Onde sho koka nongamɛ dia monga la dikongɛ di’awui wa falanga diele la losembwe?
Lo wedja efula, anto kɛndakɛndaka lo toshinga l’ɔtɛ wa wɛngiya wɛnawɔ lo kɛnɛ kendana la okondjelo wa falanga. Ndo awui wamboyoleka ndana lo nshi ya hemɔ ka COVID-19. Anto tshɛ wekɔ la lonyangu nɛ dia odihamelo wa lo waa mvudu, ekakatanu wendana la osakelo wamboyoleka nkonya ase wola, wola wamboleka ndo as’ɛngɛnyi, ɛngɔnyi wamboleka.
Onde sho koka nongamɛ di’ekakatanu wendana la okondjelo wa falanga wayoshila? Eelo! Bible nembetshiyaka kɛnɛ kayosala Nzambi dia nkandola ekakatanu ɛsɔ.
Ekakatanu wendana la ekondjelo wayokandɔma oma le Nzambi
Okakatanu: Anto wambohekɔ dia ntondja dikongɛ di’awui wa falanga diakotsha ehomba w’anto wa l’andja w’otondo.
Okandwelo: Nzambi ayanga mpɛnya mandji y’ana w’anto la lowandji lande hita, lowandji lelɛ Bible ɔnɛ Diolelo diaki Nzambi ndo diɔ mbayɔlɔmbɔla nkɛtɛ k’otondo oma l’olongo.—Danyɛlɛ 2:44; Mateo 6:10.
Etombelo: Lowandji la l’andja w’otondo lɔsɔ, mbuta Diolelo dia Nzambi mbayɔlɔmbɔla nkɛtɛ lo yoho ya kokele. Anto hawotodiɛnɛ la wola nto. (Osambo 9:7-9, 18) Lo dihole dia vɔ monga wola, vɔ wayɔngɛnangɛnaka la elowa w’oma l’olimu awɔ ndo kaamɛ la nkumbo yawɔ, vɔ wayonga la lɔsɛnɔ l’ɔngɛnɔngɛnɔ efula. Bible ndakaka ɔnɛ: “Vɔ wayoka mvudu ko wayodjasɛka lɔkɔ, Ndo vɔ wayokamba dikambɔ dia vinyɔ ko wayɔlɛka elowa w’oma lɔkɔ. Vɔ hawotoka mvudu dia onto okina ndjodjasɛ lɔkɔ, Ndo hawotokamba dikambɔ dia anto akina ndjɔlɛ.”—Isaya 65:21, 22.
Okakatanu: Anto hawokoke mbewɔ awui wawawɛnya paa kana wakoka mbahondja kɛnɛ kewɔ l’ohomba.
Okandwelo: Diɛsɛ la Diolelo diande, Nzambi ayonya awui tshɛ wela anto ekiyanu ndo wahawasha lotui tshitshi.
Etombelo: Etena kayodja Nzambi nkɛtɛ yimba, anto hawotohomana nto l’awui wayowahondja vu la nkumbo yawɔ kɛnɛ kele la wɔ ohomba. Ata, wola wa mbo ya ndɛ ndo elando wayoshila. (Osambo 46:9; 72:16; Isaya 33:24) Nzambi ndakaka ɔnɛ: “Anto ami wayodjasɛ lo dihole dia wɔladi w’efula, lo didjaselo dia lotui tshitshi ndo lo ahole wa diomuyelo wa ki.”—Isaya 32:18.
Okakatanu: Anto wekɔ lo sɔkishama mbala efula oma le anto akina wele lokaki.
Okandwelo: Ambolami wa Diolelo dia Nzambi wayeka dia monga la ngandji k’efula otsha le anto akina oleki ngandji kayaokawɔ.—Mateo 22:37-39.
Etombelo: L’ɛlɔmbwɛlɔ ka Diolelo, anto tshɛ wayonga la ngandji ka woho akɔ waamɛ otsha le Nzambi, ngandji ‘kahayange wahɔ atɔ hita.’ (1 Kɔrɛtɔ 13:4, 5) Bible mbutaka ɔnɛ: “Vɔ hawotosala ndooko kɔlɔ Kana ndanya dikona diami di’ekila di’otondo, Nɛ dia nkɛtɛ kayolola mɛtɛ la ewo ka Jehowa a Oko watololaka ashi lo ndjale.”—Isaya 11:9.
Bible nembetshiyaka dia tekɔ lo nsɛna lo nshi y’ekomelo k’andja ɔnɛ ndo ɔnɛ keem’edja Nzambi ayanga minya ekakatanu tshɛ wendana la ekondjelo, oko wakandalake. b (Osambo 12:5) Lam’akatakonge etena kɛsɔ, atɔndɔ wa lo Bible koka tokimanyiya dia ntondoya ekakatanu wakoka mpomana la so ɛlɔ kɛnɛ. Enda ɛnyɛlɔ sawo diele l’ɔtɛ a dui ɔnɛ: “ Comment vivre avec moins ” ndo “ L’argent et vous. ”
a Jehowa ekɔ lokombo la Nzambi lakandatosholɛ lo Bible.—Osambo 83:18.
b Dia mbeya lande na kakokayɛ ndjaɛkɛ lo Bible, adia sawo diele l’ɔtɛ a dui ɔnɛ: “Bible kekɔ kiɔkɔ y’akambo wa mɛtɛ wahombaso ndjaɛkɛ lɔkɔ.”
Enda ndo lo...
TSHOTO Y'ETANGELO
Kakɔna kayosala Diolelo diaki Nzambi?
Yeso akeyaka dia paka Diolelo dia Nzambi mbele tshɔi ya lowandji lakoka nkandola ekakatanu wa la nkɛtɛ. Kakɔna kamboshila Diolelo sɔ nsala dia sho monga l’eshikikelo?
