Wetshelo wohikami lo Bible wekɔ la wolo w’efula wa ntshikitanya nsɛnɔ. Tɔshi bɛnyɛlɔ pende nɛ: Ricardo nde la Andres.

RICARDO: Etena kakimi l’ɛnɔnyi 15, lakɔtɔ l’oloyi wa dengalenga. Angɛnyi ami w’eyoyo wakonge la shɛngiya y’efula le mi. Lo mɛtɛ, oyango ami aki wa mbɔtɔ lokanu l’edja k’ɛnɔnyi dikumi! Ɔsɔ mbeyaka mɛnama oko dui di’enginya. Koko lo dihole diakimi, anto wakalangaka wanɛ wakɔtɔ lokanu l’etena k’otale ndo wakaalɛmiyaka. Dimi lawɔ lakalange monga oko vɔ.

Lakasale kɛnɛ tshɛ kakasalaka dengalenga, mbidja ndo nnɔ didjoyadjoya, nsala awui wa mindo wa dieyanelo ndo awui wa ngala. L’otsho ɔmɔtshi, takalɔ la dengalenga dikina. Lakafɔnyaka dia wayondjaka, koko lakalawɔ. L’ɔkɔngɔ wa laasɔ, lakatatɛ nkanyiya efula lo dikambo dia lɔsɛnɔ ndo eyango ami ndo lakɔshi yɛdikɔ ya nsala etshikitanu. Ko ngande wakamakoke nsala dui sɔ? Lende akamakoke nkondja ekimanyielo?

Ewotɔ ami efula komonga l’ɔngɛnɔngɛnɔ. Vɔ waki l’ekakatanu efula lo nsɛnɔ yawɔ. Koko aha ngasɔ mbakidiɔ lo dikambo dia nkumbo ka nyɔmi pami ɔmɔtshi. Lakeyaka dia vɔ waki anto w’ɛlɔlɔ ndo wakasɛnaka lo yoho yɔtɔnɛ l’atɔndɔ wa lo Bible. Ndo nto, lakeke oma le wɔ dia lokombo la Nzambi ele Jehowa. Diakɔ diele kombeta edja l’ɔkɔngɔ wa sho ndɔ la dengalenga, lakalɔmbɛ Jehowa, lakɔɔlɔmbɛ lo dimola lokombo lande ndo lakɔɔlɔmbɛ dia nde kimanyiyami. Lakambe la wedi a pindju dia mɛna Ɔmɛnyi wa Jehowa amboya ndjɔkɔkɔla lo soko diami! Nde mbakambetsha Bible.

Lakahomana l’ekakatanu wa wolo aha la ntshimbatshimba. Angɛnyi ami w’edjedja wakambelɛka mbala efula lo telefɔnɛ, vɔ wakalangaka dia dimi monga kaamɛ la wɔ. Komonga dui dia wɔdu, koko lakatone. Lakɔshi yɛdikɔ ya ntetemala mbeka Bible, ndo lekɔ l’ɔngɛnɔngɛnɔ l’ɔtɛ wakamasale dui sɔ! Lɔsɛnɔ lami lakatshikitana lo yoho ya diambo ndo laya l’ɔngɛnɔngɛnɔ wa mɛtɛ.

Dimi mbohɔka etena kakamatɛ Nzambi lo dɔmbɛlɔ ɔnɛ lakalangaka ntondo mbɔtɔ lokanu l’edja k’ɛnɔnyi dikumi di’anto nɛmiyami oko wakawalɛmiyaka dengalenga dikina. Ɔnkɔnɛ, dimi lakɔlɔmbɛ dia nde mbishami diaaso dia monga ombatshi mboka l’edja k’ɛnɔnyi dikumi l’oyango wa dimi nkimanyiya anto akina oko wakawakimanyiya. Nzambi akakadimola lo dɔmbɛlɔ diami, nɛ dia aya ɛnɔnyi 17 wemi ombatshi mboka! Dui dikina ele, latɔtɔka lo lokanu.

