“Tayanga mɛna awui woleki kɔlɔ efula wayanga salema. Esomba wa weke wayodinda l’ashi. Tanyi ta wolo tahatongaka. Mpɛpɛ ya wɔma efula. Ohombelo w’ashi l’ahole efula. Oshishwelo wa miliyɔ ya weho wa ntombatomba ndo wa waa nyama. Awui asɔ bu oko nsango y’akɔlɔ kana oshimu mbadjaso esɔ. Awui asɔ mbatotɛ ase siansɛ dia wayanga salema naka ewandji hawotshikitanyisha yoho yakambawɔ la diangɔ diatondja esase ndo dja.”​—Ɛtɛkɛta waki António Guterres, sécretaire-géneral des Nations Unies, lo ndjela alapɔlɔ wakatondjama Ngɔndɔ ka nɛi 4, 2022 oma le olui ɔmɔtshi wa tomanyi lo woho wakamba ewandji wa lɛɛta l’awui wendana la djungudungu.

 “Ase siansɛ wekɔ lo mbidja ombeka dia l’ɛnɔnyi wayaye suke la parkɛ 423 ya wodja w’États-Unis yayolana efula lo woho weyɔ lo waale efula wa ndana l’ɔtɛ wa wodelo wa djungudungu. Awui wa kɔlɔ wayanga salema wekɔ oko efula ka mpokoso yadiaso dikambo diayɔ lo Bible: dja ndo dola, woho wataleke ashi nkama, wodelo w’ashi lo waa ndjale ndo tanyi ta wolo.”​—“Chaos d’inondations dans Yellowstone, un signe de crises à venir,” The New York Times, Ngɔndɔ ka samalo 15, 2022.

 Onde ekakatanu wendana la djungudungu ya la nkɛtɛ wayokandɔ? Naka eelo, ayokandola ekakatanu akɔ? Tende kɛnɛ kata Bible.

 Bible mbutaka dia Nzambi ‘ayolanya wanɛ walanya nkɛtɛ.’ (Ɛnyɛlɔ 11:18) Divɛsa nɛ tetshaka awui asato:

1.  1. Kɛnɛ kasala anto kayolanya nkɛtɛ woho w’anyanya.

2.  2. Olanelo wa nkɛtɛ wayokomɛ.

3.  3. Nzambi, koko aha anto mbayokandola awui wendana l’olanelo wa nkɛtɛ.

 Bible mbutaka dia “nkɛtɛ tshikalaka pondjo.” (Ondaki 1:4) Anto wayodjasɛka lɔkɔ pondjo pondjo.

•   “Anto w’ɛlɔlɔ wayokita nkɛtɛ, ndo wayodjasɛka lɔkɔ pondjo pondjo.”​—Osambo 37:29.

 Okama aso wa nkɛtɛ wayɔlɔngɔsɔma tshɛ lo tshɛ.

•   “Oswe wa shɛnga ndo nkɛtɛ y’ofumbo yayɔngɛnangɛna, ndo laandja l’oswe layonga l’ɔlɔ ndo layɔmɔnga oko dɛmbɔlɛmbɔ dia safra.”​—Isaya 35:1.