Naka ɔna mambodihola lokuke, sho pombaka mbotɛ dia tekɔ lo nanga nsawola l’ambutshi ande. Dui sɔ ayɛnya dia tekɔ lo nɛmiya lowandji lele l’ambutshi. (Tu 6:20) Naka ɔna ambotɔlɔmba dia sho mbɔtɔ, sho pombaka ntona la loshilambo tshɛ. Naka ambutshi ande bu laawɔ, kete sho pombaka ndjoya mbala kekina.

Kaanga naka ɔnakɔ aya mangase, ɛnyɛlɔ aya suke la nkotsha ɛnɔnyi akumi ahende, ekɔ paka ohomba mimbola ambutshi ande. Naka ambutshi bu laawɔ, sho koka mombola kana ambutshi ande wakawosha lotshungɔ la nde nongola ekanda wa mbadia. Naka ekɔ ngasɔ, kete sho kokaka mbosha periodikɛ ndo kaanga mbɛnya woho wa mbɔtɔ lo jw.org.

Etena kasalaso wendelo w’oyoyo le ɔna lakɛnya nsaki, sho pombaka mbotɛ dia tekɔ lo nanga mɛnana l’ambutshi ande. Dui sɔ ayotokimanyiya dia mbatɛ oyango aso lo mbaɛnya alako w’ohomba ndo wa mbɛkɛ otema washa Bible waa nkumbo. (Osa 119:86, 138) Dilɛmiɛlɔ ndo nɛmɔ diayotosha ambutshi ayonga tshondo y’esambishelo ka dimɛna ndo mbeyaka tosha waaso akina w’amɛna wa nsambisha nkumbo kakɔ lokumu l’ɔlɔlɔ.—1Pe 2:12.