Lakotɔ l’osomba wa Ciudad Mante, ɛtshi ka nkɛtɛ ka dimɛna efula ka la Tamaulipas la Mexique. Anto wadjasɛ l’osomba ɔsɔ lo tshɛ kawɔ wekɔ anto wele la lokaho ndo ɛlɔlɔ. Koko ndjaka ndo kɔlɔ mbuta, ɛtshi ka nkɛtɛ kɛsɔ kakayonga waale efula l’ɔtɛ w’awui amɔtshi wa kɔlɔ wakasalema.

Dimi laki ɔna la hende lo apami anɛi wakatotɔ. Ambutshi ami wankabatiza lo ɔtɛmwɛlɔ w’aseka Mupɛ ndo l’ɔkɔngɔ diko, lakayongaka onto ɔmɔtshi la lo kɔralɛ lo parwasɛ. Lakalangaka ngɛnyangɛnya Nzambi nɛ dia lakokaka wɔma wa tolomboshama ndo totshumbama l’ifɛrnɔ pondjo pondjo.

Etena kakimi la ɛnɔnyi etanu papa akavu. Dui sɔ diakambisha kandji k’efula ndo diakatshike otema ami la lɔkɔnyɔ. Dimi kokoka nshihodia lande na kakandatotshike etena kele takolangaka efula. Mama akahombaka mimɔ oma la ngelo ko tokamba wenya efula dia nkotsha ehomba w’apami anɛi wakiso.

Lakakambe la diaaso sɔ ndo lakalawɔ kalasa tonga kaamɛ l’ana akina w’epalanga. Vɔ wakambetsha woho wa ntondja ɛtɛkɛta wa kɔlɔ, nnɔ mfɔka, mbiva ndo woho wa ndɔ ta di’akɔfi. Lam’ele lakalangaka mbahemɛ anto akina, lakeke bɔksɛ, woho wa mimbana emuse, karate ndo woho wa nkamba la dihomɔ dia ta. Lakayokoma ɔlɔngɔlɔngɔ wa ngala. Tena dimɔtshi, lakayashaka lo ata wa la ekoma ndo mbala efula lakatombaka akila ndo lakatshikalaka l’asa eko la nyɔi lo shinga. Ande kandji kakamasha mama etena kakandatane lo yoho shɔ ndo kakandambɔshi dia ntshɔ la mi lo lopitadi aha esadi eto lee!

Etena kakimi l’ɛnɔnyi 16, Jorge osekami la lo dikɛnda akaye dia ndjotenda lakaso. Nde akatotɛ dia nde ekɔ Ɔmɛnyi wa Jehowa ndo nde nangaka nkahana la so losango lɔmɔtshi l’ohomba. Nde akatatɛ la tolembetshiya waetawɔ ande lo nkamba la Bible. Awui wakandatadiyɛ ekɔ awui wele talawaokaka ndo lakangɛnangɛna dia mbeya lokombo l’oshika laki Nzambi ndo asangwelo ande. Jorge akatɔlɔmbɛ dia sho mbeka la nde Bible, ndo taketawɔ.

Lakakeketshama efula dia mbeya mɛtɛ lo dikambo dia ifɛrnɔ ɔnɛ wetshelo ɔsɔ hatumbi oma lo Bible. (Osambu 146:4; Undaki 9:5) Etena kakameke dui sɔ, dimi kondjonga nto la wɔma wa kɔlɔ wa Nzambi.  Koko, lakatatɛ mbɔsa oko Ombutshi wa ngandji walanga kɛnɛ koleki dimɛna le anande.

Lakatatɛ mpama lo wekelo ami wa Bible ndo lakɛnyi ohomba watshikitanya lonto lami. Lakahombe monga l’okitshakitsha ndo ntshika awui wa ngala. Dako diatanema lo 1 Kɔrɛtɔ 15:33 diakankimanyiya. Diɔ mbutaka ɔnɛ: “Lɔngɛnyi la kɔlɔ ndanyaka mbekelo y’ɛlɔlɔ” kana “ndanyaka lɔkɛwɔ l’ɔlɔlɔ” oko wata nɔtɛ ka lo Bible ka lo Angɛlɛ kambovusɔma. Lakashihodia dia naka dimi nangaka ntshikitanya lonto lami kete dimi pombaka mpembola lɔngɛnyi l’anto waki la shɛngiya ya kɔlɔ le mi. Diakɔ diele, lakahɛnya angɛnyi ami w’edjedja l’ase etshumanelo ka mɛtɛ k’Akristo, wanɛ washidiya awui awɔ aha la nkɛlɛ kana la ngala, koko lo nkamba l’atɔndɔ wa lo Bible.

Avɛsa akina wa lo Afundelo waki la shɛngiya le mi ko Rɔmɔ 12:17-19. Avɛsa asɔ mbutaka ɔnɛ: “Tanyokaloyake kɔlɔ lo kɔlɔ. . . . Naka kokaka, lo yɛdikɔ yakokanyu nsala, nyodjasɛ l’anto tshɛ ki. . . . tanyɔsɔmbɔyake nyuamɛ, . . . nɛ dia akafundama ɔnɛ: ‘Nsɔmbɔya ekɔ dikambo diami. Dimi kayɔsɔmbɔya, mbata Jehowa.’” Lakayetawɔka dia Jehowa ayodja yimba lo awui wa wɛngiya lo yoho ndo lo etena kalangande. Yema yema lakayotshikaka lɔsɛnɔ lami la ngala.

