Oko wadiɛnya ta dialɔma l’Ukraine, ewandji w’ɛtɛmwɛlɔ wekɔ lo nkeketsha anto dia ndjatambiya l’ata. Tende woho wasukɛ ewandji w’ɛtɛmwɛlɔ wedi ehende walɔshana:

•   “Lotombo le nyu ndo tekɔ la lowando le nyu andɔshi aso tshɛ wakokɛ wodja awɔ Ukraine oma le wanɛ wambotɔlɔsha . . . Tekɔ lo nyosukɛ ndo tekɔ lo nɔmba l’otema ɔtɔi dikambo dianyu.”​—Metropolitan Epiphanius I of Kyiv, akashama lo jurnalɛ The Jerusalem Post, Ngɔndɔ ka sato 16, 2022.

•   “Owandji w’ɔtɛmwɛlɔ w’Ɔrtɔdɔksɛ wa la Russie akafuke misa dikambo di’asɔlayi Lushi la lomingu ndo akaakeketsha dia ndwɛlɛ wodja awɔ ‘oko wakoka ose Russie tshɛ nsala’ etena kɛnɛ katetemala Moscou ndɔsha wodja w’Ukraine.”​—Reuters, Ngɔndɔ ka nɛi 3, 2022.

 Onde Akristo pombaka ndjatambiya l’ata? Kakɔna kata Bible lo dikambo sɔ?

 Bible mɛnyaka dia ambeki wa mɛtɛ wa Yeso Kristo hawoyatambiya l’ata.

•   “Kaloya lokuwa layɛ lo dihole dialɔ, nɛ dia wanɛ tshɛ wɛmbɛ anto akina tokuwa wayodiakema la tokuwa.”​—Mateo 26:52.

   Onde onto lasukɛ kana layatambiya l’ata ekɔ lo nkitanyiya ɛtɛkɛta wa Yeso ɛsɔ?

•   “Dimi lambonyosha ɔlɛmbɛ w’oyoyo dia nyu mbokana ngandji. Nyokane ngandji lam’asanyu oko wakamanyoke ngandji. Oma lo dikambo nɛ, anto tshɛ wayeya dia nyu nyekɔ ambeki ami, naka nyayokana ngandji lam’asanyu.”​—Joani 13:34, 35.

   Onde onto lasukɛ ata ekɔ lo kɛnɛmɔla ngandji kakate Yeso dia diɛsɛ latɔ mbayeyama ambeki ande?

 Dia nyomeya awui akina, adia sawo diele l’ɔtɛ a dui ɔnɛ: “Peut-on concilier guerre et christianisme?”

 Onde ekɔ dimɛna di’aha Akristo ndjatambiya l’ata walɔma nshi nyɛ? Eelo. Bible kakatatshi dia nshi nyɛ yelamɛ “nshi y’ekomelo,” anto amɔtshi wayoya oma le wedja tshɛ, ndo vɔ “hawoteka ta nto,” lo ndjela kɛnɛ kaketsha Yeso.​—Isaya 2:2, 4, nɔtɛ.

•   Dia nyomeya awui akina, adia asawo wa lo Tshoto y’Etangelo wata ɔnɛ: “Ngande wɔsa Nzambi awui w’ata?”

 Ndooko edja, a “Nzambi ka wɔladi” ayanga nkamba la lowandji lande la l’olongo dia ntshungola anto “oma lo dihɛnyɔki ndo oma l’awui wa ngala.”​—Filipɛ 4:9; Osambo 72:14.

•   Dia mɛna woho wayosalema dui sɔ, enda vidɛo: Diolelo diaki Nzambi kɛdikɛdi na?