Anto efula waya bu la loshilambo. Ɛkɔnyi waha la loshilambo mpangwɛka adɔkɔtɛlɛ; ewandji wa l’ahole wasodjawɔ diangɔ dia ndɛ pangwɛka ase olimu; waa pasase yele bu la loshilambo tɛngaka wanɛ wakamba lo waa aviyɔ; ambeki w’asɛndji mbɔlaka, manɛka ndo ndɔshaka embetsha; ase pɔlitikɛ amɔtshi salaka awui wa kɔlɔ ndo akina funaka woho wewɔ anto w’ɛlɔlɔ.

 Bible kekɔ mɛtɛ l’alako w’amɛna dia monga la loshilambo. Tɔ nembetshiyaka nto lande na kele anto efula waya bu la loshilambo ɛlɔ kɛnɛ.

 Mɛnamaka l’andja w’otondo di’anto waya bu la loshilambo, mbuta ate waya bu la lɔkɛwɔ la dimɛna ndo letawɔma.

•   Ɔkɔnya ɔmɔtshi w’oma la salema mɛnyaka di’ase amɛrikɛ wele l’États-Unis wamboleka monga la lɔkɛwɔ la kɔlɔ nshi nyɛ oleki l’etena kakɔna tshɛ ka l’ɛnɔnyi 22 w’etshi.

•   Ɔkɔnya okina wakawakɔnya anto ndekana 32 000 lo wedja 28 pursa 65 y’anto wakate dia nshi nyɛ mbamboleka tshɛ anto nsala awui aha la loshilambo.

 Bible kakatɛkɛta dia lɔkɛwɔ lɛnaso le anto ɛlɔ kɛnɛ.

•   “Lo nshi ya nkomeelo ayoonga paa. Dikambo anto wayoonga nkaki, wayoolanga okunji, wayoonga ɛsɛmɔ ndo wayoonga nkanyi, . . .  wayɔɔtɔmbɔkwɛɛ amboci waakiwɔ . . . ankanga wa tojawudi, ankanga wa ngala.”—2 Timɔteyo 3:1-3. Dyookaneelo Dy’oyooyo.

 Dia nyomeya awui akina wendana la woho watakotshama prɔfɛsiya kɛsɔ, adia sawo diele l’ɔtɛ a dui ɔnɛ “La Bible a-t-elle prédit la mentalité et la conduite des gens de notre époque?”

 L’andja ɔnɛ wele anto waya bu la loshilambo, miliyɔ y’anto wambɛna dia alako wa lo Bible kimanyiyaka efula dia monga la lɔkɛwɔ la dimɛna. Alako washatɔ wendana la lɔkɛwɔ “tena tshɛ vɔ sunganaka mbɛkɛ otema, kakianɛ ndo pondjo pondjo.” (Osambo 111:8) Tende bɛnyɛlɔ dimɔtshi:

•   Kɛnɛ kata Bible: “Akambo tshɛ walanganyu anto nyosalɛ, nyu la wɔ pombaka mbasalɛwɔ.”—Mateo 7:12.

   Elembetshielo: Sho pombaka salɛ anto awui w’ɛlɔlɔ ndo monga la loshilambo otsha lewɔ, oko walangaso vɔ tosalɛ.

•   Kɛnɛ kata Bible: “Etena kɛnɛ kamonyotshika lokeso, onto tshɛ la l’atei anyu atɛke wonyande mɛtɛ.”—Ɛfɛsɔ 4:25.

   Elembetshielo: Sho pombaka mbutaka kɛnɛ kele mɛtɛ ndo salaka awui la losembwe.

 Dia nyomeya awui akina lo dikambo sɔ, adia lam’alangɛ:

•   Tshoto y’Etangelo yele l’ɔtɛ a dui ɔnɛ “Ɔlɔlɔ la kɔlɔ—Ɔnɔmbɔdi wakokayɛ mbɛkɛ otema.”

•   Sawo diele l’ɔtɛ a dui ɔnɛ “La tolérance—Quelle aide la Bible peut-elle apporter.”