Atete edja kakasangana ewandji wa l’andja w’otondo, ambeyi wa siansɛ ndo asadi wa tshulatshula dia ntshula ɛngɔ kɛmɔtshi kele la yimba (Al). Lo mbeya nɛmɔ diayonga l’ɛngɔ kakɔ, vɔ wakatatɛ ndjakiyanya lo waale wakakoke monga l’okambelo atɔ.

•   “AI: Ekɔ tshulatshula diele la yimba ndo diɔ mamboleka wolo efula nshi nyɛ ndo diekɔ l’akoka wa mbokoya yoho ya lɔsɛnɔ y’onto . . . Mbala kakɔ kaamɛ, AI ekɔ waale efula le anto ndo diɔ koka minya tshungɔ mɔtshi yele l’anto ndo mbetɛ akambo wolo le wɔ dia mbidjasɛ lo wedja wasɛna lo ndjela demokrasi.”​—Kamala Harris, vice president ka l’États-Unis, Ngɔndɔ ka tanu 4, 2023.

•   “Kaanga mbakimanyiya tshulatshula diele la yimba sɔ lo awui wendana la nkokɛ yonge y’anto, diɔ diekɔ nto la waale efula le anto,” mbakafunde olui ɔmɔtshi w’adɔkɔtɛlɔ wa tomanyi wendana la yonge walɔmbwama oma le dɔkɔtɛlɛ Frederik Federspiel, lo sawo dimɔtshi diakatondjama lo Ngɔndɔ ka tanu 9, 2023, lo BMJ Global Health. a

•   “AI aya ehomɔ ka nkahanya nsango ya kashi. Ndo keema edja tshulatshula diele la yimba sɔ koka monga tshondo ya waale l’elimu w’anto. Anto amɔtshi wakamba lo awui wa tshulatshula wekɔ lo ndjakiyanya dia lo nshi yayaye tshulatshula diele la yimba sɔ mbeyaka ndjonga waale le anto.”​—The New York Times, Ngɔngɔ ka tanu 1, 2023.

 Oko watete nshi, tayeya dia kana anto wayokamba la tshulatshula diele la yimba sɔ dia nkimanyiya anto kana dia salɛ anto kɔlɔ. Kakɔna kata Bible lo dikambo sɔ?

 Bible mɛnyaka ɔkɔkɔ wahakoke anto monga l’eshikikelo dia diangɔ dia tshulatshula diasalawɔ diayokambemaka paka lo yoho ya dimɛna tsho.

1.  1. Oyadi kaanga etena kele anto la tokanyi t’amɛna, vɔ hawokanyiya dia tokanyi tawɔ koka ndjonga l’etombelo wa kɔlɔ.

   •   “Mboka kɛmɔtshi mɛnamaka ɔlɔlɔ le onto, koko l’ekomelo tɔ tɔlaka lo nyɔi.”​—Tokedi 14:12.

2.  2. Onto hakanyiya woho wakoka anto akina ndjokamba l’elimu ande lo yoho ya dimɛna kana ya kɔlɔ.

   •   “Dimi layohomba kitshikɛ [olimu ami] onto layoya l’ɔkɔngɔ ami. Eeya kana nde ayonga kanga lomba kana enginya? Koko nde ayɔlɔmbɔla kɛnɛ tshɛ kakamamane wolo ami ndo lomba lami dia kikondja l’ɛse olongo.”​—Ondaki 2:18, 19.

 Woho wele anto bu l’eshikikelo ɔsɔ mɛnyaka lande na keso l’ohomba w’ɛlɔmbwɛlɔ k’oma le Otungi aso.

 Otungi aso tolakaka dia nde hetawɔki pondjo di’onto kana tshulatshula diasalawɔ ndanya nkɛtɛ.

•   “Nkɛtɛ tshikalaka pondjo.”​—Ondaki 1:4.

•   “Anto w’ɛlɔlɔ wayokita nkɛtɛ, ndo wayodjasɛka lɔkɔ pondjo pondjo.”​—Osambo 37:29.

 Lo tshimbo ya Bible, Otungi aso toshaka ɛlɔmbwɛlɔ kayotɔlɔmbɔla otsha lo nshi yayaye ya wɔladi ndo y’amɛna. Dia mbeya awui akina efula wata Bible, adia asawo “Kakɔna kakoka tokimanyiya dia monga la nshi yayaye y’amɛna?” ndo “Une espérance réelle pour des jours meilleurs.”