam’akayovusɔmaka ekadimwelo kɛsɔ ndo kakatayotondjama kaamɛ la Pantatɛkɛ, wakayokambaka la lokombo “Jehowa.” Lo 1901, wanɛ wakakadimola ekadimwelo ka Bible ka American Standard Version wakakambe la “Jehowa” lo ahole wakatanemaka lokombo laki Nzambi lo efundelo wa lo Hɛbɛru.

Lo nembetshiya lande na kakandakambe la “Jehowa” lo dihole dia “Yahweh” lo dibuku Wekelo lo Esambo (lo Angɛlɛ) diakandatondja lo 1911, Joseph Bryant Rotherham, nomb’ewo k’awui wa lo Bible kalɛmiyama akate dia nde akalange nkamba la “yoho yaleka mbeyama lokombo lakɔ (yoho yetawɔma tshɛ lo tshɛ) le ambadi wa Bible lo tshɛ kawɔ.” Lo 1930, nomb’ewo A. F. Kirkpatrick akate woho akɔ waamɛ lo kɛnɛ kendana la okambelo wa la “Jehowa.” Nde akate ate: “Ambeyi wa gramatika wa nshi nyɛ mbutaka dia ndeka dimɛna nkamba la Yahveh kana Yahaveh; koko mɛnamaka dia JEHOWA mbamboleka anto mbekɛ ndo kɛnɛ kele mɛtɛ ohomba ele anto mbeya dia ɔsɔ ekɔ Lokombo l’Oshika, aha tsho titrɛ kele oko ‘Nkumadiɔndjɔ,’ koko aha yoho shikaa yadiemalɔ.”

Naa kitshimudi ya lokombo Jehowa? Lo Hɛbɛru, lokombo Jehowa ndja oma lo vɛrbɛ yalembetshiya “ndjaala,” ndo waa nomb’ewo efula mbutaka dia lɔ kɛnɛmɔlaka woho woyelɔ oma lo vɛrbɛ ya lo Hɛbɛru shɔ. Ɔnkɔnɛ, eokelo ka Kɔmite k’Okadimwelo wa Bible k’andja w’oyoyo ele ɔnɛ lokombo laki Nzambi nembetshiyaka “Nde salaka dia ndjaala.” Waa nomb’ewo wekɔ la tokanyi totshikitanyi, ɔnkɔnɛ, hatokoke ntshininala lo yoho mɔtshi lo kɛnɛ kendana la kitshimudi shɔ. Koko elembetshielo ɛsɔ mbɔtɔnɛka la dihole diele la Jehowa oko wende Otungi wa diangɔ tshɛ ndo Ɔnɛ lakotsha sangwelo diande. Nde kosala tsho dia andja wɛnama ndo ditongami diele la yimba monga, koko etena kalɔmbamadiɔ, nde tetemalaka nsala dia lolango ndo sangwelo diande kotshama.

Ɔnkɔnɛ, kitshimudi ya lokombo Jehowa hakomɛ tsho lo vɛrbɛ yɔtɔnɛ lalɔ yatanema lo Etombelo 3:14, lɛnɛ adiaso ɔnɛ: “Dimi layoyala kɛnɛ kayomɔsɔna dia ndjaala” kana “Dimi layoyala kɛnɛ kayomolanga dia ndjaala.” Lo yoho ya mɛtɛ ɛtɛkɛta ɛsɔ hawolembetshiya tshɛ lo tshɛ lokombo laki Nzambi. Koko, vɔ kɛnɛmɔlaka yoho mɔtshi ya lonto laki Nzambi, lo mɛnya dia nde ndjaalaka kɛnɛ kahombama lo diaaso tshɛ dia nkotsha sangwelo diande. Kaanga mbele lokombo Jehowa mbeyaka monga la kanyi shɔ, yɔ hayokomɛ tsho lo kɛnɛ kasɔnande ndamɛ dia ndjaala. Yɔ mendanaka nto la kɛnɛ kasalande dia ndjaala lo kɛnɛ kendana la etongelo kande ndo ekotshamelo ka sangwelo diande.