Lo Ngɔndɔ ka sato 23, anto oko miliyɔ 12 ndo angɛndangɛnda efula wayoya lo Eohwelo ka nyɔi ka Yeso. Sawo diayosha ɔtɛkɛtshi diendana la woshasha wa Jehowa w’oshinga w’etshungwelo ndo l’ɛtshɔkɔ ɛmɔtshi wayokondja anto lo nshi yayaye diayonga mɛtɛ esambishelo ka woke le wɔ! (Is 11:6-9; 35:5, 6; 65:21-23; Jni 3:16) Koko, aha paka ɔtɛkɛtshi ndaamɛ oto mbayosambisha anto lo diaaso sɔ dia laande. Sho tshɛ tayokoka mbisha lonya lo nongola la wangasanu tshɛ angɛndangɛnda wayoya. (Rɔm 15:7) Alako amɔtshi wa ndjela vɔ anɛ.

• Lo dihole dia wɛ ntshɔ todjasɛ ki tsho lo dihole diayɛ ko kongaka etatelo k’ekongelo, sala la wolo dia nongola angɛndangɛnda ndo anangɛso l’akadiyɛso wambɔla lo nyuma la wangasanu tshɛ ndo shawɔ mɔyɔ wa la lɔngɛnyi tshɛ

• Kaanga mbahombayɛ ndjasha lo yoho ya laande le wanɛ wakayelɛ, dja ndo anto akina wakaye l’ɔtɛ wakawalongola akatshi wa leeta yimba. Wɛ kokaka mambola kana ɔsɔ mbele mbala kawɔ ka ntondo ka vɔ mbɔtɔ lo nsanganya yaso. Lɔmba eyoyo dia vɔ mbidjasɛ suke la yɛ l’oyango wa tayelaka lawɔ wadielo wa Bible ndo wembelo w’esambo lo dibuku diayɛ

• L’ɔkɔngɔ wa sawo di’Eohwelo, onga suke dia nkadimola lo ambola w’anto. Naka etshumanelo kanyu pombaka ntomba esadi esadi dia tshikɛ etshumanelo kekina dihole, kete aha la ntshimbatshimba yalɔngɔsɔla dia tembola onto akɔ l’ɔkɔngɔ wa nshi ngana tsho. Naka wɛ bu l’adrɛsɛ ande, wɛ koka mbotɛ ɔnɛ: “Layokombola mbeya kana wɛ ekɔ la dui dimɔtshi dia mbuta l’ɔkɔngɔ wa wɛ mpokamɛ sawo di’ɛlɔ. Ngande wakokaso mɛnana nto?”