KANYI YA BIBLE LO KƐNƐ KENDANA LA
Otondjelo wa diemi
Ɔnɔnyi tshɛ miliyɔ akumi ya waemi wekɔ lo tondjama la lolango ndo lofulo lɔsɔ ndeka lofulo l’anto wa lo wedja efula.
Onde yɛdikɔ y’onto ndamɛ, ko kana dui diendana la lɔkɛwɔ?
KƐNƐ KATA ANTO
Womoto latondja diemi salaka dikambo sɔ l’ɔtɛ w’ɛkɔkɔ wotshikitanyi, ɛnyɛlɔ naka ekondjelo kaya wolo, ekakatanu wa lo nkumbo, nsaki ka ntetemala la kalasa ya laadiko, dia nkamba olimu kana dia mbewɔ ndjodia ɔna ndamɛ. Anto akina mbɔsaka dia ntondja diemi ekɔ kɔlɔ, mbuta ate ɔsɔ ekɔ mfukutanya kɛnɛ kalongamɛwɔ oma le womoto lele la diemi.
KƐNƐ KATA BIBLE
Le Nzambi lɔsɛnɔ, djekoleko l’onto lekɔ ekila. (Etatelo 9:6; Osambo 36:9) Tɔndɔ sɔ mendanaka ndo la ɔna leke lo dikundju, dihole di’ekokelo diakalɔngɔsɔlɛ Nzambi ɔna lakayakengama. Ofundji wa Bible ɔmɔtshi akafunde ɔnɛ: “Wɛ akambishɛ lo dikundju dia mama.” Nde akakotsha ate: “Washo ayɛ wakamɛnyi kaanga lam’akimi eholoko; tenyi diatɔ tshɛ diakafundama lo dibuku diayɛ lo dikambo dia nshi yakamakengama.”—Osambo 139:13, 16.
Ɛlɛmbɛ wakadjangɛ Nzambi ase Isariyɛlɛ ndo nkum’otema kakandatosha mɛnyaka kanyi yande lo kɛnɛ kendana la lɔsɛnɔ la ɔna lahatotɔ. Ɛlɛmbɛ wakataka ɔnɛ onto lakɔmɔla womoto lele la diemi ko ndjaka ɔna laha totɔ akahombaka nongola dilanya dia nyɔi, mbuta ate mbodiaka dia lɔsɛnɔ lande mfuta lɔsɛnɔ l’onto lamondodiaka. (Etombelo 21:22, 23) Koko, shushi akahombaka mbidja yimba lo eyango wakatshutshuyisha onto ndo lo diaaso diakasalemi dikambo sɔ.—Walelo 35:22-24, 31.
Ndo nto, anto wekɔ la nkum’otema. Etena kahokamɛ womoto nkum’otema kande kana dui diande dia l’etei lo nɛmiya lɔsɛnɔ l’ɔnande lahatotɔ, nkum’otema kande mbofutaka. * Naka nde ntona nkitanyiya nkum’otema kande, kete tɔ kayowɛnyaka paa kana kayowɛndjaka onongo. (Rɔmɔ 2:14, 15) Wekelo mɛnyaka dia wamato watondja waemi ndjafudiɛka ekiyanu la ɔkɔmwɛlɔ.
Ko naka akoka wa ndjodia ɔna bu, djekoleko naka wɛ hayalɔngɔsɔdi dia ntshɔ diemi, ahombayɛ nsala? Enda daka diaki Nzambi diasha eshikikelo le wanɛ wayela atɔndɔ ande la kɔlamelo tshɛ diata ɔnɛ: “Le kanga kɔlamelo, wɛ mbosalɛka akambo la kɔlamelo; le ɔnɛ [kana womoto] laha la onongo, wɛ mbosalɛka akambo lo yoho yaha la onongo.” (Osambo 18:25) Bible mbutaka nto ɔnɛ: “Nɛ dia Jehowa nangaka losembwe, ndo nde hatokalɛ ekambi ande wa kɔlamelo.”—Osambo 37:28.
