‘Nyotetemale . . . dimanyiyana l’otema ɔtɔi lam’asanyu, oyadi kaanga onto ekɔ la dikambo dia nyangɛ osekande.’​—KƆLƆSAYI 3:13.

Sho tshɛ salaka munga. Sho koka salɛ anto akina kɔlɔ kana vɔ koka tosalɛ kɔlɔ. Dui sɔ mɛnyaka dia sho tshɛ tekɔ l’ohomba wa dimanyiya ndo wa vɔ todimanyiya. Etena kadimanyiyaso, sho tshikaka mombɛ onto lotosale kɔlɔ nkumbɛkumbɛ. Sho ‘hatokaloya kɔlɔ lo kɔlɔ’ ndo hatotetemala mbohɔ kɔlɔ kakatosalɛ onto kana wɛɔdu ande. (Rɔmɔ 12:17) Ko kakɔna kakokaso nsala naka onto ɔmɔtshi akatosalɛ kɔlɔ ka woke ndo keso l’okakatanu dia mbohɛ kɛnɛ kakatombe? Laasɔ, kete sho pombaka nsawola l’onto akɔ la dilɛmiɛlɔ tshɛ dui diakɔ lam’asaso la nde. Oyango aso pombaka monga wa mbidja wɔladi, koko aha wa toyanga onto lɔswɛ.​—Rɔmɔ 12:18.

“Nyosale akambo tshɛ la okitshakitsha, nyɔshi dia anto akina nyoleka.”​—FILIPƐ 2:3.

Etena kongaso l’okitshakitsha ndo keso la dilɛmiɛlɔ di’efula, anto ngɛnangɛnaka monga laleso. Vɔ mbeyaka dia tayowasalɛ akambo la ngandji ndo la dilɛmiɛlɔ ndo hatotowasalɛ akambo l’okonda dia mbanyangiya. Koko naka sho  mbɔsa dia sho ndeka anto akina kana mbala tshɛ sho tshininalaka paka dia vɔ nsala akambo lo yoho yalangaso, kete dui sɔ koka tokonya dia monga l’ekakatanu ndo la nkɛlɛ. Anto wayotewɔ ndo tayonga l’angɛnyi angana ato kana hatotonga l’angɛnyi.

“Nzambi keema la shɔnɔdi, koko lo wedja tshɛ, onto lawoka wɔma ndo lasala akambo w’ɛlɔlɔ mbetawɔmaka le nde.”​—ETSHA 10:34, 35.

Otungi aso hɔshi anto amɔtshi la nɛmɔ l’ɔtɛ wa wedja awɔ, ɔtɛkɛta awɔ, oma lɛnɛ oyewɔ kana nkoho yawɔ y’alemba. “Oma le onto ɔtɔi mbakandatonge anto wa lo wedja tshɛ.” (Etsha 17:26) Kɛsɔ mɛnyaka dia, anto tshɛ wekɔ anangɛso ndo akadiyɛso. Etena kasalɛso anto tshɛ akambo la dilɛmiɛlɔ ndo la ngandji, sho salaka dia vɔ monga l’ɔngɛnɔngɛnɔ, sho lawɔ mongaka l’ɔngɛnɔngɛnɔ ndo sho ngɛnyangɛnyaka Otungi aso.

“Nyɔlɔtɛ kɛtshi . . . memakana.”​—KƆLƆSAYI 3:12.

Etena keso la memakana, sho salaka di’anto akina ndjaoka dimɛna etena kewɔ la le so. Vɔ mongaka suke dia sawola la so ndo kaanga tongola nɛ dia vɔ mbeyaka ɔnɛ tayotetemala mbɔlama ki. Ndo etena katomalɛ onto ɔmɔtshi, ekadimwelo aso wa la memakana mbeyaka mbotutadia. Tokedi 15:1, mbutaka ɔnɛ: “Okadimwelo wa la memakana tutshaka nkɛlɛ, koko tshɛkɛta ya kɔlɔ mbidiyaka nkɛlɛ.”

“Ɔngɛnɔngɛnɔ waya lo mbisha ndeka wa nongola.”​—ETSHA 20:35.

Anto efula ɛlɔ kɛnɛ wekɔ la lokaki ndo kanyiyaka paka lo dikambo diawɔ vɔamɛ. Koko ɔngɛnɔngɛnɔ wa mɛtɛ mongaka le wanɛ wele la lokaho. (Luka 6:38) Anto wele la lokaho mongaka l’ɔngɛnɔngɛnɔ nɛ dia vɔ mbokaka anto ngandji efula oleki diangɔ dia l’emunyi. Ngandji ka ngasɔ mbatshutshuyaka dia vɔ monga la lowando ndo mɛnyaka lowando lawɔ etena kawakahɛ onto ɔmɔtshi ɛngɔ. (Kɔlɔsayi 3:15) Yambola wate: ‘Onde dimi nangaka mbetshaka wenya kaamɛ l’anto wele bu la lowando ndo wahalange nkaha ko kana dimi nangaka mbetshaka wenya kaamɛ l’anto wele la lokaho ndo wele la lowando?’ Kakɔna kamboteka lanɛ? Onga woho w’onto wakombolayɛ di’anto akina monga.​—Mateo 7:12.