“Oko wakɔtɔ pɛkato l’andja oma le onto 1 ndo nyɔi oma lo pɛkato, ɔnkɔnɛ nyɔi kakadiangana le anto tshɛ.”​—RƆMƆ 5:12.

Nzambi akatonge ambutshi aso wa ntondo, mbuta ate Adama la Eva la yimba ndo l’alemba wa kokele. Nde akawakitsha lo paradiso ka la nkɛtɛ, kakelamɛka ekambɔ k’Ɛdɛna. Nde akawatɛ dia vɔ koka ndɛ elowa w’oma l’esongo tshɛ wa l’ekambɔ, onyɛke w’oma l’osongo ɔtɔi. Koko, Adama la Eva wakasɔnɛ dia ndɛ elowa ɛmɔtshi w’oma l’osongo ɔsɔ ko wakasale pɛkato. (Etatelo 2:15-17; 3:1-19) L’ɔkɔngɔ wa vɔ mbohindolɛ, Nzambi akatshanya atshukanyi asɔ oma l’ekambɔ ndo wakayongaka la lɔsɛnɔ la wolo efula. Keema edja, vɔ wakayotaka ana ndo vɔ lawɔ wakayongaka la lɔsɛnɔ lele l’ekakatanu. Vɔ tshɛ wakatshunde ndo wakavu. (Etatelo 3:23; 5:5) Sho tekɔ lo tata hemɔ, tekɔ lo ntshunda ndo tekɔ lo mvɔ l’ɔtɛ wa kɛnɛ kakasale Adama la Eva.

“Andja w’otondo wekɔ lo nɔmbɔma oma le kanga kɔlɔ.”​—1 JOANI 5:19.

“Kanga kɔlɔ” ɔsɔ mbelamɛka ɔnɛ Satana. Nde ekɔ etongami ka lo nyuma kahɛnama kakatɔmbɔkwɛ Nzambi. (Joani 8:44; Ɛnyɛlɔ 12:9) Oma laasɔ, ditongami dikina dia lo nyuma diakayoyelaka  lokolo la Satana. Diɔ mbelamɛka ɛdiɛngɛ. Ditongami dia lo nyuma sɔ kambaka la wolo awɔ dia nkesa ndo mbekola anto oma le Otungi. Vɔ sɛngiyaka anto dia nsala awui wa kɔlɔ. (Osambo 106:35-38; 1 Timɔte 4:1) Satana nde l’ɛdiɛngɛ ande mbasala di’anto mɛna paa ndo nsowa.

“Onto l’onto ayona kɛnɛ konɛnde.”​—NGALATIYA 6:7.

Lo toho totshikitanyi, sho tshɛ tekɔ lo nsowa l’ɔtɛ wakatahowɔ pɛkato ndo shɛngiya yele la Satana l’andja wotodingi. Koko, lo tena dimɔtshi anto vɔamɛ mbele lo kiɔkɔ y’asui awɔ. Lo ngande? Nɛ dia etena kasalawɔ awui wa kɔlɔ kana kɔsawɔ tɛdikɔ ta kɔlɔ, vɔ minaka mbala efula etombelo wa kɔlɔ. Lo wedi okina, etena kasala anto awui w’ɛlɔlɔ, vɔ minaka etombelo w’amɛna. Ɛnyɛlɔ, omi ndo papa ka nkumbo kele la losembwe, kooka nkumbo kande ngandji ndo kakamba olimu la wolo, ayona awui efula w’amɛna ndo nkumbo kande kayonga l’ɔngɛnɔngɛnɔ. Koko, ɔnɛ latshupa falanga, lanɔ wanu efula kana lele ɔhɔdu l’olimu koka ndjaetɛ ndo mbetɛ nkumbo kande woola. Diakɔ diele, ekɔ dui dia lomba mpokamɛ Otungi aso. Nde kombolaka dia sho mina diangɔ efula di’amɛna, mbidja ndo “wɔladi w’efula.”​—Osambo 119:165.

“Lo nshi y’ekomelo . . . , anto wayoyalanga, wayolanga falanga, . . . wahakitanyiya awui w’ambutshi awɔ, . . . waha la ndjakimɛ, akanga w’ekonda, waha la ngandji k’akambo w’ɛlɔlɔ.”​—2 TIMƆTE 3:1-5.

Ɛlɔ kɛnɛ, anto efula wekɔ lo nkɛnɛmɔla paka waonga akɔ wɔtɛkɛtami lo avɛsa asɔ. Waonga awɔ asɔ ekɔ djembetelo mɔtshi yɛnya dia tekɔ lo nsɛna lo “nshi y’ekomelo” k’andja ɔnɛ. Afundelo wakatatshi nto dia lo nshi yaso nyɛ tayonga l’ata, ndjala, adidimu wa nkɛtɛ wa wolo ndo waa hemɔ. (Mateo 24:3, 7, 8; Luka 21:10, 11) Awui asɔ mbele lo kiɔkɔ y’asui efula ndo nyɔi.