Lande na kaya anto bu la dilɛmiɛlɔ otsha le anto akina?

MPOKAMƐ LO

LANDE NA KELE EKƆ OHOMBA NƐMIYA ANTO AKINA?

Nɛmiyaka anto akina, kimanyiyaka diaha awui ndeka tshɔ otsha lo kɔlɔ.

Yokedi mɔtshi ya lo Bible mbutaka ɔnɛ: “Okadimwelo wa la memakana tutshaka nkɛlɛ, koko tshɛkɛta ya kɔlɔ mbidiyaka nkɛlɛ.” (Tokedi 15:1) Ɛtɛkɛta ndo etsha wele bu la dilɛmiɛlɔ mongaka l’etombelo wa kɔlɔ wele oko onto ladja esɔ lo dja.
Yeso akate ate: “Oma l’efula k’akambo wele l’otema mbatɛkɛta onyɔ.” (Mateo 12:34) Naka sho bu la dilɛmiɛlɔ, kete dui sɔ diayɛnama oma lo woho wɔsaso anto wele la lokoho la demba, dioho kana wakole lo dihole diotshikitanyi la diaso.

Atete edja, wakakɔnya anto ndekana 32000 lo wedja 28, pursa 65 y’anto wakate dia ɛlɔ kɛnɛ anto waya bu la dilɛmiɛlɔ lo woho wewɔ watɛnaka.

KƐNƐ KAKOKAYƐ NSALA

Oyadi la kalasa kana l’olimu, lɛmiya anto tshɛ, kaanga wɛ bu la wɔ kanyi ɔtɔi. Shikikɛ awui wakokayɛ mbetawɔ. Dui sɔ diayokokimanyiya diaha ntɛkɛta kɔlɔ lo dikambo di’anto akina kana mbalombosha.

“Nyotshike nombosha diaha nyu nomboshama.”—Mateo 7:1.

Salɛ anto akina akambo woho walangayɛ vɔ kosalɛ. Naka wɛ monga ɔlɔlɔ ndo la losembwe, kete wɛ koka nongamɛ dia wayokosalɛ woho akɔ waamɛ.

“Nyosale anto kɛnɛ kalanganyu vɔ nyosalɛ.”—Luka 6:31.

Onga onto la dimanyiyana. Ɔsa di’onto hongi l’oyango wa konyangiya oma l’ɛtɛkɛta kana etsha ande.

“Lo mɛtɛ shɛnɔdi y’onto kitshakitshaka nkɛlɛ kande,ndo minya yimba lo kɔlɔ koosalewɔ ekɔ dui dia dimɛna efula.”—Tokedi 19:11.

KƐNƐ KASALASO

L’ahole wewɔ ndo l’olimu, Ɛmɛnyi wa Jehowa kimanyiyaka anto akina dia monga la dilɛmiɛlɔ.

Sho nɔmbaka anto dia mbeka la wɔ Bible ofele, koko sho hatowatshutshuya dia mbetawɔ tokanyi ndo waetawɔ aso. Sho salaka la wolo dia nkamba l’alako wa lo Bible lo nsambisha anto akina “la lotutsha ndo la dilɛmiɛlɔ di’efula.”—1 Petero 3:15; 2 Timɔte 2:24.

Sho bu la kɔngɔdi ndo lo nsanganya yaso ya l’etshumanelo, sho nongolaka anto w’oma l’ahole tshɛ walanga mbeka kɛnɛ ketsha Bible. Sho salaka la wolo dia mbetawɔ anto woho wewɔ ndo sho ‘nɛmiyaka weho w’anto tshɛ.’—1 Petero 2:17.

Sho nɛmiyaka ewadji wa lɛɛta wa l’ahole wodjashiso. (Rɔmɔ 13:1) Sho nɛmiyaka ɛlɛmbɛ ndo futaka elambo. Ndo kaanga mbalamaso lomangemange l’awui wa pɔlitikɛ, sho nɛmiyaka lotshungɔ lele l’anto akina la mbɔsa tɛdikɔ tawɔ l’awui wa pɔlitikɛ.

EMƆ!