Tɛkɛta amboleka: Tɔfɔnyake dia wɛ pombaka nembetshiya ompokami ayɛ oseka dui tshɛ. Yeso akakambaka la ambola dia nkimanyiya anto dia vɔ nkana lomba ndo ntana lokanyi l’oshika. (Mat 17:24-27) Ambola mbetɛka wekelo dimɛna ndo kokimanyiyaka dia mbeya kana ompokami ayɛ ekɔ lo nshihodia ndo ekɔ lo mbetawɔ kɛnɛ kawetshayɛ. (be 253 od. 3-4) Etena kokayɛ dimbola, onga la solo dia lotutsha ndo nkonga okadimwelo. Naka ombeki ambosha okadimwelo wa kɔlɔ, lo dihole dia mbotɛ okadimwelo wa dimɛna, kimanyiyande dia nde mbisha okadimwelo wa dimɛna lo nkamba la tombolambola tokina. (be 238 od. 1-2) Tɛkɛta lo yoho yayokimanyiya ombeki dia nde nshihodia lokanyi l’oyoyo.—be 230 od. 4.

Mbetɛ wekelo wolo: Ewɔ mbuta awui tshɛ weyayɛ wa lo sawo diasɛdingolanyu. (Jni 16:12) Tɛkɛta akambo paka wa l’odingɔ wenyu. (be 226 od. 4-5) Mbuta ndo towuiwui ta totshitshɛ tshɛ, koka mbekola yimba oma l’awui wele ohomba. (be 235 od. 3) Kam’ashihodia ombeki kɛnɛ kele ohomba, ko nyu nsɛkɔ otsha l’odingɔ wayela.

Tshɔ lowango lowango: Oyango aso ekɔ wa minanda etema koko aha wa ntshɔ lowango lowango. (Luk 24:32) Tokambe la wolo wele la Ɔtɛkɛta wa Nzambi lo ndeka nkamba l’avɛsa woleki ohomba lo wekelo akɔ. (2Kɔ 10:4; Hɛb 4:12; be 144 od. 1-3) Tokambe la bɛnyɛlɔ dia wɔdu. (be 245 od. 2-4) Teye ekakatanu ndo dietawɔ diaki ombeki ndo tɔɔtɔnganyiya wetshelo otsha le nde. Towombole ambola wele oko wanɛ: “Ngande wayaokayɛ lo dikambo dia kɛnɛ kamboteka kɛsɔ?” “Kakɔna katetsha dui nɛ lo dikambo dia Jehowa?” “Wahɔ akɔna wayoyokondja naka wɛ nkamba la dako nɛ?”—be 238 od. 3-5; 259 od.