Oleelo w’akatshikatshi ato—Kakɔna kata Bible lo dikambo sɔ?
L’andja w’otondo, anto efula ndjashaka lo oleelo w’akatshikatshi (Végétalisme).
“Végétalisme ekɔ yoho yalɔsɛnɔ yele anto salaka tshɛ kakokawɔ dia mbewɔ salɛ nyama kɔlɔ kana kidiaka dia ndɛ, dia nkamba lokoho dia ndɔta kana l’ɔtɛ w’oyango okina.”—The Vegan Society.
Anto efula ndjashaka dia ndɛ akatshikatshi aha tsho l’ɔtɛ walangawɔ nkokɛ waa nyama, koko ndo l’ɔtɛ walangawɔ nɔngɔsɔla dihole di’edjaselo, yonge yawɔ kana di’ɛkɔkɔ ekina wendana l’ɔtɛmwɛlɔ.
“Oleelo w’akatshikatshi ntshikitana la toho tokina t’oleelo, nɛ dia anto kiɔsaka oko dui diendana la mbetawɔ, yɛdikɔ y’onto ndamɛ ndo yoho yakoka onto tshɛ ntshikitanya andja lo yoho ya dimɛna.”—Académie Britanique.
Onde oleelo w’akatshikatshi mbayɔlɔngɔsɔla awui wendana la okama aso wa nkɛtɛ? Kakɔna kata Bible lo dikambo sɔ?
Woho wɔsa Otungi aso anto ndo waa nyama
Bible mɛnyaka di’Otungi aso Jehowa Nzambi a mbɔsaka di’anto ndeka waa nyama ndo nde akasha anto lowandji laadiko diayɔ. (Etatelo 1:27, 28) L’edjedja ka wonya, Nzambi akayetawɔ di’anto ndɛɛka nyama. (Etatelo 9:3) Koko, nde hetawɔ di’anto mpɛnyɔla nyama.—Tokedi 12:10.
Lo ndjela Bible, oleelo wa nyama kana bu ekɔ yɛdikɔ y’onto ndamɛ. b Yɛdikɔ yaso hatokonya anto woleki ohomba lo washo wa Nzambi. (1 Kɔrɛtɔ 8:8) Ndooko onto lele la lotshungɔ la nombosha osekande lo kɛnɛ kendana l’ɛngɔ kasɔnande dia ndɛ.—Rɔmɔ 14:3.
Mboka k’otsha lo nshi yayaye y’amɛna
Bible mɛnyaka dia yoho yaso ya nsɛna hayotɔlɔngɔsɔla awui wa l’andja ɔnɛ. Ekakatanu efula ndja oma l’awui wa pɔlitikɛ, ɔsɛnɛlɔ wa l’anto akina kana awui wendana l’ekondjelo wele ndooko onto lele l’akoka wa mbalɔngɔsɔla. Bible mbutaka ɔnɛ:
“Kɛnɛ kokotami hakoke nsembɔ.”—Ondaki 1:15.
Otungi aso ayokandola awui wele laso ɛlɔ kɛnɛ. Bible kambaka l’ɛtɛkɛta wa didjidji dia nembetshiya kɛnɛ kayondosala.
“Dimi lakɛnyi olongo w’oyoyo la nkɛtɛ k’oyoyo, nɛ dia olongo w’edjedja la nkɛtɛ k’edjedja wakashishɔ ndo ndjale kotanema nto.”—Ɛnyɛlɔ 21:1.
Nzambi ayɔhɛnya mandji y’ana w’anto kana “olongo w’edjedja” la “olongo w’oyoyo” mbuta ate Diolelo diande dia l’olongo. Diolelo diande diayonya “nkɛtɛ k’edjedja” mbuta ate anto wa kɔlɔ ndo diayɔlɔmbɔla laadiko dia “nkɛtɛ k’oyoyo” kana wanɛ wetawɔ monga l’ɛse ka lowandji lande.
Ayonga paka l’ɛlɔmbwɛlɔ ka Diolelo dia Nzambi mbayeka anto woho wa nsɛna lo wɔladi la waa nyama ndo aha ndanya ahole wodjashiwɔ.—Isaya 11:6-9.
a Jehowa mbele lokombo loshika la Nzambi.—Osambo 83:18.
b Bible todjangɛka ɔnɛ “nyɔsɛkɛ . . . dikila.” (Etsha 15:28, 29) Kɛsɔ nembetshiyaka dia hatohombe nnɔ dikila kana ndɛ nyama yakavu esena ndo hatohombe ndɛ diangɔ diele dikila diakandjama lɔkɔ.
Enda ndo lo...
TSHOTO Y'ETANGELO
Onde anto wayolanya nkɛtɛ woho wahatalɔngɔswamaki nto?
Bible kombuta tsho dia elanyelo ka nshi nyɛ k’ahole wadjasɛ anto, koko tɔ kakate nto kɛnɛ kayokonya l’elanyelo kɛsɔ.
ESSENTIAL BIBLE TEACHINGS
Lande na kakatonge Nzambi nkɛtɛ?
Andja aso ɔnɛ ndola la diangɔ di’elangala. Nkɛtɛ manganyema la wonya lo yɛdikɔ yakoka, tɔ kitshama it is tilted at just the right angle, and it rotates at just the right speed. Lande na kakadje Nzambi efula dia nsala ntonga nkɛtɛ?
AKAMBO AKINA
Onde sho koka nongamɛ dia monga la dikongɛ di’awui wa falanga diele la losembwe?
Ekɔ lowandji lɔmɔtshi lakoka nɔmbɔla akambo wa la nkɛtɛ lo yoho ya kokele, lo minya wola lo pondjo.
