L’eleko k’ɔwɔ ka lo 2024, anto oya lo miliyɔ tshanu wayenda anto wakɛnya tɔkɛnyɔ efula w’oma lo wedja 206. Thomas Bach lele président du Comité International Olympique akate ate: “Kɛnyɔ yaso kimanyiyaka di’anto wa l’andja w’otondo monga kaamɛ ndo lo wɔladi. Nyɛsɔ tosuke oyango wele la tɔkɛnyɔ tɔnɛ, mbuta ate di’anto nsɛna lo wɔladi ndo kaamɛ, kaanga kotshikitanyiso.”

 Onde tɔkɛnyɔ tɔsɔ nkoka nkotsha oyango atɔ? Onde tekɔ l’elongamelo ka shikaa dikambo dia wɔladi ndo kaamɛ?

 Ɔkɛnyɛlɔ wa tɔkɛnyɔ totshikitanyi ambokonya anto dia ndjasha l’awui efula koko aha tsho dia nkanyiya lo dikambo tɔkɛnyɔ takɔ. Tɔkɛnyɔ tɔsɔ tambokonya anto dia nkakitɔna l’ɔtɛ w’awui wa pɔlitikɛ ndo wa dioho. L’atei w’awui asɔ mbele ndo tshungɔ yele l’anto, awui wa koho y’alemba, awui w’ɛtɛmwɛlɔ ndo etshikitanu ekina.

 Tɔkɛnyɔ toshikitanyi tasalema l’andja w’otondo kimanyika anto dia nkɔkɔla demba. Koko, tɔkɛnyɔ tɔsɔ mbisholaka etsha ndo tokanyi tele l’anto taakonya dia nkakitɔna ndo tɔ keketshaka anto dia vɔ ntetemala nkanyiya ndo nsala akambo lo yoho shɔ, lo dihole dia monga kiɔkɔ ya wɔladi ndo ya kaamɛ ka mɛtɛ.

 Bible kakatewoyisha etsha wakonya di’aha anto monga kaamɛ ɛlɔ kɛnɛ (2 Timɔte 3:1-5) Dia mbeya awui efula wendana la prɔfɛsiya kɛsɔ, adia sawo diele l’ɔtɛ a dui ɔnɛ: “La Bible a-t-elle prédit la mentalité et la conduite des gens de notre époque ?”

 Bible k’ekɔ l’elongamelo ka mɛtɛ lo dikambo dia wɔladi ndo dia kaamɛ ka l’andja w’otondo. Tɔ ndakaka di’anto wa lo nkɛtɛ k’otondo wayonga kaamɛ lɛse ka nguvɛrnɛma kelamɛ ɔnɛ “Diolelo dia Nzambi.”​—Luka 4:43; Mateo 6:10.

 Yeso Kristo lele owandji wa Diolelo sɔ, ayela wɔladi l’andja w’otondo. Tɔ mbutaka ɔnɛ:

•   “Lo nshi yande kayɔngɔna onto ɔlɔlɔ, ndo wɔladi wayofulanɛ.”​—Osambo 72:7.

•   “Nde ayotsha ose wola layanga ekimanyielo. . . Nde ayowatsha oma lo dihɛnyɔki ndo oma l’awui wa ngala.”—Osambo 72:12, 14.

  Kaanga ɛlɔ kɛnɛ, wetshelo wa Yeso wambokonya anto wa lo wedja 239 dia monga kaamɛ. Oko weso Akristo, Ɛmɛnyi wa Jehowa wa l’andja w’otondo mbekaka woho wa nsɛna l’anto lo wɔladi. Dia mbeya awui asɔ, adia Tshoto y’etangelo yele l’ɔtɛ a dui ɔnɛ: “Sho koka mbidja lohetsho otshumba.”