Seth * mbutaka ate: “Dimi la wadɛmi takashisha elimu aso mbala kakɔ ɔtɔi. L’edja k’ɛnɔnyi ehende, takasɛnaka diɛsɛ la ekimanyielo k’ase nkumbo ndo oma lo tolimulimu takatasalaka. Etombelo waki la dui sɔ ele, wadɛmi Priscilla akayongaka la ɔkɔmwɛlɔ ndo dimi lakayoyaokaka oko onto l’anyanya.

Ngande wakawatondoya dikambo sɔ? Priscilla akohɔka ɛtɛkɛta waki Yeso watanema lo Mateo 6:34. Nde akate dia hatohombe ndjakiyanya dikambo dia loyi, nɛ dia lushi la lushi lekɔ la ekakatanu alɔ. Dɔmbɛlɔ diande di’oma k’ɛse otema diakawosha wolo wa ntetemala mbikikɛ. Dimi lo wedi ami, Osambu 55:22 akankeketsha. L’ɛnyɛlɔ k’omembi w’esambo, lakakitsha wotsho ami le Jehowa ndo lakɛnyi dia nde akansukɛ. Kaanga mbele laya la olimu nshi nyɛ, sho namaka lɔsɛnɔ laso ɔsɛlɛngɛ lo yoho yɔtɔnɛ la dako diaki Yeso diatanema lo Mateo 6:20-22. Laadiko dia laasɔ, tamboyasukanya la Nzambi ndo taya la diɔtɔnganelo dia ma ma lam’asaso.”

Jonathan mbutaka ate: “Laki la wɔma lo dikambo dia nshi y’otsha la ntondo etena kakatakɔ lo okanda aso. L’ɔtɛ w’ekakatanu wendana l’ekondjelo, olimu wa wolo wakatakambe l’edja k’ɛnɔnyi 20 wakonge anyanya. Dimi la wadɛmi takayotatɛka mana l’ɔtɛ wa falanga. Taki la wɔma wa nsomba diangɔ la kartɛ kaso ka lo kɔmpanyi la wɔma w’ɔnɛ hatetawɔma.

Koko Ɔtɛkɛta waki Nzambi ndo nyuma kande kakatokimanyiya dia mbɔsa tɛdikɔ t’eshika. Laketawɔ woho w’olimu tshɛ ndo takayanganya la adepasɛ tshɛ wele bu ohomba. Oko weso Ɛmɛnyi wa Jehowa, takakondja nto osukɔ oma le asekaso ambetawudi. Vɔ wakatokimanyiya lo woho wakatayaɔsaka ndo wakatosha ekimanyielo ka shikaa lo tena dia paa.”

Raquel mbutaka ate: “Etena kakandawɔ omɛmi la shashimoya, laki la lonyangu ndo la nkɛlɛ. Ndo lakadiɛnɛ la ekiyanu. Koko lakayasukanya la Nzambi ndo nde akankeketsha. Wɔladi wa Nzambi wakakokɛ otema ami etena kakamayaɛkɛka le nde lushi la lushi lo dɔmbɛlɔ. Le mi, ekɔ oko nde akakɔnɔla otema ami wakaatɛ.

Ndo diɛsɛ la Ɔtɛkɛta ande Bible, lakanya nkɛlɛ ndo tokumbɛkumbɛ. Lakakambe la ɛtɛkɛta waki ɔpɔstɔlɔ Pɔɔlɔ watanema lo Rɔmɔ 12:21 wata ɔnɛ: ‘Tɔlɛndjamake la akambo wa kɔlɔ, koko otetemale nɛndja akambo wa kɔlɔ lo nsala ɔlɔlɔ.’

Ɔngɛnyi ami w’oshika akankimanyiya dia dimi mɛna ohomba wa ntshɔ otsha la ntondo. Nde akambadiyɛ Undaki 3:6 ndo la ngandji tshɛ, nde akambutɛ dia ekɔ tena dimɔtshi diahombaso ‘nshisha.’ Akikɔ dako dia wolo koko diɔ mbakimi l’ohomba. Kakianɛ laya l’eyango ekina lo lɔsɛnɔ.”

Elizabeth mbutaka ate: “Naka diwala di’onto diambovɔ, kete nde ekɔ l’ohomba w’osukɔ. Laki la ɔngɛnyi ami w’oshika wakansukɛka lushi la lushi. Nde akalelaka la mi, akansambe ndo akankimanyiya dia dimi ndjaoka dia lekɔ lo nangema koko aha ɔnɛ lambɔsɛkama. Lekɔ l’eshikikelo dia Jehowa akakambe la nde dia nkɔnɔla mpota yami ya lo tokanyi.”

Luis lakatatɛkɛtshi diande lo sawo dia ntondo dia lo asawo anɛ aki la hemɔ ka wolo ndo nde akahande mvɔ mbala hiende y’etondo. Nshi nyɛ nde mongaka la ohomba wa ɛkɔdi wawosha hiɛlɛlɛ l’edja ka wenya 16 lo lushi dia nde mpɛnga. Nde mbutaka ate: “Dimi nɔmbaka Jehowa mbala la mbala. L’ɔkɔngɔ wa dimi nɔmba Nzambi, dimi ndjaokaka dia nyuma kande kambombisha wolo. Dɔmbɛlɔ mbishakami dihonga dia ntetemala mbikikɛ nɛ dia lekɔ la mbetawɔ le nde ndo dimi mbeyaka dia nde kokɛkami.”

