Shɛngiya yakɔna yele la tshulatshula lo akoka ayɛ wa mbeka?
Anto efula wekɔ l’ohomba wa mbeka awui efula, oyadi la kalasa, l’olimu kana l’ɔtɛ w’ɛkɔkɔ ekina. Tshulatshula kokaka nkimanyiya onto dia mbeka. L’ɔkɔndɔ w’ana w’anto w’otondo, ndooko lushi lambongaka anto l’akoka wa mbeka awui efula aha l’okakatanu oko nshi nyɛ, aha la wɛ mimɔ oma lakayɛ kana monɛ oma lo nkɔsa kayɛ.
Koko, anto efula waleka nkamba la tshulatshula lo yɛdikɔ y’efula mongaka l’okakatanu wa . . .
-
mbidja yimba lo kɛnɛ katawadia.
-
mongaka l’okakatanu wa ndeka ndjasha lo dui ɔtɔi l’etena kakɔ kaamɛ.
-
nɛmbaka esadi eto etena kele onto ndamɛ.
KƐNƐ KAHOMBAYƐ MBEYA
WADIELO
Anto amɔtshi waleka nkamba la telefɔnɛ kana tablɛtɛ, waya bu l’akoka wa mbadia sawo di’otondo, vɔ ndjokomaka dia mbadia esadi esadi dia mbeya tsho lokanyi lele lɔkɔ.
Wadielo wa ngasɔ mongaka dimɛna etena kalangayɛ ntana ekadimwelo lo dimbola dimɔtshi esadi esadi. Koko, ɔsɔ keema yoho yoleki dimɛna ya mbadia etena keyɛ mɛtɛ l’ohomba wa nshihodia dui dimɔtshi dimɛna.
DIMBOLA DIA NKANA LA DIƆ YIMBA: Onde wɛ ekɔ l’akoka wa mbadia sawo dimɔtshi di’otale? Ngande wakokimanyiya dui sɔ dia wɛ ndowanya akoka ayɛ wa mbeka?—TOKEDI 18:15.
NDJASHA TSHƐ
Anto amɔ mbutaka dia tshulatshula mbashaka akoka wa vɔ nsala elimu ehende l’etena kakɔ kaamɛ, ɛnyɛlɔ, afundɛ angɛnyi mesajɛ ko l’etena kakɔ kaamɛ ateke. Koko etena kakahanyema timba tawɔ ondo vɔ mbeyaka ndjonga l’okakatanu wa nsala olimu ɔmɔ kana okina dimɛna, djekoleko naka elimu akɔ ehende nɔmbaka dia ndeka mbidja yimba lɔkɔ.
Kaanga mbele mongaka wolo dia ndeka ndjasha lo dui dimɔ ndo mbewɔ awui wekola yimba, dui sɔ diayokokimanyiya dia wɛ mbeka dimɛna. Ɔlɔngɔlɔngɔ welɛwɔ Grace mbutaka ɔnɛ: “Wɛ hatoleka nsala wandja ndo monga l’ekiyanu. Lakeke dia ekɔ ohomba efula ndjasha lo dui ɔtɔi ndo mbewɔ awui akina efula wekola yimba.”
DIMBOLA DIA NKANA LA DIƆ YIMBA: Onde nsala awui efula l’etena kakɔ kaamɛ kitshakitshaka akoka ayɛ wa nshihodia ndo wa mbohɔ kɛnɛ kakayeki?—TOKEDI 17:24.
NDJAOKA OPOKO
Anto efula hawotoyaokaka dimɛna etena kewɔ lo dihole dimɔtshi vɔamɛ, diakɔ diele vɔ ndjɔsaka telefɔnɛ kana tablɛtɛ dia nkɛnya la tɔ. Womoto ɔmɔtshi lelɛwɔ Olivia mbutaka ɔnɛ: “Dimi nɛmbaka efula naka hambetshisha kaanga minitɛ 15 lo telefɔnɛ, tablɛtɛ kana lo televiziɔ.”
Koko, tena dieyɛ wɛmɛ koshaka waaso w’amɛna wakoka kokimanyiya dia wɛ ndeka nkana yimba, lo dui di’ohomba diekiyɛ, aha tsho le ɛlɔngɔlɔngɔ koko ndo le epalanga.
DIMBOLA DIA NKANA LA DIƆ YIMBA: Etena keyɛ wɛmɛ, onde wɛ kambaka la etena kɛsɔ dia wɛ nkana yimba?—1 TIMƆTE 4:15.
KƐNƐ KAKOKAYƐ NSALA
SƐDINGOLA WOHO WAKAMBAYƐ LA TELEFƆNƐ KANA TABLƐTƐ
Lo toho takɔna takokayɛ nkamba la telefɔnɛ kana tablɛtɛ dia ndowanya akokayɛ w’ekanelo ka yimba? Ngande wakoka telefɔnɛ kana tablɛtɛ monga la shɛngiya lo akoka ayɛ wa ndeka ndjasha ndo wa mbeka?
TƆNDƆ DIA LO BIBLE: “Lama lomba l’oshika ndo dikoka di’ekanelo ka yimba.”—TOKEDI 3:21.
