ANTO NANGAKA DIA VƆ MBOKAMA NGANDJI. Ndooko diwala, nkumbo kana lɔngɛnyi lakoka ntetemala mpama naka ngandji bu. Ɔnkɔnɛ, mbokɛmaka dia ngandji ekɔ ohomba efula dia monga la yoonge ya dimɛna ndo ɔngɛnɔngɛnɔ. Ko, “ngandji” kɛdikɛdi na?

Ngandji katɛkɛtawɔ lanɛ hendana la ngandji ka lam’asa pami la womoto, koko ndo tɔ kekɔ ohomba. Koko tɔ kekɔ yoho ya ngandji yoleki ohomba yakonya onto dia ndjakiyanyaka efula lo dikambo di’anto akina, oyadi kaanga lo mbetsha wahɔ w’anto akina la ntondo ka wande. Ɔsɔ ekɔ ngandji kalɔmbɔma oma lo atɔndɔ waki Nzambi, koko tɔ mendanaka ndo la osalosalo ndo nsaki.

Elembetshielo wa dimɛna wendana la ngandji mbutaka ɔnɛ: “Ngandji ekɔ la solo dia lotutsha ndo ɔlɔlɔ. Ngandji bu la kandjema. Tɔ hayasɛmɛ, hayadiya, hasale akambo lo yoho ya fumbɔ nsɔnyi, hayange wahɔ ande hita, hoke nkɛlɛ esadi. Tɔ hadia akambo wa kɔlɔ wosalɛwɔ. Tɔ hangɛnangɛna lo akambo wa kɔlɔ, koko ngɛnangɛnaka lo mɛtɛ. Tɔ kukumɛka akambo tshɛ, . . . nongamɛka akambo tshɛ, mbikikɛka akambo tshɛ. Ngandji hakomɛ pondjo.”​—1 Kɔrɛtɔ 13:4-8.

Ngandji ka ngasɔ “hakomɛ pondjo” lo yoho nyɛ yele tɔ kayotshikalaka pondjo. Lo mɛtɛ, tɔ talekaka monga wolo edja tshɛ katete nshi. Ndo lam’ele tɔ kekɔ la solo dia lotutsha, ɔlɔlɔ ndo dimanyiyanaka, tɔ kekɔ “dimama dia kokele.” (Kɔlɔsayi 3:14) Ɔnkɔnɛ, diɔtɔnganelo diomamatanyi lo ngandji ka ngasɔ,  diekɔ wolo ndo mbishaka ɔngɛnɔngɛnɔ, oyadi wandja w’anto. Ɛnyɛlɔ, tɔsɛdingole dimama dia lo diwala.

Yeso Kristo aketsha atɔndɔ w’ohomba wa lo diwala. Ɛnyɛlɔ nde akate ate: “‘Pami ayotshika she la nyango ndo ayomamatana la wadɛnde, ko vɔ 2 wayoyala demba 1’ . . . Ɔnkɔnɛ, vɔ keema anto 2 nto, koko waya demba 1. Laasɔ, onto atokakitolake kɛnɛ kakamamatanya Nzambi.” (Mateo 19:5, 6) Oma lo avɛsa anɛ, tekɔ l’atɔndɔ amɔtshi ahende w’ohomba.

“VƆ 2 WAYOYALA DEMBA 1.” Diwala ekɔ dimama dia kaamɛ dioleki tshɛ diakoka anto monga la diɔ ndo ngandji mbakoka dikokɛ oma lo oshishelo wa kɔlamelo, mbuta ate diaha omi kana wadi monga “demba 1” kaamɛ l’onto okina lele bu omɛnde kana wadɛnde. (1 Kɔrɛtɔ 6:16; Hɛbɛru 13:4) Oshishelo wa kɔlamelo koka ndanya wɛkamu ndo ndjaka diwala. Naka wambota ana, kete dui sɔ koka mbasha paa k’efula, vɔ wayoyaoka oko hawolangema, wekɔ lo waale, ndo kaanga vɔ monga la tokumbɛkumbɛ.

“KƐNƐ KAKAMAMATANYA NZAMBI.” Diwala diekɔ nto dimama di’ekila. Atshukanyi walɛmiya dui sɔ salaka la wolo dia nkeketsha diwala diawɔ. Vɔ hawoyange tɛkɛ nɛndɛ dia ndjaka diwala etena katomba ekakatanu. Ngandji kawɔ kekɔ wolo ndo mbikikɛka. Ngandji ka ngasɔ “kukumɛka akambo tshɛ,” tɔ kambaka kaanga etena katomba ekakatanu l’oyango wa nkokɛ kaamɛ ka lo diwala ndo wɔladi.

Etena konga ambutshi la ngandji ka ndjahombia, ana tshɛ wa lo nkumbo kondjaka wahɔ efula. Osekaseka ɔmɔtshi welɛwɔ Jessica akate ate: “Papa la mama mɛtɛ mbokanaka ngandji ndo vɔ nɛmiyanaka lam’asawɔ. Etena kɛnami mama alɛmiya tɛdikɔ taki papa, djekoleko la ntondo kaso sho ana, dui sɔ tshutshuyakami dia dimi monga oko nde.”

Ngandji ekɔ dionga dia Nzambi dioleki woke. Lo mɛtɛ, Bible mbutaka ɔnɛ: “Nzambi ekɔ ngandji.” (1 Joani 4:8) Diakɔ diele keema dui dia diambo dia Jehowa mbelamɛ nto ɔnɛ: “Nzambi k’ɔngɛnɔngɛnɔ.” (1 Timɔte 1:11) Sho lawɔ nto koka monga l’ɔngɛnɔngɛnɔ etena kayotodja welo dia mbokoya waonga w’Otungi aso, djekoleko ngandji kande. Ɛfɛsɔ 5:1, 2 mbutaka ɔnɛ: “Nyokoyake Nzambi, oko wenyu anande wa ngandji, ndo nyotetemale nkɛndakɛnda lo ngandji.”