Koko aya edja kele angɛnyi ami w’edjedja efula lo lokanu. Akina wambovɔka. Etena kakanyiyami awui asɔ, lekɔ la lowando l’efula otsha le ewotɔ ami wele Ɛmɛnyi wa Jehowa. Vɔ wakatshikitana l’anto akina ndo wakasɛnaka lo yoho yɔtɔnɛ la kɛnɛ kata Bible. Dimi mbalɛmiyaka efula oleki woho wakamalɛmiyaka dengalenga di’asekami. Laadiko dia laasɔ, lekɔ lo nkaloya Jehowa losaka l’ɔtɛ wakandambetsha yoho ya lɔsɛnɔ yoleki dimɛna.

 ANDRES: Lakotɔ ndo lakodiama lo dihole diaki anto wola, lɛnɛ aki ɔnwɛlɔ wa didjoyadjoya, diakatanelo ndo awui wa monanyi wakakitaka dikuma. Papa aki omunga a wanu ndo akanɔka woho ɔmɔtshi wa kaandji. Nde la mama wakawanaka ndo wakalɔka.

Oma ko dikɛnda, lakatatɛ nnɔ wanu ndo didjoyadjoya dikina. Laki ɔna la lo shinga l’etena k’otale, lakavaka ndo lakasondjaka kɛnɛ kakamavaka. Etena kakamole, papa akalange dimi monga suke la nde, koko nde akasale dui sɔ lo yoho ya kɔlɔ, nɛ dia nde akambetsha woho wasondjaka didjoyadjoya ndo diangɔ dikina diele lɛɛta hetawɔ. Lakayokondja falanga efula. Koko lushi lɔmɔtshi, apulushi wakaye lakami. Vɔ wakaminde ndo wakafundɛ ɛnɔnyi etanu wa lokanu l’ɔtɛ wakawate dia dimi laki oko ondjakanyi.

Lushi lɔmɔtshi la pindju lakoke washa diewoyelo lo haut-parleur lo lokanu welɛ ase lokanu dia ndjohokamɛ ɔkɛtshanyelo w’awui wa lo Bible wakasalaka Ɛmɛnyi wa Jehowa. Lakatshu tohokamɛ. Kɛnɛ kakamoke kaki dimɛna, ko lakatatɛ mbeka Bible l’Ɛmɛnyi wa Jehowa. Vɔ wakanembetshiyaka avɛsa hwe ndo wakamɛnyaka atɔndɔ wa laadiko waki Nzambi wendana la lɔkɛwɔ.

Kombet’edja, lakashihodia ɔnɛ takamakoke nsala etshikitanu wakahombama aha la nkondja ekimanyielo, djekoleko etena kakapɛnyahɛnyaka asekami ase lokanu waki konangaka kɛnɛ kakamasalaka. Lakalɔmbɛ dia nkondja wolo ndo lomba, ko Jehowa akakimanyiya. Lo dihole dia dimi nkɔmɔ l’ɔtɛ wakawapɛnyahɛnyaka, lakayonga ndo la dihonga dia nsambisha ase lokanu akina awui wa lo Bible.

Etena kakawatondja oma lo lokanu, laki la nkɛlɛ k’efula nɛ dia lakalangaka nyomotshikala edja lɔkɔ! Etena kakamatatombaka, ase lokanu efula wakapohiyɛ anya ndo wakambutɛ ɔnɛ kotshu la wolo. Amɔtshi wakambutɛ la wangasanu tshɛ ɔnɛ: “Tshɔka otsha la ngelo osambisha.”

Dimi nyangaka etena kakanyiyami kɛnɛ kotokomɛ otondonga dimi kombetawɔ dia Nzambi mbetshami. Lekɔ la lowando l’efula l’ɔtɛ wakamboke Nzambi ngandji ndo wakinde kɔmbɔsami oko onto lahakoke ntshikitana. a