Mishiki wekɔ woshasha ɔmɔtshi wa dimɛna w’oma le Jehowa. Vɔ wekɔ la shɛngiya lo tokanyi ndo lo wɔɔngɔ ndo vɔ kokaka totshutshuya dia nsala dui dimɔtshi. Shɛngiya shɔ mbele la esambo aso le so. Ndo kɛnɛ koleki tshɛ, ele vɔ tokimanyiya dia ndjasukanya la Jehowa.

 Ntatɛ oma lo 2014, tambotondja esambo ndekana 70, ndo ɛlɔ kɛnɛ esambo ɛsɔ wotanema l’ɛtɛkɛta ndekana 500! Mbala mɔtshi ko wɛ ekɔ lo ndjambola ɔnɛ: “Waa na wafunda esambo ɛnɛ ndo ngande watondjamawɔ?”

 Esambo wekɔ lo tondjama oma le Departɛma dia odio-vidɛo, diakamba lo ɛlɔmbwɛlɔ ka Kɔmite ka wetshelo k’Olui-walɔmbɔla. Ekipɛ k’awui wa mishiki kengana l’anangɛso l’akadiyɛso 13 wanɛ wafunda, wanɛ wenda awui wa wendjo w’awui, wanɛ wakongɛ olimu ndo awui akina wendana la otondjelo w’esambo. Ndo nto, Kɔmite ka wetshelo aketawɔ di’anto wayakimɔ la lolango wa l’andja w’otondo wakamba l’andja wa Bɛtɛlɛ (Télévolontaires) mbisha ekimanyielo kawɔ. L’atei awɔ mbele ndo wanɛ wafunda esambo (compositeurs), apumi wa mishiki ndo amembi. Anangɛso l’akadiyɛso asɔ kambaka l’okitshakitsha tshɛ la diewo diawɔ aha la nyanga lokumu.

 Ko ngande watondjama osambo? Ntondotondo, Kɔmite ka wetshelo mbashikikɛ avɛsa wayosukɛ osambo ndo woho wahomba osambo ntshutshuya onto dia ndjaoka. Oma laasɔ ko ekipɛ ka mishiki nsɔna onto layofunda osambo akɔ ndo ɛtɛkɛta wayonga lo mishiki akɔ. Oma laasɔ ko vɔ tokodja ɛtɛkɛta l’eshinga. Oma laasɔ, Kɔmite ka wetshelo kɛnɛ kambowotokohemba mbidja l’eshinga ndo mbisha kanyi yatɔ. Oma laasɔ nto, ekipɛ ka mishiki ayosala etshikitanu wahombama ko vɔ mbisha l’eshinga mbala k’ekomelo. Esambo mbidjamaka l’eshinga l’ahole wotshikitanyi, ɛnyɛlɔ lo Bɛtɛlɛ kɛmɔtshi kana laka anangɛso l’akadiyɛso wele la dihomɔ diahomba dikambo di’olimu ɔsɔ wa mbidja awui l’eshinga.

 Dia mfunda osambo ndo mbodja l’eshinga, anangɛso kambaka la weho ɛmɔtshi la logiciels ndo la waa bibliɔtɛkɛ audio. Dia nsala olimu ɔsɔ, vɔ kambaka la dihomɔ dia mishiki, tables de mixage, dihomɔ diafudia awoyi, stidio ndo la waa mikro. Mikro ɔtɔi mbeyaka monga l’oshinga wa dɔlara 100 (yɛdikɔ ya 86 €) polo ndo ndekana dɔlara 1 000 (yɛdikɔ yele oko 860 €). Lo 2020, takatondja dɔlara 116 000 (suke la 100 000 €) dia nsomba dihomɔ diakambawɔ la diɔ dia mbidja awui l’eshinga.

 Asalaso dia nkamba dimɛna la weshasha anyu? Lo dihole dia monga la ekipɛ ka woke lo Bɛtɛlɛ ka wanɛ wadja mishiki l’eshinga, sho kambaka la waa télévolontaires efula. Lo wedi okina, lo dihole dia ntshumanya ɔrkɛstrɛ ɔmɔtshi ko mbidja awui awɔ, anangɛso fundaka esambo ndo mbidjaka mishiki l’eshinga l’ɔrdinatɛrɛ.

 Anangɛso l’akadiyɛso ngɛnangɛnaka mpokamɛ esambo aso. Tara, ladjasɛ l’Allemagne, mbutaka ate: “Esambo kimanyiyakami etena kambomotshimba wɔɔngɔ. Etena kahokamɛmi esambo l’ɔtɛkɛta ami wa lootɔ, ekɔ oko Jehowa mbasɛngasɛnga.” Ɔnangɛso ɔmɔtshi la la Kazakhstan lelɛwɔ Dmitri mbutaka ate: “Dimi kombolaka mpokamɛ esambo aha la ndjambola dia kana vɔ mbɔtɔnɛka l’atɔndɔ wa lo Bible. Ndo nto, esambo ɛsɔ kimanyiyakami dia mbika washo lo lɔngɛnyi lele lam’asami la Jehowa.”

 Delia, ladjasɛ l’Afrique du Sud, mbutaka woho wayaokande lo kɛnɛ kendana la esambo ate: “Vɔ mbaya kiɔkɔ y’ekeketshelo kami. Naka lambɔkɔmɔ kana lekɔ l’okakatanu ɔmɔtshi, layotana osambo wɔtɔnɛ la okakatanu wele lami. Mbala efula, mpokamɛ tsho esambo ambotakokaka dia dimi ndjaoka dimɛna!”

 Anto efula wekɔ la osambo kana esambo walekawɔ nanga. Lerato, ladjasɛ nde lawɔ l’Afrique du Sud, mbutaka ate: “Osambo wa ‘Daka dia Paradiso diaya ka suke la soko’ ndo ‘Andja w’oyoyo’ mboholakami etena kayomolongola mama lo paradiso. Mbala tshɛ kahokamɛmi esambo ɛsɔ, dimi mongaka oko onto lawɛna ayalawɔ oya akasandjodi anya dia sho kumbatanɛ.”

 Osambo omɔtshi wakakimanyiya lo yoho ya laande osekaseka ɔmɔtshi wa la Sri Lanka. Nde mbutaka ate: “Ombetsha ami wa siansɛ akamɔnyɔla la ntondo k’anto tshɛ l’ɔtɛ wemi Ɔmɛnyi wa Jehowa. Lakoke wɔma ndo dimi kombeya kɛnɛ ka mbokadimola. Lam’akamakalola la ngelo, mama akakeketsha dia mpokamɛ osambo wata ɔnɛ: “Étudier rend fort.” Osambo ɔsɔ wakakimanyiya dia nshihodia dia lakahombe nsala eyangelo ndo ndjalɔngɔsɔla dia mbisha okadimwelo. La wedi a pindju, lakatshu tosawola l’ombetsha ami. Nde akampokamɛ ndo nde akate dia wony’ɔnɛ, nde amboshihodia dimɛna dietawɔ di’Ɛmɛnyi wa Jehowa. Lekɔ l’ɔngɛnɔngɛnɔ efula lo woho watotondjɛ okongamelo wa Jehowa esambo wakeketsha.”

 Ko oma lende atomba falanga yendana l’otondjelo w’esambo ɛnɛ? Oma lo weshasha wa la lolango wakimɔma dikambo di’olimu wakambema l’andja w’otondo. Efula ka weshasha ɛsɔ tomamaka oma lo sitɛ ka donate.pr418.com. Losaka lo weshasha anyu wa la lokaho.