ANTO WAKATONGAMA LO YOHO YA LAANDE LO TOHO EFULA​—MBUTA ATE, SHO FUNDAKA, SANGAKA ASANGO, TONGAKA NDO SHO KANYIYAKA DIKAMBO DIA AMBOLA W’OHOMBA WA LO LƆSƐNƆ WELE OKO: Lande na kakatongama andja? Ngande wakatatongama? Oyango akɔna wele la lɔsɛnɔ? Kakɔna katokongɛ lo nshi yayaye?

Anto amɔtshi mbewɔka mboka ambola asɔ, vɔ fɔnyaka di’ekadimwelo awɔ wekɔ wolo. Akina mbutaka dia ambola asɔ bu ohomba nɛ dia lɔsɛnɔ lakahilɔ lohilɔ. William Provine lele ombetsha w’ɛkɔndɔ ndo wa biologie lo kalasa y’adidi akate ate: “Ndooko waa nzambi yekɔ, ndo ndooko oyango.” Nde akakotsha ate: “Ndooko ehikamelo k’oshika kendana la lɔkɛwɔ, ndo ndooko oyango w’oshika lo lɔsɛnɔ.”

Koko anto amɔtshi mbɔsaka dia kanyi shɔ yekɔ kashi. Vɔ mɛnaka dia etongelo kekɔ lo nɔmbɔma lo ndjela ɛlɛmbɛ shikaa, w’amɛna ndo wakakongɛma dimɛna. Vɔ mambaka efula lo menda diangɔ dia diambo diakatongama l’andja, diele anto amɔtshi pembaka dia diokoya. Ndo akambo watashɔma lushi la lushi mbashikikɛka ɔnɛ diangɔ sɔ dia diambo diakatongama oma le onto ɔmɔtshi lele la yimba efula.

Ekanelo kɛsɔ kambotshutshuya anto amɔtshi wasukɛ ohilwelo dia nyomɔsɛdingola tokanyi tawɔ. Tende bɛnyɛlɔ pende diayela nɛ.

DR. ALEXEI MARNOV LELE NEUROCHIRURGIEN. Nde mbutaka ate: “Lo kalasa yakamɔtɔ wakambetsha ɔnɛ Nzambi bu ndo ɔnɛ diangɔ tshɛ diakahilɔ lohilɔ. Onto tshɛ laki la mbetawɔ le Nzambi kɔmbɔsamaka la nɛmɔ.” Koko lo 1990, ekanelo kande kɛsɔ kakatatɛ ntshikitana.

Nde mbutaka ate: “Lakasalaka la wolo dia nshihodia ɔkɔkɔ shikaa wa diangɔ diakatongama, mbidja ndo wɔɔngɔ w’onto. Ɛngɔ ka diambo kɛsɔ sunganaka mɛtɛ mbelamɛ ɛngɔ kahaleke manema mfundo kakatongama. Ko onde wɔɔngɔ wakatongama dia onto nkondja ewo kana akoka ko oma laasɔ ko mvɔ? Dui sɔ mɛnamaka dia bu ohomba ndo hatokoke nkanyiya ngasɔ. Ɔnkɔnɛ, lakayotatɛ ndjambola nte: ‘Lande na keso la nkɛtɛ? Oyango akɔna wele la lɔsɛnɔ?’ L’ɔkɔngɔ wa dimi kana yimba dimɛna, lakayokomiyaka lo mbuta dia Otungi ɔmɔtshi pombaka monga.”

Oyangelo wa oyango wa lo lɔsɛnɔ akakonya Alexei dia nsɛdingola Bible. L’ɔkɔngɔ wa laasɔ, wadɛnde laki dɔkɔtɛlɛ, laki ndo nde lawɔ kombetawɔka ɔnɛ Nzambi ekɔ, akayeka Bible, mbuta ate dia mɛnya dia kanyi y’omɛnde yaki kɔlɔ! Koko wony’ɔnɛ, vɔ akɔ ahende waya la mbetawɔ ka wolo efula le Nzambi ndo wamboshihodia sangwelo diande lo dikambo di’anto oko wadiɛnya Afundelo.

DR. HUABI YIN LELE OMBEYI WA SIANSƐ. Huabi Yin akeke fizikɛ ndo nde akasale eyangelo l’edja k’ɛnɔnyi efula lo dikambo dia wonya.

Huabi mbutaka ate: “Etena tshɛ kekaso sho ambeyi wa siansɛ akambo wendana l’etongelo, sho mɛnaka mbala efula woho wɔlɔngami diangɔ dimɛna, ndo kɛsɔ mɛnyaka dia ekɔ ɛlɛmbɛ ɛmɔtshi shikaa wakashikikɛma. Lakayambolaka nte: ‘Ngande wakatombe ɛlɛmbɛ ɛsɔ?’ ‘Kaanga dja yakatɛso diangɔ pombaka ndjiendaka dimɛna, ko onto akɔna lele kiɔkɔ y’ɛlɛmbɛ wakɛndjakɛndja wonya?’ L’edjedja ka wonya, lakayokomiyaka lo mbuta dia ɛtɛkɛta w’etatelo wa lo Bible mbele ekadimwelo woleki tshɛ eshika, vɔ mbutaka ɔnɛ: ‘Lo etatelo, Nzambi akatonge olongo la nkɛtɛ.’”​—Etatelo 1:1.

Lo mbuta mɛtɛ, siansɛ ambokimanyiya dia nkondja ekadimwelo lo ambola efula wele oko wanɛ: Ngande wakɛndakɛnda tɔtshɔngu ta lo wɔɔngɔ? Ndo ngande watondja wonya dja ndo esase? Koko Alexei nde la Huabi, wakashola dia Bible mbishaka ekadimwelo lo ambola woleki ohomba wele oko: Lande na kakatongama andja? Lande na kalɔmbwamawɔ lo ndjela ɛlɛmbɛ? Ndo lande na kakatatongama?

Lo kɛnɛ kendana la nkɛtɛ, Bible mbutaka ɔnɛ: “[Nzambi] kondjitonga otongatonga, koko akayikenge dia anto mbidjasɛka lɔkɔ.” (Isaya 45:18) Eelo, Nzambi ekɔ la oyango ɔmɔtshi lo dikambo dia nkɛtɛ ndo oko wayodiɛnya sawo diayela, oyango ɔsɔ mbɔtɔnɛka dimɛna la elongamelo kele la so dikambo dia nshi yayaye.