Lo ndjela alapɔlɔ wa l’andja w’otondo weke oma la ntomba, a onto ɔtɔi l’atei w’anto anɛi ekɔ lo ndjaoka ompoko.

•   Chido Mpemba, coprésidente de la Commission sur les liens sociaux de l’Organisation mondiale de la santé akate ate: “Wanganelo wa l’anto akina mongaka la shɛngiya le weho w’anto tshɛ oyadi ɛnɔnyi engana wele la wɔ kana dihole diakɔna diewɔ.

 Anto amɔtshi fɔnyaka dia paka wanɛ wele epalanga kana wanɛ wakayanganya l’anto akina mbakoka ndjaoka ompoko. Koko ndo ɛlɔngɔlɔngɔ, wanɛ wele l’alemba w’amɛna ndo atshukanyi koka ndjaoka ompoko. Wanganelo wa la anto akina kana eokelo k’ompoko koka monga la shɛngiya lo yoonge ya lo yimba kana ya lo demba yaki onto.

•   Docteur Vivek Murthy, chirurgien général des États-Unis akate ate: “Onto layaoka ompoko ndeka onto lata ate hayaoke dimɛna.” Nde kotshaka ate: “Lofulo la wanɛ wavɔ l’ɔtɛ wayanganyawɔ la anto akina l’ekɔ woho akɔ waamɛ la lɔnɛ la wanɛ wavɔ l’ɔtɛ wanɔwɔ fɔka dikumi la tshanu lo lushi.”

 Otungi aso halange dia sho ndjaoka ompoko kana mangana la anto akina. Sangwelo dia Nzambi ele di’anto ngɛnangɛnaka kaamɛ l’ɔtɛ wa lɔngɛnyi lewɔ la anto akina.

•   Tɔndɔ dia lo Bible: “Ko Jehowa Nzambi akate ate: ‘Keema dimɛna dia pami tshikalaka ndamɛ.’”​—Etatelo 2:18.

 Nzambi nangaka dia sho monga la diɔtɔnganelo dia dimɛna la nde. Nde tolakaka dia nde ayosukana la so naka sho mbidja welo dia nsukana la nde.​—Jakɔba 4:8.

•   Tɔndɔ dia lo Bible: “Ɔngɛnɔngɛnɔ le wanɛ weya ehomba awɔ wa lo nyuma, nɛ dia Diolelo dia l’olongo diekɔ diawɔ.”​—Mateo 5:3.

 Nzambi nangaka dia sho mbɔtɛmɔla kaamɛ la anto akina. Sho mongaka l’ɔngɛnɔngɛnɔ etena kasalaso dui sɔ.

•   Tɔndɔ dia lo Bible: “Ndo nyɛsɔ todjanake yimba dia tshutshuyana lo ngandji ndo lo etsha w’ɛlɔlɔ, tatotshikake sanganaka kaamɛ, . . . koko tokeketshanake lam’asaso.”​—Hɛbɛru 10:24, 25.

 Dia mbeya awui efula wendana l’ohomba wa ndɔshana la eokelo k’ompoko, adia sawo diele la ɔtɛ a dui ɔnɛ: “La solitude à l’ère de la communication.”