“Nkum’otema kawɔ shikikɛka kaamɛ la wɔ ndo oma lo tokanyi tawɔ hita dia vɔ wekɔ lo manyema kana wekɔ lo nyindjama.”—Rɔmɔ 2:15.
Ko naka wɛ ambotondjaka diemi?
KƐNƐ KATA ANTO
Ruth, mama kɛmɔtshi koyadjase akate ate: “Etena kakimi l’ana asato, lakayoakaka dia dimi bu l’akoka wa mbodia ana anɛi. Koko l’ɔkɔngɔ wa dimi ntondja diemi, lakoke dia lambosala dui dia kɔlɔ efula.” * Ko onde nde akasale dui diele Nzambi hakoke dimanyiya?
KƐNƐ KATA BIBLE
Yeso Kristo akakɛnɛmɔla kanyi yaki Nzambi lo dikambo sɔ etena kakandate ɔnɛ: “Dimi lakaye dia ndjoyanga, aha anto w’ɛlɔlɔ, koko atshi wa pɛkato dia vɔ ndjatshumoya.” (Luka 5:32) Eelo, etena kayaɛndjaso onongo wa munga kakatasale, etena kayatshumoyaso ndo kalɔmbaso edimanyielo, nde salaka dui sɔ la lolango tshɛ oyadi lo pɛkato ya weke. (Isaya 1:18) Osambo 51:17 mbutaka ɔnɛ: “Otema wambatɛ ndo wambatshatshema, Nzambi le, wɛ hatotona.”
Laadiko wa nkum’otema ka pudipudi, Nzambi mbishaka wɔladi wa lo yimba etena kasala onto dɔmbɛlɔ l’okitshakitsha tshɛ. Filipɛ 4:6, 7 mbutaka ɔnɛ: “Nyote Nzambi ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka, ko wɔladi wa Nzambi woleki tokanyi tshɛ wayolama etema anyu la timba tanyu.” * L’ɔkɔngɔ wa nde mbeka Bible ndo diholɛ Nzambi otema, Ruth akakondja wɔladi wa l’etei k’otema ɔsɔ. Nde akeke dia Nzambi “ekɔ la edimanyielo ka mɛtɛ.”—Osambo 130:4.
“[Nzambi] kotosalɛ akambo lo ndjela pɛkato yaso, ndo nde kotofuta lo ndjela munga yaso.”—Osambo 103:10.
^ od. 8 Waale wakoka ndjonga le mama kana le ɔna hasha lotshungɔ la ntondja diemi. Naka aya wonya wa mbota ko atshukanyi pombaka nsɔna lam’asa lɔsɛnɔ laki mama ndo la ɔna, kete vɔ pombaka mbɔsa yɛdikɔ. Koko, lo wedja efula wamboshidimikɔ, ehamelo w’aseka enganga wambokimanyiya di’awui wa ngasɔ salemaka lo pai.
^ od. 12 Lokombo lakatshikitanyema.
^ od. 14 Elongamelo ka eolwelo koka nto nkimanyiya onto dia monga la wɔladi wa l’etei k’otema. Enda sawo diele l’ɔtɛ a dui ɔnɛ: “Ambola w’oma le ambadi” diele lo Tshoto y’Etangelo ya Ngɔndɔ ka nɛi 15, 2009 diatɛkɛta dia atɔndɔ wa lo Bible wendana la woho wakoka ndjolɔma ɔna lakavu la ntondo ka nde mbotɔ.
Enda ndo lo...
EKADIMWELO LO AMBOLA W’OMA LO BIBLE
Kakɔna kata Bible lo dikambo di’otondjelo wa diemi?
Etena kakɔna katatɛ lɔsɛnɔ l’onto? Onde Nzambi koka dimanyiya onto lambotondjaka diemi?
