Jehowa nangaka mbetsha ekambi ande. L’ɔtɛ a dui sɔ, okongamelo ande wakakongɛ kalasa efula yalowanya ambeki dia mɛmba ɛkɛndɛ awɔ. L’atei ayɔ mbele ndo Kalasa k’Esambisha wa Diolelo (EER). L’ɛnɔnyi weke ka mbeta, okongamelo waki Nzambi wakayasha aha tsho l’awui akina wekama lo waa kalasa koko ndo lo wokelo wa mbalasa yasalema kalasa ya teokrasi. Oyango woleki ele wa nɔngɔsɔla ahole asɔ dia nkimanyiya embetsha dia mbetsha dimɛna ndo ambeki dia mbeka dimɛna. Ngande watokimanyiya weshasha anyu dia nkotsha oyango ɔsɔ?

 L’edja k’ɛnɔnyi efula, kalasa ya teokrasi yakasalemaka lo Mbalasa ya Diolelo ndo lo Mbalasa ya nsanganya ya weke. Ko lande na kotoka ndo kotɔlɔngɔsɔla mbalasa kina efula nshi nyɛ yakambema paka lo dikambo dia kalasa ya teokrasi? Tɔsɛdingole ɛkɔkɔ esato.

 Ohomba efula. Ɔnangɛso Christopher Mavor, lele okimanyedi lo Kɔmite k’olimu ka Olui-walɔmbɔla, mbutaka ate: “Waa Bɛtɛlɛ efula wakatotɛ dia wekɔ l’ohomba w’anangɛso l’akadiyɛso efula dia nkimanyiya l’olimu w’esambishelo. Ɛnyɛlɔ lo 2019, Bɛtɛlɛ ka la Brésil kakafɔnya lofulo l’ambeki wakahombe nongola apɔlɔmɛ oma lo Kalasa k’Esambisha wa Diolelo (EER) dia nkomba ɛtshi ka nkɛtɛ ka filialɛ kawɔ oko ambeki 7,600.” Lo alapɔlɔ ɔmɔtshi wendana la Bɛtɛlɛ ka l’États-Unis, akɛnama dia waki l’ohomba w’ambatshi mboka wele la diewo wakoka ndowanya anto akina l’esambishelo ka laande ka lo sɛkɛ kasalema l’esomba a weke, esambishelo ka lo telefɔnɛ ndo ka lo nkanu. Ohomba w’anangɛso wekɔ nto dia nkamba la departɛma dia wokelo wasalema lo wodja awɔ ndo la departɛma dia diɔtɔnganelo la mpitadi. Ambeki wolongodi apɔlɔmɛ oma lo EER koka nkimanyiya di’ehomba ɛsɔ.

 Ambeki efula. Waa filialɛ efula wambolongola adɛmandɛ oma le ambeki efula kamamba oleki ndo lofulo lewɔ l’ohomba. Ɛnyɛlɔ lo Brésil, lo yɛdikɔ y’ɔnɔnyi ɔtɔi oto, filialɛ akalongola adɛmandɛ 2,500. Koko lam’ele mbalasa yele lawɔ yasalema kalasa bu weke, filialɛ kaketawɔ paka ambeki 950.

 Mvudu y’amɛna. Etena kakatshɔka ambeki lo kalasa lo Mbalasa ka Diolelo kana lo Mbalasa ya nsanganya ya weke, wakahangaka lo nkombo y’anangɛso l’akadiyɛso wadjasɛ lo ngelo kasalema kalasa. Ekongelo kɛsɔ mongaka dimɛna paka lo ahole wahasalema kalasa ɔnɔnyi tshɛ. Koko lo dihole diasalema kalasa efula, ekongelo kɛsɔ hakoke kongɛma dia apandjudi wa lo dihole diasalema kalasa mpangia ambeki l’edja ka ngɔndɔ efula l’ɔnɔnyi. Diakɔ diambokama mvudu suke la ahole wa kalasa lo dikambo di’ambeki.

 Luudu lele la mbalasa kasalema kalasa mbidja ndo mvudu y’embetsha ndo y’ambeki oko 30 yakoka mbakimanyiya, koka monga l’oshinga wa miliɔ y’adɔlara lo nemanɛ la dihole ndo awui akina.

