Ɔpɔstɔlɔ Pɔɔlɔ akate dia Jehowa * ekɔ “Nzambi k’esambelo tshɛ, ɔnɛ latosamba lo asui aso tshɛ.” (2 Kɔrɛtɔ 1:3, 4) Diakɔ diatoshikikɛ Bible dia ndooko onto lakoka mbisha ekimanyielo ko ndeka Nzambi ndo ndooko mpokoso kakoka monga woke kahakoke Shɛso lele l’olongo tosamba.

Lo mɛtɛ, sho pombaka nsala dui dimɔtshi naka sho nangaka dia Nzambi tosamba. Ngande wakoka dɔkɔtɛlɛ tokimanyiya naka hatɔshi ekongelo dia tɛnana la nde? Omvutshi Amɔsɛ akambola ate: ‘Onde anto 2 wayɔkɛndakɛnda kaamɛ aha la vɔ tookanyi dia mpomana?’ (Amose 3:3) Afundelo tokeketshaka ɔnɛ: “Nyoyasukanya la Nzambi, ko nde ayoyasukanya la nyu.”​—Jakɔba 4:8.

Ngande wakokaso monga l’eshikelo ɔnɛ Nzambi ayoyasukanya la so? Nɛ dia ntondotondo, ndamɛ totɛka mbala la mbala dia nde nangaka tokimanyiya ( Enda kiombo.) Ɔkɔkɔ wa hende ele, tekɔ la tolembetelo ta shikaa t’oma le anto wakasambema oma le Nzambi, mbuta ate anto wa mɛtɛ mɛtɛ oyadi wa lo nshi yaso nyɛ kana wa lo nshi yakete.

L’ɛnyɛlɔ k’anto efula wayanga ekimanyielo oma le Nzambi ɛlɔ kɛnɛ, nkumekanga Davidɛ nde la wɔ akahomanaka la mpokoso. Mbala kɛmɔtshi, nde akalɔmbɛ Jehowa ate: ‘Ohokame ɛsɛngɔsɛngɔ wakolelɛmi dia nyanga ekimanyielo.’ Onde Nzambi akookadimola? Eelo. Davidɛ akakotsha ate: ‘Dimi lakalongola ekimanyielo kande, ko otema ami wambɔngɛnangɛna.’​—Osambu 28:2, 7.

Nzambi akakongɛ dia Yeso monga l’ɔkɛndɛ w’ohomba lo osambelo w’anto. L’atei w’ɛkɛndɛ ekina wakawosha Nzambi, Yeso akahombe ndo ‘mɔmba mpota ya wanɛ wele la etema wambatɛ’ ndo ‘nsamba wanɛ tshɛ walela.’ (Isaya 61:1, 2) Oko wakadiatatami, Yeso akayasha lo yoho ya laande le wanɛ waki la ‘paa ndo waki la wetsho.’​—Mateo 11:28-30.

Yeso akasambe anto lo mbasha alako w’eshika, lo mbasalɛ akambo la ɔlɔlɔ tshɛ ndo lo tena dimɔtshi nde akakome polo ndo lo nkɔnɔla hemɔ yawɔ. Lushi lɔmɔtshi kanga sudi ɔmɔtshi akasɛngasɛnga Yeso ate: “Ɔkɔnɔlɛ naka wɛ alanga.” Yeso akawoke kɛtshi ndo akokadimola ate: “Dimi nangaka, ɔkɔnɔ.” (Makɔ 1:40, 41) Ko kanga sudi akakɔnɔ.

 Ɛlɔ kɛnɛ, Ɔna Nzambi bu lanɛ la nkɛtɛ dia tosamba l’onto ndo l’onto. Koko Jehowa She, “Nzambi k’esambelo tshɛ” tetemalaka nkimanyiya wanɛ wele lo dihombo. (2 Kɔrɛtɔ 1:3) Tɔsɛdingole toho tɔnɛi takamba la Nzambi dia nsamba anto.

• Bible. “Akambo tshɛ wakafundama lo nshi y’edjedja wakafundama dia tosha wetshelo, dia oma lo ekikelo kaso ndo oma lo esambelo k’oma lo Afundelo, sho monga la elongamelo.”​—Rɔmɔ 15:4.

• Nyuma k’ekila kaki Nzambi. Yema tshitshɛ l’ɔkɔngɔ wa nyɔi ka Yeso, etshumanelo k’Akristo k’otondo kakonge lo etena ka wɔladi. Lande na? Nɛ dia tɔ “kakakɛndakɛndaka lo wɔma wa Jehowa ndo lo esambelo k’oma le nyuma k’ekila.” (Etsha 9:31) Nyuma k’ekila, mbuta ate wolo waki Nzambi wakamba la nde olimu, kekɔ la wolo wa mamba. Nzambi koka nkamba la tɔ dia nsamba onto tshɛ lo diaaso tshɛ.

• Dɔmbɛlɔ. Bible tokeketshaka ɔnɛ: “Lo oseka dikambo tshɛ, tanyoyakiyanyake.” Lo dihole dia sho ndjakiyanya, Bible totɛka ɔnɛ: “Koko nyote Nzambi ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka, ko wɔladi wa Nzambi woleki tokanyi tshɛ wayolama etema anyu la timba tanyu.”​—Filipɛ 4:6, 7.

• Asekaso Akristo koka monga angɛnyi wa mɛtɛ wayaɛkɛso le wɔ dia vɔ tosamba etena kahomanaso l’okakatanu. Ɔpɔstɔlɔ Pɔɔlɔ akɔsaka asekande oko “kiɔkɔ ya ekeketshelo k’efula” lo tena dia ‘asui ndo lo ɛhɛnyɔhɛnyɔ’​—Kɔlɔsayi 4:11; 1 Tɛsalɔnika 3:7.

Koko wɛ koka ndjakiyanya lo woho wakoka awui asɔ tshɛ salema. Ɛsɔ tɔsɛdingole dimɛna kɛnɛ kakakomɛ anto wɔtɛkɛtami lo sawo dia ntondo wakahomana l’ekakatanu. L’ɛnyɛlɔ kawɔ, wɛ koka nshihodia dia Nzambi ekɔ lo ntetemala nkotsha daka diande diananda otema nɛ: ‘Oko watosambaka mama ɔnande, dimi layotetemala nyosamba.’​—Isaya 66:13.