TETEMALA NSUNGUKALA!
Kakɔna kata Bible lo dikambo di’ɔtɛmwɛlɔ w’esato?
Lo ndjela jurnalɛ yelɛwɔ Catholic News Service, lo sɛlɛmɔnyi kɛmɔtshi kakasalema lo Basilique Saint-Pierre lo Ngɔndɔ ka sato 25, 2022, Papa l’Ɔrɔma François akemala la ntondo ka lohingu la Mariya, “odihi washo ndo ɔkɔlɛ ɔtɛ asala dɔmbɛlɔ dia l’etei k’otema.” Nde “akasɛngasɛngaka Mariya” lo dikambo dia wɔladi. Ndo jurnalɛ yelɛwɔ Vatican News yakakotsha ɔnɛ: “Papa l’Ɔrɔma akalɔmbaka Mariya lele l’otema waha kaanga la vadi tshɔi ya pɛkato dia nde ntshɔkɔla andja w’otondo, djekoleko wodja wa Russie ndo w’Ukraine.”
Oko le yɛ, onde ekɔ dimɛna nɔmba la ntondo ka lohingu kana k’osato ndo nkamba la wɔ l’ɔtɛmwɛlɔ? Tɔsɛdingole avɛsa wayela anɛ:
“Toyasalɛke ekishi kana efanelo ka ɛngɔ kɛmɔtshi kele l’olongo la diko kana kele la nkɛtɛ l’ɛse kana kele lo ashi l’ɛse ka nkɛtɛ. Todikusamɛke ndo todikambɛke, nɛ dia dimi Jehowa Nzambi kayɛ lekɔ Nzambi kalɔmba dia mamemami paka dimɛ oto.”—Etombelo 20:4, 5. a
“Dikishi diawɔ diekɔ mfɛsa la paonyi, olimu w’anya w’anto. Diɔ diekɔ la onyɔ, koko hadiokoke ntɛkɛta; la washo, koko hadiokoke mɛna; diɔ diekɔ la atoyi, koko hadiokoke mboka; la ɔhɛmbɛ, koko hadiokoke mboka nsolo; diɔ diekɔ la anya, koko hadiokoke nkimɛ ɛngɔ; la ekolo, koko hadiokoke nkɛndakɛnda; diɔ hadiotondja ndooko dui oma lo wodi adiɔ. Anto wadisala wayokoma oko diɔ, ngasɔ mbayonga ndo wanɛ tshɛ wayaɛkɛ le diɔ.”—Osambo 115:4-8.
“Dimi kele Jehowa. Ɔsɔ kele lokombo lami; Dimi halasha ndooko onto lotombo lami, kana mbisha lotombo lami le dikishi.”—Isaya 42:8, nɔtɛ.
“Nyolowɔ ɔtɛmwɛlɔ wa dikishi.”—1 Kɔrɛtɔ 10:14.
“Ana wa tshitshɛ, nyewɔ dikishi.”—1 Joani 5:21.
Dia mbeya awui akina wendana la kɛnɛ kata Bible lo dikambo di’okambelo wa la dikishi kana esato l’ɔtɛmwɛlɔ, adia sawo diele l’ɔtɛ a dui ɔnɛ: “Kanyi ya Bible—Lo dikambo di’esato” kana enda vidɛo yele l’ɔtɛ a dui ɔnɛ: Onde Nzambi mbetawɔka okambelo wa l’esato l’ɔtɛmwɛlɔ?
Wɛ mbeyaka nto ngɛnangɛna kɛnɛ kata Bible lo kɛnɛ kendana l’awui anɛ:
“Kakɔna kata Bible lo dikambo dia Mariya w’emuma?” lo Falase.
“Onde sho pombaka nɔmbaka Mariya w’emuma?” lo Falase.
“Ahindo ndo waɛnɛlɔ, onde vɔ ndja oma le Nzambi?” lo Falase.
“Ngande wayodjama wɔladi l’andja ɔnɛ?” lo Falase.
Photo credit: Vincenzo Pinto/AFP via Getty Images
a Jehowa mbele lokombo l’oshika laki Nzambi. (Osambo 83:18) Enda sawo diele l’ɔtɛ a dui ɔnɛ: “Ele Jehowa?”
Enda ndo lo...
AKAMBO AKINA
Onde ɔtɛmwɛlɔ pombaka ndjatambiya l’awui wa pɔlitikɛ?
L’andja w’otondo, anto efula wasɛma dia vɔ wekɔ lo tayele Yeso Kristo ndjatambiyaka tshavu l’awui wa pɔlitikɛ. Onde vɔ pombaka nsala dui sɔ?
NYOTETEMALE NSUNGUKALA!
Kakɔna kata Bible lo dikambo di’Ɔtɛmwɛlɔ ndo dia ta dia l’Ukraine?
Ɛnɔmbɔdi w’ɛtɛmwɛlɔ w’ase Russie ndo w’ase Ukraine, wedja ehende walɔshana, wekɔ lo nkamba la shɛngiya yawɔ lo yoho yotshikitanyi tshɛ lo tshɛ la kɛnɛ kaketsha Yeso ambeki ande dia nsala ndo diaha vɔ nsala.
