LE AMBUTSHI
7: Atɔndɔ
KƐNƐ KALEMBETSHIYA DUI SƆ
Atɔndɔ ekɔ ɛlɛmbɛ wayadjɛ onto lo woho wasɔnande dia nsɛna. Ɛnyɛlɔ, onde wɛ salaka la wolo dia monga la losembwe lo dui tshɛ? Ondo wɛ nangaka mbetsha anayɛ dia vɔ monga la lɔkɛwɔ la dimɛna la ngasɔ.
Atɔndɔ mendanaka nto la ɛlɛmbɛ wendana la lɔkɛwɔ. Ɛnyɛlɔ, onto lele l’atɔndɔ w’eshika wendana la lɔkɛwɔ kambaka olimu efula, ekɔ la losembwe ndo mbɔsaka anto akina la nɛmɔ, mbuta ate waonga waleka kɛnɛmɔma dimɛna etena kele onto eke dikɛnda.
TƆNDƆ DIA LO BIBLE: “Etsha ɔna lo mboka kahombande ntshɔ; kaanga lam’ayondonga opalanga nde hatokitakɔ.”—Tokedi 22:6, nɔtɛ.
OHOMBA WA DUI SƆ
Lo nshi nyɛ yamboleka awui wa tshulatshula mpama, atɔndɔ wendana la lɔkɛwɔ wekɔ ohomba. Mama kɛmɔtshi kelɛwɔ Karyn mbutaka ɔnɛ: “Tɔsɛngiya ta kɔlɔ koka tanema l’oseka ehomɔ tshɛ, mbuta ate lo telefɔnɛ, tablɛtɛ kana ɔrdinatɛrɛ wonya tshɛ. Anaso koka mbidjasɛ suke la so ko tete le wekɔ lo menda dui dimɔtshi dia kɔlɔ!”
TƆNDƆ DIA LO BIBLE: “[Anto] wambotshunda . . . wele oma lo okambelo, wolo wa shɛnɔdi yawɔ wambekiyama dia ntshikitanya ɔlɔlɔ la kɔlɔ.”—Hɛbɛru 5:14.
Atɔndɔ w’amɛna wendana la lɔkɛwɔ wekɔ nto ohomba. Dui sɔ mendanaka ndo nto monga la loshilambo lo nkamba la tɔtɛkɛta tele (oko “lam’alangɛ” ndo “losaka”) ndo ndjakiyanyaka dikambo di’anto akina, mbuta ate dionga dia dimɛna diahayoleka mɛnama, nɛ dia anto wamboleka ndjasha lo diangɔ dia l’emunyi diele oko, telefɔnɛ, tablɛtɛ, ɔrdinatɛrɛ oleki le anto.
TƆNDƆ DIA LO BIBLE: “Nyosale anto kɛnɛ kalanganyu vɔ nyosalɛ.”—Luka 6:31.
KƐNƐ KAKOKAYƐ NSALA
Ɛnya ɔna ohomba w’atɔndɔ wendana la lɔkɛwɔ. Ɛnyɛlɔ, eyangelo mɛnyaka dia ana wele l’ɛnɔnyi dikumi l’ɛmɔtshi hawoleke nsala dieyanelo la ntondo ka diwala naka vɔ mbowaetsha akambo hwe hwe ɔnɛ dionga sɔ diekɔ kɔlɔ.
DAKO: Kamba la dui dimɔtshi dieke katomba dia tatshiya sawo diendana la atɔndɔ. Ɛnyɛlɔ, naka tita nsango wakatshi dia awui amɔtshi wa ngala wakasalemi dihole dimɔtshi, wɛ koka mbuta ɔnɛ: “Ekɔ kɔlɔ efula woho wele anto amɔtshi wekɔ la nkɛlɛ k’efula ka ngasɔ otsha le anto akina. Kakɔna kafɔnyayɛ lo woho wosala anto akambo lo yoho shɔ?”
“Ekɔ dui dia wolo efula le ana dia nsɔna kɛnɛ kele ɔlɔlɔ kana kɛnɛ kele kɔlɔ naka haweye kakɔna kalembetshiya kɛnɛ kele ɔlɔlɔ la kɛnɛ kele kɔlɔ.”—Brandon.
Etsha ɔna atɔndɔ w’amɛna wendana la lɔkɛwɔ. Kaanga ana w’akɛnda koka mbeka dia mbuta “lam’alangɛ” ndo “losaka” ndo mbɔsa anto akina la nɛmɔ. Dibuku dimɔtshi (Parenting Without Borders) mbutaka ɔnɛ: “Etena kaleka ana mɛna dia wekɔ lo dihole diele anto efula, ɛnyɛlɔ oko lo nkumbo, la kalasa, lo tshunda mbalekawɔ monga suke dia nsala awui w’ɛlɔlɔ wakoka onto tshɛ nkondja wahɔ koko aha vɔamɛ ato.”
DAKO: Kahanya anayɛ elimu wa nsala la ngelo dia vɔ mɛna ohomba wa kambɛ anto akina.
“Naka anaso wambotatɛ nsala elimu wa la ngelo nshi nyɛ, kete hawototoka nsɔnyi tosala lam’ayowonga lawakawɔ. Mɛmba ɛkɛndɛ ayoshila monga dui dimɔtshi dia lo lɔsɛnɔ lawɔ.”—Tara.