 Kalasa mbikamaka lo dihole dia ki dianganyi l’osomba koko suke l’ahole wɔsawɔ mituka. Kɛnɛ koleki ele dihole diakoka apandjudi efula mbisha lonya di’ɔkɛndɛkɛndɛlɔ wa dimɛna wa kalasa lo nɔngɔsɔlaka ndo kokɛka mvudu yakɔ ndo dihomɔ.

 Mbalasa yakɔ mongaka la Bibliɔtɛkɛ, ahole wa mbekaka, ɔrdinatɛrɛ, ɛprimatɛ ndo dihomɔ dikina. Ndo nto, lɛkɔ mongaka mbalasa k’olelo lɛnɛ akoka ambeki ndo embetsha ndɛ kaamɛ. Dihole dia dimɛna mongaka diakalɔngɔsɔma dia sutshasutshaka demba.

 Mbalasa kasalema kalasa nɔngɔsɔmaka dimɛna efula. Troy, lakamba la departɛma dia l’andja w’otondo dia wokelo dia lo Warwick, l’États-Unis, mbutaka ate: “Sho kambaka la Service des écoles théocratiques dia tokimanyiya dia nsala asango wa mbalasa yasalema kalasa yayokoka ambeki mbɔtɔ ndo mbeka aha l’okakatanu. Anangɛso toshaka ɛlɔmbwɛlɔ lo kɛnɛ kendana la woke ndo woho wayonga mbalasa ya kalasa mbidja ndo atala la diangɔ dikina diendana la sɔnɔrizasiɔ ndo tovidɛo.” Lo kɛnɛ kendana la woho wa nkongɛ diangɔ diakɔ dia sɔnɔrizasiɔ, Zoltán lele ombetsha ɔmɔtshi wa lo EER la Hongrie mbutaka ate: “L’etatelo, sho komongaka kaanga la mikro ɔtɔi, ɔnkɔnɛ takoholaka ambeki mbala la mbala dia ntɛkɛta la wolo. Koko l’etena kɛnɛ kayaso la mikro l’oseka mɛsa tshɛ, okakatanu ɔsɔ wambokandɔ!”

 Shɛngiya yakɔna yele la mbalasa y’amɛna shɔ le embetsha ndo le ambeki? Angela lakɔtɔ kalasa ka EER la Palm Coast, lo Floride l’États-Unis, mbutaka ate: “Dihole sɔ diekɔ dihole dia wɔladi efula. Dui tshɛ kongɛma dimɛna mbidja ndo mbalasa ya kalasa ndo mvudu ya ndala, l’oyango wa sho ndjasha tshɛ lo wekelo ndo lo wadielo.” Csaba, lele ombetsha ɔmɔtshi la Hongrie ekɔ la lowando l’efula l’ɔtɛ wa waaso waki lawɔ wa ndɛ kaamɛ l’ambeki. Nde mbutaka dia lo tena dia ngasɔ, “ambeki tɔkɔndɔlɛka awui wakahomana lawɔ. Lo yoho shɔ, takeyaka ambeki dimɛna dimɛna. Ndo etombelo wakonge la dui sɔ ele, takakoke nyomoleka mbɔtɔnganyiya wetshelo la ehomba awɔ.”

 Ambeki ndo embetsha mbɔsaka mbalasa ya kalasa yambɔlɔngɔsɔma dimɛna shɔ oko woshasha w’oma le ‘Ombetsha wa Woke’ Jehowa. (Isaya 30:20, 21) Kadiyɛso kɛmɔtshi ka la Philippines kakɔtɔ EER lo luudu lɔmɔtshi lakawayokonya mbalasa ka kalasa akate ate: “Dihole dia kalasa diakiso diakatoholaka dia sho komonga tsho ambeki koko takikɔ angɛndangɛnda wa Jehowa wa laande. Nde nangaka dia sho ngɛnangɛna etena kekaso Ɔtɛkɛka ande dimɛna dimɛna.”

 Mbalasa ya kalasa koka mbikama, nɔngɔsɔma ndo kokakamɛ dimɛna l’ɔtɛ wa weshasha anyu wele efula ka l’atei awɔ kimɔmaka oma lo tshimbo ya donate.pr418.com. Losaka efula lo lokaho lanyu.