Onde wɛ mbohɔka woho wakayakɔ la nkɛtɛ etena kakiyɛ eke dikɛnda? Mbeyaka monga ko wɛ akahomɔ lo lonya kana lo dwe. Onde wɛ mbohɔka woho wakakosambe mama kayɛ? Ondo nde akakosole mpota ko mɔmba dihɔndɔ laawɔ. Wɛ akalele, koko ɛtɛkɛta ande w’esambelo ndo woho wakandakokumbatɛ la waasaso akakokimanyiya dia ndjaoka dimɛna esadi eto. Lo nshi yakiyɛ dikɛnda shɔ, wɛ akatanaka esambelo aha l’okakatanu.

Koko etena katatonge epalanga, lɔsɛnɔ talekaka monga edika w’edika. Akambo talekaka monga wolo ndo mongaka wolo efula ntana esambelo. Mbishaka kandji dia nkɔndɔla ekakatanu wahomana la epalanga ndo vɔ hawokoke kandɔma la dihɔndɔ ndo la okumbatelo w’ombutshi wa womoto. Tɔsɛdingole bɛnyɛlɔ dimɔtshi.

• Onde wɛ ambongaka la lonyangu l’efula l’ɔtɛ wakayashisha olimu? Julian mbutaka dia etena kakawawonya oma l’olimu, dui sɔ diakawosha okiyanu w’efula. Nde akayambola ate: ‘Ngande wayomokotsha ehomba wa nkumbo kami? L’ɔkɔngɔ wa dimi nkamba olimu w’efula l’edja k’ɛnɔnyi, lande na kambota kɔpanyi dia dimi laya bu ohomba?’

• Mbeyaka monga ko wɛ ekɔ lo ndjakiyanya l’ɔtɛ wambovɔ diwala diayɛ. Raquel mbutaka ate: “Ambeta oko ngɔndɔ 18, etena kakandawɔ omɛmi mbala kakɔ ɔtɔi, lakandama la lonyangu l’efula. Lakoke oko otema ami wambatɛ l’ahende. Laki la paa lo demba ndo lo tokanyi. Dui sɔ diakambisha wɔma.”

• Mbeyaka monga ko wɛ ekɔ la hemɔ ka wolo kahayalongamɛ dia kayɔkɔnɔ. Lo tena dimɔtshi, wɛ mbeyaka ndjaoka oko wakayaoke Jɔbɔ laki owandji wa nkumbo lakate ate: “Dimi lambuhetsha lumu lami, halangi numba pundju.” (Jobo 7:16) Ondo wɛ ekɔ lo ndjaoka oko Luis, pami kaya l’ɛnɔnyi 80 l’ɛmɔtshi kakate ate: “Tena dimɔtshi, dimi ndjaokaka dia lokongaka paka nyɔi.”

• Mbeyaka monga ko l’ɔtɛ wa nyɔi ka lakiyɛ la ngandji, wɛ ekɔ l’ohomba w’esambelo. Robert mbutaka ate: “Etena kakavu ɔnami la pami lo aviyɔ wakasale aksida, dimi kombetawɔ ntondo. Oma laasɔ lakonge la kandji, kandji kata Bible konga l’onto lambokama lokuwa la ta l’otale.”—Luka 2:35.

Robert, Luis, Raquel ndo Julian wakatane esambelo kaanga lo tena sɔ diakiwɔ la lɔkɔnyɔ. Vɔ wakakondja Onto loleki ɔlɔlɔ lakawashatɔ, mbuta ate Nzambi Kanga-Wolo-Tshɛ. Ngande wakandaasambe? Onde nde ayokosha ndo wɛ esambelo keyɛ la tɔ ohomba?