Kondja wahɔ oma l’olambo wa Yeso
Mbala ɔtɔi l’ɔnɔnyi, Ɛmɛnyi wa Jehowa la miliyɔ y’anto welɛwɔ l’andja w’otondo sanganaka dia nsala eohwelo ka nyɔi ka Yeso oko wakandadjanga. (Luka 22:19) Dui sɔ tokimanyiyaka dia mɛnya lowando laso ndo nshihodia ohomba wa kɛnɛ kakasale Yeso etena kakandakimɔ lɔsɛnɔ lande lo dikambo di’ana w’anto. Ndo to, dui sɔ mɛnyaka shɛngiya yakoka monga l’olambo ande lo nsɛnɔ yaso ɛlɔ kɛnɛ ndo lo nshi yayaye.—Joani 3:16.
Oyadi wɛ ayɔtɔ lo Eohwelo ɔnɔnyi ɔnɛ kana bu, ngande wakokayɛ nkondja wahɔ oma nyɔi k’olambo wa Yeso? Yeso aketsha dia sho pombaka nsala awui ahende w’ohomba anɛ:
1. Eka awui wendana la Nzambi ndo la Yeso. Yeso akalɔmbɛ she lele l’olongo ate: “Dia vɔ nkondja lɔsɛnɔ la pondjo, weke dia keya wɛ Nzambi ɔtɔi ka mɛtɛ, la Yeso Kristo lakayatome.”—Joani 17:3.
2. Kamba la kɛnɛ kekayɛ. Yeso akatɛtɛ dia sho pombaka nkamba la wetshelo ande lo lɔsɛnɔ laso. Ɛnyɛlɔ, nde akakomiya Dako diande dia lo dikona lo mandola onto tshɛ ‘loka ɛtɛkɛta ande ndo lawakitanyiya.’ (Luka 6:46-48) Woho akɔ wamɛ mbele, lo diaso dikina nde akate ate: “Naka nyu mbeyaka akambo asɔ, ɔngɛnɔngɛnɔ le nyu naka nyayowasala.”—Joani 13:17.
Onde wɛ nangaka mbeya akambo efula wendana la Jehowa nde la Yeso? Onde wɛ nangaka nkondja alako w’ohomba wakoka kokimanyiya dia nkamba la kɛnɛ kekayɛ? Toho tɔmɔtshi takoka kokimanyiya tɔ tɔnɛ:
Wekelo wa Bible
Wekelo aso wa Bible w’ofele wakakimanya anto efula dia nsɛdingola Bible ndo nkamba la kɛnɛ ketshatɔ lo nsɛnɔ yawɔ.
Ɔtɔ lam’ofundjiwɔ ɔnɛ: Cours biblique dia mbeya awui efula wendana l’ekongelo kɛsɔ.
Enda vidɛo yele l’ɔtɛ a dui ɔnɛ: Yaayo lo wekelo ayɛ wa Bible dia mɛna woho wasalema wekelo wa Bible l’ɛmɛnyi wa Jehowa.
Nsanganya y’Ɛmɛnyi wa Jehowa
Ɛmɛnyi wa Jehowa sanganaka kaamɛ mbala hiende lo lominigu l’ahole w’ɔtɛmwɛlɔ welɔwɔ Mbalasa ka Diolelo. Lo nsanganya shɔ, sho sɛdingolaka Bible ndo woho wakokaso nkamba la wetshelo atɔ lo sɛnɔ yaso.
Onto tshɛ kokaka mbɔtɔ lo nsanganya shɔ. Aha paka wɛ mbongi Ɔmɛnyi wa Jehowa ko wɛ mbɔtɔ lo nsanganya yakɔ. Lo ndjelana l’awui wa lɛnɛ odjashiyɛ, wɛ koka mbɔtɔ nsanganya shɔ okoko l’okoko kana lo vidɛo kɔfɛransɛ.
Enda vidɛo yele l’ɔtɛ a dui ɔnɛ: Kakɔna kasalema lo Mbalasa ka Diolelo? dia mɛna lo tshena pe kɛnɛ kakokayɛ nongamɛ lo nsanganya shɔ.
Dia ntana dihole diasalema nsanganya suke layɛ, ɔtɔ lam’ofundiwɔ ɔnɛ: Nsanganya ya l’etshumanelo y’Ɛmɛnyi wa Jehowa.
Asawa ndo tovidɛo
Asawo ndo tovidɛo efula tele lo sitɛ kaso koka kokimanyiya dia mbeya awui efula wendana la wetshelo wa Yeso ndo ohomba wa nyɔi kande k’olambo.
Ɛnyɛlɔ, dia mbeya woho wakoka nyɔi k’onto kondjiyɛ miliyɔ y’anto wahɔ, enda asawo anɛ: “Ngande watoshimbɛ Yeso?” ndo “Lande na kakasowe Yeso ndo kakandavu?” Kana enda vidɛo yele l’ɔtɛ a dui ɔnɛ: Lande na kakavu Yeso?