ONDE NKƐTƐ KAYOTSHIKALAKA PONDJO?
Ndjale
NDJALE tondjaka aha tsho mbo ya ndɛ efula, koko ndo diangɔ diele la so ohomba dia nsala ekanga. Ndjale tondjaka k’ahende ɔtɔi ka hiɛlɛlɛ ya l’andja w’otondo ndo tɔ kotolaka dioxyde de carbone diele kɔlɔ le anto. Laadiko dia laasɔ, ndjale salaka dia djungudungu monga dimɛna.
Ɛkɔkɔ wahombaso nkokɛ ndjale
Otshikitanelo wa djungudungu wekɔ kɔlɔ efula le Corail, Coquillage ndo diangɔ dikina diasɛna l’ashi. Ambeyi wa siansɛ mbutaka ɔnɛ, ɛnɔnyi 30 oma laanɛ, Corail suke la tshɛ yasukɛ oko k’anɛi ɔtɔi ka diangɔ tshɛ dieyama diasɛna l’ashi, koka monga lo waale wa mvɔ.
Tomanyi mbutaka dia, ondo pursa 90 ya tofudu takondja mbo ya ndɛ yawɔ oma l’ashi, yakale diagɔ dia ponde diakadjawɔ l’ashi ndo vɔ fɔnyaka dia diangɔ dia ponde sɔ diele lo ndjale ndjakaka miliyɔ ya nyama yasɛna l’ashi ɔnɔnyi tshɛ.
António Guterres, Sécrétaire Général ka l’ONU akate lo 2022 ɔnɛ: “Sho kokokɛ ndjale,” “ndo ɛlɔ kɛnɛ dimi koka mbuta dia ‘okokelo wa ndjale waya dui dia wanyandja.’”
Nkɛtɛ kakatongama dia tshikalaka pondjo
Ndjale ndo diangɔ diasɛna lɔkɔ diakatongama dia ndjaɛdiaka ndo mongaka dimɛna naka anto hawokidji mindo. Dibuku dimɔtshi (Regeneration) nembetshiyaka ɔnɛ: naka anto hawodje mindo lo ndjale, kete “diangɔ sɔ diayonga l’akoka wa ntetemala ndjaɛdia diɔamɛ”. Tende bɛnyɛlɔ dimɔtshi:
-
Phytoplancton mbuta ate adiyo wa totshitshɛ wele l’ɛse k’ashi, kotolaka ndo mombaka dioxyde de carbone diakoka mbidiya djungudungu ya l’andja w’otondo. Phytoplancton tɔamɛ mombaka lofulo laamɛ la dioxyde de carbone woho wombamadiɔ oma le esongo, adiyo ndo tombatomba dikina diatomba oma lo nkɛtɛ.
-
Mikrɔbɛ ndɛka mposo ndo weka wa nse yavɔ yakoka mbidja ndjale mindo. Oma laasɔ, mikrɔbɛ akɔ ndjongaka mbo ya ndɛ ya diangɔ dikina diasɛna l’ashi. Lo ndjela Smithsonian Institution Ocean Portal, dui sɔ salaka dia “ndjale ntetemala monga pudipudi”.
-
Lo ndjela woho wahilɔ mbo ya ndɛ l’akundju awɔ, nse efula kimanyiyaka dia nkitshakitsha lɔlɛngɔ lakoka monga waale le Corail, nse ndo diangɔ dikina dia l’ashi.
Kɛnɛ katasalema
Naka sho kambaka l’atapa ndo ɛlɔndɔ wakokaso nkamba la wɔ mbala efula, kete dui sɔ koka nkitshakitsha mindo ya diangɔ dia ponde yakadjema lo ndjale
Naka mindo hayɔtwɛ lo ndjale, kete tɔ bu l’ohomba wa mbɛdiama. Diakɔ diele, tomanyi keketshaka anto dia nkamba la atapa lo dihole dia nkamba la diangɔ dia ponde mbala ɔtɔi ko mbikandja.
Koko, ekɔ awui akina efula wahomba salema. Atete edja, Organisme pour la protection de l’environnement wakatɔngɔna l’ɔnɔnyi ɔtɔi, tɔnɛ 9200 ya mindo yakakadjema l’abongo oma lo asuku wa ndjale lo wedja 112. Koko, ɔsɔ aki paka lofulo la tshitshɛ la mindo lo mbɛdika la lokema la mindo yɔtɔ lo ndjale ɔnɔnyi tshɛ.
Dibuku dimɔtshi (National Geographic) diakate ɔnɛ: “Anto wekɔ lo ntshumba esasɛ, pitilɔ ndo diangɔ dikina efula, diakɔ diele diangɔ diasɛna l’ashi bu l’akoka wa mbɛdia ndjale oko wakadiatongama dia nsala.”
Ɛkɔkɔ wa monga l’elongamelo—Kɛnɛ kata Bible
“Nkɛtɛ ndola tɔɔ la kɛnɛ kakayasale. Ndjale kekɔ, ka woke efula ndo enanɔnanɔ, tɔ ndolanɛ la diangɔ diasɛna diaheyama mbadia, dia totshitshɛ ndo dia weke.”—Osambo 104:24, 25.
Otungi aso akasale ndjale l’akoka wa ndjaɛdiaka tɔamɛ. Lam’ele Otungi aso mbakatonge ashi ndo diangɔ tshɛ diasɛna lɔkɔ, ekɔ dui dia lomba dia sho mbetawɔ dia nde ekɔ l’akoka wa minya mindo tshɛ yadjama lo ndjale. Enda sawo diele l’ɔtɛ a dui ɔnɛ: “Nzambi ndakaka dia nkɛtɛ kayotshikalaka pondjo,” lo lɛkɛ 15.
