Lande na kaya anto bu la dilɛmiɛlɔ lo kɛnɛ kendana la lɔsɛnɔ?

MPOKAMƐ LO

LANDE NA KELE EKƆ OHOMBA NƐMIYA LƆSƐNƆ?

Etena kasalayɛ awui wadja yoonge yayɛ kana y’anto akina lo waale, dui sɔ mɛnyaka dia wɛ hɔshi lɔsɛnɔ layɛ ndo l’anto akina la nɛmɔ.

Ɔnwɛlɔ wa mfɔka bu tsho lo kiɔkɔ ya hemɔ ka kansɛrɛ, koko dui sɔ mongaka la nshɛngiya lo dikoka diele la demba dia ndɔshana la hemɔ. Anto efula vɔka la hemɔ ka kansɛrɛ ka l’asasa l’ɔtɛ wanɔwɔ mfɔka kana l’ɔtɛ wanɔ anto wadingi mfɔka.
Etena kadiakawɔ anto l’ekoma, dui sɔ mbishaka anto akina paa ka lo yimba l’edja k’ɛnɔnyi efula. Alapɔlɔ ɔmɔtshi w’oma l’inivɛrsite wa Stanford mbutaka ɔnɛ: “Eyangelo mɛnyaka dia oyadi wanɛ wakahandɔ [etena kakawadiake anto l’ekoma la kalasa], wakatetemala monga la paa lo yimba l’edja k’ɛnɔnyi efula.”
Anto wakɛndjakɛndja l’ɔkɔngɔ wa nnɔ wanu kana didjoyadjoya dikina, mbidjaka anto wele l’otadimbo ndo watakɛndakɛnda l’omamu w’otadimbo lo waale. Etena kɛnya anto dia hawɔshi lɔsɛnɔ la nɛmɔ, anto waha l’onongo sowaka.

KƐNƐ KAKOKAYƐ NSALA

Kokɛ yoonge yayɛ. Eke mpɛtsha ko ndɛ dia ntshika mbekelo ya kɔlɔ yele oko ɔnwɛlɔ wa mfɔka, mfɔka ka la dja yʼatɔtɔ, wodjwelo wa wanu kana ɔnwɛlɔ wa didjoyadjoya diahaleke mbidjoya efula. Ditshɛlo sɔ mbidjaka lɔsɛnɔ layɛ lo waale ndo mɛnyaka dia wɛ hɔshi lɔsɛnɔ l’anto wokodingi la nɛmɔ, mbidja ndo l’ase nkumbo kayɛ.

“Nyɛsɔ toyaɛdia oma lo mindo tshɛ ya demba.” —2 Kɔrɛtɔ 7:1.

Yakokɛ ndo nkokɛ anto akina. Dia mbewɔ waale, lɔngɔsɔla luudu layɛ dimɛna. Kɛndjakɛndja la yambalo ndo mutuka ayɛ wongake dimɛna. Tetawɔke dia anto akina kɔsɛngiya dia nsala awui wakoka kohumuya kana kodiaka.

“Naka wɛ amboka luudu l’oyoyo, kodje ndo lokombo lo ɔtɛ wa luudu, diaha wɛ mbela onongo wa dikila lo luudu layɛ, nɛ dia onto ɔmɔtshi mbeyaka nkɔ oma lɛkɔ.”—Eohwelo k’Ɛlɛmbɛ 22:8. a

Onga ɔlɔlɔ otsha le anto akina. Mbɔsa lɔsɛnɔ la nɛmɔ nembetshiyaka dia sho monga ɔlɔlɔ otsha le anto wele la weho wa nkoho y’alemba yotshikitanyi, wedja wotshikitanyi ndo wele la weho wa nsɛnɔ yotshikitanyi. Laadiko dia laasɔ, kɔngɔdi ndo lohetsho mbele lo kiɔkɔ y’awui wa ngala ndo ata walɔma l’andja.

“Nyonya weho tshɛ wa lotunu la wolo, nkɛlɛ, odudu, ehangohango, ntɛngɔ ndo awui tshɛ wa kɔlɔ. Koko, nyoyale la ɔlɔlɔ w’otema lam’asanyu.”—Ɛfɛsɔ 4:31, 32.

KƐNƐ KASALASO

Ɛmɛnyi wa Jehowa mbetshaka anto akina dia mbɔsa lɔsɛnɔ la nɛmɔ. Ekongelo kaso ka wetshelo wa Bible kimanyiyaka anto dia ntshika ditshelo dia kɔlɔ.

Sho ndjelaka nna lo nna atɔndɔ wendana la ekokelo etena kasalaso olimu wa wokelo. Wanɛ wayakimɔ la lolango dia mbisha lonya lo wokelo w’ahole wasalaso nsanganya ndo ahole akina wakamba la so di’olimu aso wa wetshelo wa Bible ndowanyemaka dia mbewɔ waale. Sho sɛdingolaka mvudu yaso mbala la mbala dia nshikikɛ dia yɔ mbɔtɔnɛka l’ɛlɛmbɛ wendana l’ekokelo.

Sho kimanyiyaka anto wambohomɔ mpokoso. Lo ngɔndɔ 12 yeke ka mbeta, takasha ekimanyielo etena kakatombe mpokoso oko 200 yakasalema l’andja w’otondo yakadje nsɛnɔ y’anto lo waale ndo takakambe la miliyɔ suke la 12 ya dɔlara y’oma lo weshasha wa la lolango dia nkimanyiya wanɛ wakahomɔ mpokoso.

Etena kakatatɛ hemɔ ka Ebola ndjaka anto l’Afrikɛ wa lo Owɛstɛ lo 2014 ndo lo République démocratique du Congo lo 2018, takalakanya anto woho wa mbewɔ dianganya hemɔ kadiakana kɛsɔ. Takatome enyimpala dia tɔkɛtshanya l’anto wa l’elui ɛsɔ sawo diele l’ɔtɛ a dui ɔnɛ: “Okitanyiya shimbɛka nsɛnɔ.” Takakitsha bomba ya solaka anya la ntondo ka ahole aso w’ɔtɛmwɛlɔ tshɛ ndo takalembetshiya anto ohomba wa solaka anya ndo awui akina wakawahombe nsala diaha hemɔ diangana.

La Sierra Leone, wakaandola Ɛmɛnyi wa Jehowa lo aradiyo l’ɔtɛ wakawakimanyiyaka Ɛmɛnyi ndo wanɛ waki komonga Ɛmɛnyi dia mbewɔ hemɔ ka Ebola.

Dihole diakawasolaka anya lo Mbalasa ka Diolelo lo nshi ya hemɔ ka Ebola lo 2014 lo Liberia

a Lo Moyen-Orient didjango dia la lomba sɔ diakɛnyaka woho wayakiyanya onto dikambo di’ekokelo k’ase nkumbo kande ndo anto akina.

EMƆ!