Hambohɛki pondjo kɛnɛ kakete la dikɔlɔ dimɔtshi etena kakamayakalolaka oya la ngelo. Olui ɔmɔtshi w’ɛlɔngɔlɔngɔ wa dengalenga w’oma l’olui wakalɔshanaka la so ntondo wakandɔsha ndo owandji awɔ akasokola l’ɔkɔngɔ ambutɛ ate: “Oyakokɛka!” Lo etena kɛsɔ lakasale dɔmbɛlɔ dia lo tshena pe le Jehowa, lo mbɔlɔmba dia nde kimanyiyami dia mbikikɛ esolanyi. Kaanga mbele lakikɔ la wolo efula dia nsɔmbɔya, lakayakimɛ diaha nsala dui sɔ. La wedi a pindju lakayohomanaka l’owandji awɔ ndamɛ. Lakoke kɛlɛ k’efula ndo lakalange nsɔmbɔya, lakalɔmbɛ Jehowa nto l’otema dia nde kimanyiyami dia dimi ndjakimɛ. Dui dia diambo ko, ɔlɔngɔlɔngɔ ɔsɔ akaye le mi aha la ntshimbatshimba ndo akambutɛ ate: “Odimanyiya lo kɛnɛ kakete l’otsho wa loyi. Kɛnɛ kele mɛtɛ ele, dimi nangaka nkoma oko wɛ. Dimi nangaka mbeka Bible.” Ande ɔngɛnɔngɛnɔ waki la mi lo woho wakamayakimɛ lee! Diɛsɛ la dui sɔ nde la wɔ akatatɛ mbeka Bible.

Lonyangu ko, ase nkumbo kami akina kotetemala mbeka Bible lo etena kɛsɔ. Koko lakɔshi yɛdikɔ ya shikaa dia ntetemala mbeka ndo dimi kombetawɔ di’onto kana ɛngɔ kɛmɔtshi nshimbami nsala dui sɔ. Lakeye dia sanganaka l’ekambi waki Nzambi mbala la mbala mbayɔkɔnɔla mpota yami ya lo yimba ndo mbishami nkumbo kakimi la tɔ ohomba. Lakatetemala mpama ndo lo 1991, lakabatizama dia monga Ɔmɛnyi wa Jehowa.

Lakikɔ otema wolo, lakahemɛka anto akina ndo laki ngala. Koko Ɔtɛkɛta wa Nzambi wakatshikitanya lɔsɛnɔ lami tshɛ lo tshɛ. Kakianɛ, lekɔ lo nsambisha onto tshɛ lahokamɛ losango la lo Bible la wɔladi. Laki la diɛsɛ dia nkamba oko okambi wa lo tena tshɛ lo ɛnɔnyi 23 wetshi.

Lo etena kɛmɔtshi, lakayakimɔ la lolango dia nkamba lo Bɛtɛlɛ k’Ɛmɛnyi wa Jehowa ka la Mexique. Etena kakimi lɛkɔ, lakahomana la Claudia, osekaseka w’Okristo waki l’ohetoheto efula ndo takatshukana lo 1999. Lekɔ mɛtɛ la lowando le Jehowa lo woho wakandatshɔkola dia ntana olonganyi wele la kɔlamelo ɔsɔ.

Takakambe kaamɛ lo etshumanelo ka l’Ɔtɛkɛta w’akanga a mpoke ka la Mexique dia nkimanyiya akanga a mpoke dia vɔ mbeka akambo wendana la Jehowa. Oma laasɔ, wakatɔlɔmbɛ dia sho ntshɔ otsha la Bélize dia tetsha anto wa lo wodja ɔsɔ Bible. Kaanga mbele lɔsɛnɔ laso lekɔ ɔsɛlɛngɛ, tekɔ la kɛnɛ tshɛ kele la so ohomba dia monga l’ɔngɛnɔngɛnɔ. Hatotolitshikitanya l’ɔtɛ wa dui dimɔtshi.

L’edjedja ka wonya, mama akayotetemala mbeka Bible ndo akabatizama. Ndo nto, enondo ami la pami, wadɛnde ndo anawɔ, waya Ɛmɛnyi wa Jehowa. Angɛnyi ami amɔtshi w’edjedja wakamasambisha losango la Diolelo wokambɛ Jehowa ndo vɔ.

Lonyangu ko, ase nkumbo kami amɔtshi wakavu nɛ dia vɔ kotshika awui wa ngala. Otondongaka lakatetemala ndjela lokolo lawɔ, tshike ondo lambovɔka oko vɔ. Lekɔ la lowando lo woho wakankotola Jehowa oya le nde ndo oya le atɛmɔdi ande, wele la solo dia lotutsha ndo l’ɔlɔlɔ tshɛ, wakambetsha dia nkamba l’atɔndɔ wa lo Bible lo lɔsɛnɔ lami.