ETENA kakɔdia onto ɔmɔtshi l’ɔngɛnɔngɛnɔ tshɛ, atoyosalaka? Ondo mbala efula wɛ lawɔ tɔlaka. Ondo ndo wɛ tongaka l’ɔngɛnɔngɛnɔ. Oyadi angɛnyi ayɛ kana anto wahayeye mbokɔdisha la wasaso tshɛ, dui sɔ kotshutshuyaka dia wɛ la wɔ mbɔla ndo dui sɔ mbishaka ɔngɛnɔngɛnɔ. Womoto ɔmɔtshi lelɛwɔ Magdalena akate ate: “Dɛwɔ dia Georg y’omɛmi aki la tɔɔla ta dimɛna efula. Etena kakatahomanyaka washo, lakayaokaka dimɛna ndo l’ekokelo.”

Tɔɔla ta l’otema ɔtɔi ekɔ djembetelo y’awui w’amɛna wele oko, ɔngɛnɔngɛnɔ ndo ɔlɔ. Sawo dimɔtshi dia lo Observer, mbuta ate jurnalɛ mɔtshi ya l’Ɛtɛrnɛtɛ ya tshunda dia La Société américaine de psychologie mɛnyaka dia “tɔɔla . . . ekɔ nsaki kaso ka lootɔ.” Sawo diakɔ mbutaka dia “kaanga ana w’ashashi wekɔ l’akoka wa nshihodia dimɛna tɔjɛstɛ ta l’elungi.” Diɔ mbutaka nto dia “anto haweye tsho losango l’ohomba lele l’edia ka tɔɔla, koko vɔ kambaka nto la dui sɔ dia ndowanya lɔkɛwɔ lawɔ.” *

Anyangiyangi wa lo kalasa y’adidi ya Harvard l’États-Unis wakasɛdingola dionga diele la ɛkɔnyi waya esombe ndo kɛnɛ kasalawɔ etena kendawɔ dungi dia wanɛ waasakɛ. Vɔ mbutaka dia etena kakɛnaka ɛkɔnyi waasaso w’efula, ekokelo, ndjasha ndo kɛtshi lo  dungi dia wanɛ wakaasakɛka, vɔ wakayaokaka dimɛna ndo alemba la timba tawɔ takasalanganaka. Vɔ kondjaokaka ngasɔ etena kakatonaka wanɛ wakaasakɛka nsawola la wɔ.

Etena kɔlayɛ, wɛmɛ ndjasalɛka ɔlɔlɔ. Wekelo ɛmɔtshi mɛnyaka dia tɔɔla tekɔ la wahɔ efula, ɛnyɛlɔ tɔ fudiaka wɛkamu, ɔngɛnɔngɛnɔ ndo kitshakitshaka ekiyanu. Onto lele ɛkɛlɛkɛlɛ hakondja wahɔ ɛsɔ.

Magdalena lakatatɛkɛtshi la diko akikɔ Ɔmɛnyi wa Jehowa etena kakalɔmaka Ta dia hende di’andja w’otondo. Nde akatomama l’ase nkumbo kande lo mpango ka lokanu ka la Ravensbrück l’Allemagne l’ɔtɛ wakawatone ndjela kɛnɛ kakate ase Nazi. Nde mbohɔka ate: “Tena dimɔtshi, alami wakatoshimbaka dia sho ntɛkɛta l’ase lokanu akina. Koko vɔ kotoshimba dia nsala tɔjɛstɛ lo dungi diaso. Etena kakamɛnaka tsho woho wakamɔnamɔnaka mama la kadiyɛmi, akankeketsha ndo akambisha wolo wa mbikikɛ.”

Mbeyaka monga ko wɛ ekɔ lo ndjaoka dia ekiyanu wa lo lɔsɛnɔ hawoleke kosha diaaso dia wɛ mbɔla. Koko ohɔ dia mbala efula, woho wayaoka onto ndjaka oma lo tokanyi. (Tokedi 15:15; Filipɛ 4:8, 9) Oyadi ayonga dui dia wolo, lande na kahayasale la wolo dia nkana yimba lo awui w’amɛna, washa ɔngɛnɔngɛnɔ etena tshɛ kahombama? * Wadielo wa Bible ndo dɔmbɛlɔ ambokimanyiya anto efula dia nsala ngasɔ. (Mateo 5:3; Filipɛ 4:6, 7) Tɔtɛkɛta tele oko “ɔngɛnɔngɛnɔ,” “ɔlɔ” ndo tɔtɛkɛta tokina tafɔna la tɔsɔ tanemaka mbala nkama lo Bible. Onde wɛ hakoke mbadiaka lɛkɛ ɔtɔi kana hiende lushi tshɛ? Wɛ la wɔ koka ndjokashimɔ ko ɔɔla mbala efula.

Ndo nto, tokongake dia paka anto akina kɔdia. Tatɛ la nsala dui sɔ ndo kotsha yema y’ɔngɛnɔngɛnɔ wa lo lushi le onto okina. Ɛna tɔɔla tayɛ woho wetɔ mɛtɛ, mbuta ate woshasha w’oma le Nzambi wakosha wɛmɛ ɔlɔ ndo wanɛ wɛna woho wɔlayɛ.