Dibuku dimɔtshi (Hope in the Age of Anxiety) mbutaka ɔnɛ: “ELONGAMELO . . . EKƆ DUI DI’OHOMBA DIA MONGA LA DIƆTƆNGANELO DIA DIMƐNA LA NZAMBI. Ndo ɔsɔ ekɔ yoho yoleki dimɛna ya ntondoya ɔkɔmwɛlɔ, ompoko ndo wɔma.”

Woho weso l’ohomba wa elongamelo mɛnyamaka lo Bible ndo tɔ tɔlɔmbaka dia sho mbewɔ elongamelo ka kashi. Osambo 146:3 mbutaka ɔnɛ: “Tanyoyaɛkɛke le ewandji kana le ɔna onto lahakoke mbela panda.” Lo dihole dia sho ndjaɛkɛ lo welo wadja ana w’anto dia toshimbɛ, sho mongaka akanga wa tomba lo ndjaɛkɛ le Otungi aso, ɔnɛ lele la wolo wa nkotsha alaka ande tshɛ. Kakɔna kakandatolake? Tɔsɛdingole alaka wayela anɛ:

AWUI WA KƆLƆ WAYOKOMƐ, WƆLADI WA PONDJO WAYONGA LE ANTO W’ƐLƆLƆ: Osambo 37:10, 11 mbutaka ɔnɛ: “Etena ka tshitshɛ keto kambotshikala, ko kanga kɔlɔ hatonga nto . . . Koko akanga wa memakana wayokita nkɛtɛ, ndo vɔ wayɔngɛnangɛnaka heyama la wɔladi w’efula.” Ndo divɛsa 29 kotshaka dia “anto w’ɛlɔlɔ . . . wayodjasɛka” la nkɛtɛ pondjo pondjo.

ATA WAYOKOMƐ: “Jehowa . . . ekɔ lo nkomiya ata lo nkɛtɛ k’otondo. Nde ambɔkɔla ota ndo ambohembola dikɔnga; nde ambotshumba pusupusu y’asɔlayi lo dja.”​—Osambo 46:8,  9.

HEMƆ, ASUI, NDO NYƆI HATOYALA NTO: “Luudu la dipɛma laki Nzambi laya kaamɛ la anto . . . Nde ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto.”​—Ɛnyɛlɔ 21:3, 4.

DIANGƆ DIA NDƐ DIAYONGA TSHAVUTSHAVU DIKAMBO DI’ONTO TSHƐ: “Mbo ya ndɛ yayoyala efula la nkɛtɛ; yɔ yayonga tshavutshavu lo tɔsɔdi t’akona.”​—Osambo 72:16.

PAKA LOWANDJI ƆTƆI MBAYƆLƆMBƆLAKA ANDJA W’OTONDO, MBUTA ATE DIOLELO DIA KRISTO: “Wakawosha [Yeso Kristo] lowandji, kɛnɛmɔ ndo diolelo, dia anto, wedja ndo elui w’ɛtɛkɛta tshɛ mbokambɛ. Lowandji lande lekɔ lowandji la pondjo lahateta ndo diolelo diande hadiotolanyema.”—Danyɛlɛ 7:14.

Ngande wakokaso monga l’eshikikelo lo alaka asɔ? Etena kakinde la nkɛtɛ, Yeso akɛnya hwe dia nde mbakasɔnama oko Nkumekanga. Nde akakɔnɔla ase hemɔ, akalesha ase wola ndo akolola anto wakavu. Kɛnɛ koleki ohomba ele wetshelo ande, nɛ dia vɔ wekɔ la atɔndɔ wayokimanyiya anto dia nsɛna kaamɛ pondjo pondjo lo wɔladi ndo lo kaamɛ. Ndo nto, Yeso akatewoyisha awui wayosalema lo nshi yayaye, mbidja ndo awui wayohomba mɛnya dia tekɔ lo nsɛna lo nshi y’ekomelo ka andja ɔnɛ.

Yeso akatewoyisha dia awui anɛ mbayɛnya dia tekɔ lo nsɛna lo nshi y’ekomelo, wɔladi ndo lotui tshitshi hatonga! L’atei wa djembetelo yakandewoya ya “ekomelo ka dikongɛ di’akambo” mbele ndo ata wa l’andja w’otondo, ndjala ya kasha, elando ndo adidimu wa nkɛtɛ wa weke. (Mateo 24:3, 7; Luka 21:10, 11; Ɛnyɛlɔ 6:3-8) Yeso akate nto ate: “Lam’ele ɛɔnywɛlɔ k’ɛlɛmbɛ kayofula, ngandji k’anto efula kayɔla.”​—Mateo 24:12.

Wɔlɛlɔ wa ngandji ɔsɔ mɛnamaka hwe lo toho efula, ndo ofundji okina wa Bible akatashikike la ntondo. Lo 2 Timɔte 3:1-5, sho mbadiaka dia “lo nshi y’ekomelo,” anto lo tshɛ kawɔ wayoyalanga, wayolanga falanga ndo ɛngɛnɔngɛnɔ. Vɔ wayonga akanga w’etako ndo w’ekonda. Nkumbo hayotonga la ngandji ka lam’asa ase nkumbo ndo ana hawotokitanyiya ambutshi. Lɔkɛwɔ la dungi pende l’ɛtɛmwɛlɔ layokita dikuma.

Akambo wa kɔlɔ asɔ shikikɛka dia andja ɔnɛ waya lo nshi yawɔ y’ekomelo. Vɔ shikikɛka nto dia wɔladi wayela ɛlɔmbwɛlɔ ka Diolelo waya suke. Lo mɛtɛ, Yeso akate ndo dia eshikikelo kayela kɛnɛ lo prɔfɛsiya kande kendana la nshi y’ekomelo ɔnɛ: “Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.”​—Mateo 24:14.

Lokumu l’ɔlɔlɔ lɔsɔ mbishaka akanga wa kɔlɔ ɔhɛmwɛlɔ ndo mbishaka anto w’ɛlɔlɔ elongamelo ndo mbashikikɛka dia ɛtshɔkɔ wakalakema wayokotshama keem’edja. Onde wɛ nangaka mbeya awui akina wendana l’ɛtshɔkɔ ɛsɔ? Naka ngasɔ, kete lam’alangayɛ fola lɛkɛ l’ekomelo la periodikɛ kɛnɛ.