Petra laya l’ɛnɔnyi 80 l’ɛmɔtshi mbutaka ate: “Dimi nangaka nsala akambo efula koko laya keema l’akoka. Woho wambokitakita wolo ami ekɔ dui dia wolo efula. Laya la ɔkɔmwɛlɔ ndo lushi tshɛ aya paka dimi nnɔ okanga. Dimi kanyiyaka mbala la mbala woho wakalɔmbɛ Yeso She dia nde mbonyɛ ohemba ɔmɔtshi wa wolo naka kokaka. Koko  Jehowa akasha Yeso wolo ndo nde akankeketsha ndo dimi. Dɔmbɛlɔ ekɔ okanga ami wa lushi la lushi. Dimi ndjaokaka dimɛna naka lambosawola la Nzambi.”​—Mateo 26:39.

Julian lakadiɛnɛka la hemɔ ka wolo ka l’emunyi l’edja k’ɛnɔnyi oko 30, ndjaokaka woho akɔ waamɛ. Nde mbutaka ate: “Lakengɔnya kɔsa kami k’etshimbi la kɔsa ka dikuse. Koko lɔsɛnɔ lami lekɔ la nɛmɔ nɛ dia lakalikimɔ dia kambɛ anto akina. Dui sɔ koka ntutsha asui ndo Jehowa tetemalaka nama daka diande dia tokeketsha lo etena keso l’ohomba. L’ɛnyɛlɔ k’ɔpɔstɔlɔ Pɔɔlɔ, dimi koka mbuta l’eshikikelo tshɛ ɔnɛ: ‘Lo akambo tshɛ, dimi lekɔ la wolo oma le Ɔnɛ latokeketshaka.’”—Filipɛ 4:13.

Antonio mbutaka ate: “Etena kakavu papa lo aksida wa mutuka, dimi kokoka mbetawɔ dui sɔ mbala kakɔ ɔtɔi.” Lakate nte: “Ɔsɔ wamboodiaka l’okonda, nde akana mbetetaka paka l’ekolo. Koko ndooko kakamakoke nsala. Nde aki lo kɔma l’edja ka nshi tshanu la ntondo ka nde ndjovɔ. Lo yɛdikɔ mɔtshi lakatshikaka ndela etena kakimi la le mama, ko naka laya dimɛ, ko dimi ntondɔ la delo. Lakayambolaka nte: ‘Lande na? Lande na?’

Lo nshi ya paa shɔ, lakatetemala nɔmba Jehowa dia nde kimanyiyami dia dimi mbikikɛ kandji kaki la mi ndo dia nde mbishami wɔladi. Yema yema lakatatɛ nkondja wɔladi. Lakohɔka dia Bible mbutaka dia ‘tena dia shashimoya’ koka nkomɛ onto tshɛ. Lam’ele Nzambi hakoke mbutaka kashi, lekɔ l’eshikikelo dia layɛnana la papa nto lo eolwelo.”​—Undaki 9:11; Joani 11:25; Tito 1:2.

Robert lakatatɛkɛtshi diande lo sawo dia ntondo akakanyiyaka woho akɔ waamɛ. Nde mbutaka ate: “Dimi la wadɛmi takonge la wɔladi wa lo yimba watɛkɛtama lo Filipɛ 4:6, 7. Takonge la wɔ diɛsɛ l’alɔmbɛso aso otsha le Jehowa. Wɔladi wa l’etei k’otema ɔsɔ akatokimanyiya dia mbitɛ tojurnalistɛ elongamelo kaso ka eolwelo. Kaanga mbele aksida wakasale aviyɔ akadiake ɔnaso la pami, tekɔ lo ntetemala mbohɔ tena di’ɔngɛnɔngɛnɔ diakatetshaka kaamɛ la nde. Sho salaka la wolo dia nkana lomba lo tena sɔ.

Etena kakatotɛka asekaso Ɛmɛnyi dia vɔ wakɛnyi woho wakatalembetshiyaka mbetawɔ kaso la lotutsha tshɛ lo televiziɔ, sho mbatɛka ɔnɛ kɛsɔ tshɛ akasalema diɛsɛ la efula k’alɔmbɛlɔ wakasalema lo dikambo diaso. Dimi mɛtɛ mbetawɔka dia Jehowa akatosukɛ lo tshimbo ya nyemba ya mesajɛ w’esambelo wakawatotomɛka.”

Oko wɛnya bɛnyɛlɔ nɛ tshɛ, Nzambi koka nsamba anto wahomana la ekakatanu ndo ehemba wotshikitanyi. Ko kayotota dikambo diayɛ? Oyadi okakatanu akɔna wakoka mpomana la yɛ lo lɔsɛnɔ, wɛ koka nkondja esambelo kayokokimanyiya dia ntondoya tena dia wolo. * Ko lande na kahayayange ekimanyielo oma le Jehowa? Nde ekɔ “Nzambi k’esambelo tshɛ.”​—2 Kɔrɛtɔ 1:3.