Awui wa ngala w’ase pɔlitikɛ wekɔ lo salema efula l’andja w’otondo.

•   Lo wodja wa Mexique, odiakelo wa waa kandida y’ase pɔlitikɛ 39, lofulo lahatongaka ndooko lushi ndo weho ekina w’awui wa ngala w’ase pɔlitikɛ akakiyanya anto efula ndo akaakonya dia minya yimba lo vɔtɛ yakasalema lo 2023-2024.

•   Atete edja l’Erɔpɛ, awui wa ngala efula w’ase pɔlitikɛ wakasalema, mbidja ndo woho wakawayange ndjaka prɛmie ministrɛ ka la Slovaquie lo Ngɔndɔ ka tanu 15, 2024.

•   Ase États-Unis wekɔ la kandji efula lo woho woyangi onto ɔmɔtshi ndjaka prezida k’edjedja, Donald Trump lo Ngɔndɔ k’esambele 13, 2024.

 Lande na kele awui wa ngala w’ase pɔlitikɛ efula? Onde awui asɔ wayokomɛ? Kakɔna kata Bible lo dikambo sɔ?

 Bible kakatatshi dia lo nshi yaso nyɛ yelamɛ ɔnɛ: “Nshi y’ekomelo,” anto efula wayosala awui wa ngala ndo hawotokana.

•   “Lo nshi y’ekomelo, tena dia paa dia wolo mbikikɛ diayoyala. Nɛ dia anto . . . wayonga. . . akanga wa lɔhɛndɛ, waha la kɔlamelo, . . .wahalange mbokana, . . . akanga w’ekonda, . . . afungi, akanga w’ɛtɛ wolo, akanga wa ndjadiya.”—2 Timɔte 3:1-4.

 Bible kakatatshi nto di’anto wayɔtɔmbɔkwɛ ewandji wa lɛɛta ndo efukutanu efula w’awui wa pɔlitikɛ wayosalema nshi nyɛ. (Luka 21:9, nɔtɛ) Lo mɛtɛ, awui wa ngala w’ase pɔlitikɛ ndo diatɔnelo diayokomɛ.

 Bible mbutaka dia Nzambi ayɔhɛnya mandji tshɛ y’ana w’anto la lowandji lande la l’olongo.

•   “Nzambi ka l’olongo ayotondja Diolelo . . . diayominola waolelo [akina] tshɛ ndo diayowashila oshiki, ko diɔ diɔamɛ diayotshikala pondjo.”—Danyɛlɛ 2:44.

 Diolelo dia Nzambi diayosala di’anto monga mɛtɛ kaamɛ ndo diayodja wɔladi l’andja w’otondo.

•   Owandji adiɔ, mbuta ate Yeso Kristo, mbelamɛka ɔnɛ “Owandji wa ki,” ndo nde ayoyashikikɛ dia ‘wɔladi monga aha ekomelo.’—Isaya 9:6, 7.

•   Kaanga ɛlɔ kɛnɛ, wanɛ walɔmbɔma oma lo Diolelo sɔ wekɔ lo mbetshama woho wa nsɛna lo wɔladi. Bible mɛnyaka etombelo wayonga la dui sɔ lo mbuta ɔnɛ: “Vɔ wayotshula tokuwa tawɔ ta ta nkongondo akɔnga awɔ tɔshɔlɔ takɔlɔngawɔ adiyo. Wodja ɔmɔtshi hawotɛmbɛ wodja okina lokuwa la ta, ndo vɔ hawoteka ta nto.”—Isaya 2:3, 4.

 Dia nyomeya awui akina, adia sawo diele l’ɔtɛ a dui ɔnɛ: Que fera le royaume de Dieu ?” ndo enda vidɛo yele l’ɔtɛ a dui ɔnɛ: Diolelo diaki Nzambi kɛdikɛdi na?