LE ATSHUKANYI
3: Dilɛmiɛlɔ
KƐNƐ KALEMBETSHIYA DUI SƆ
Naka atshukanyi nɛnyana lam’asawɔ, kete vɔ wayoyaoka dia vɔ mbokanaka ngandji oyadi kaanga etena kahawasangi lolemi lo dui dimɔtshi. Dibuku dimɔtshi (Ten Lessons to Transform Your Marriage) mbutaka ɔnɛ: “Atshukanyi wa ngasɔ mbewɔka ndjadja lo dui tshɛ diakoka ndjaakonya diaha vɔ nsanga lolemi. Lo dihole dia vɔ nsala ngasɔ, vɔ tetemalaka nsawola lam’asawɔ dui tshɛ diakokawɔ monga l’okakatanu. Onto l’onto pokamɛka kanyi ya wonyande la dilɛmiɛlɔ tshɛ ndo vɔ tanaka toho ta nkandola okakatanu akɔ lam’asawɔ.”
TƆNDƆ DIA LO BIBLE: “Ngandji . . . hayange wahɔ ande hita.”—1 Kɔrɛtɔ 13:4, 5.
“Nɛmiya wadɛmi nembetshiyaka dia dimi pombaka ngɛnangɛna nɛmɔ diele la nde ndo hakombola nsala dui tshɛ diakoka mbotsha nkɛlɛ kana ndanya diwala diaso.”—Micah.
OHOMBA WA DUI SƆ
Naka dilɛmiɛlɔ bu lam’asa atshukanyi, kete asawo wa lam’asawɔ koka ndjokonya lo tondjanɛ ɛtɛkɛta wa diɔnyɔ, ntɛngɔ ndo kaanga lo lohetsho, mbuta ate waonga wele lo ndjela anyangiyangi amɔtshi wekɔ tolembetelo tɛnya dia diwala koka ndjovɔ.
“Ɛtɛkɛta wa diɔnyɔ, tokedi kana tɔsɛkɛsɛkɛ ta kɔlɔ otsha le wadɛyɛ ayoshisha nɛmɔ diande, ayolanya wɛkamu ande otsha le yɛ ndo ayolanya diwala dianyu.”—Brian.
KƐNƐ KAKOKAYƐ NSALA
YASƐDINGOLA WƐMƐ
Dja yimba l’asawo ndo etsha ayɛ lomingu tshɛ. Oma laasɔ, ko wɛ ndjambola ɔnɛ:
-
‘Mbala ngana yakamɔnyɔla olonganyi ami ndo mbala ngana yakamawandola?’
-
‘Lo toho takɔna shikaa takamɛnya olonganyi ami dilɛmiɛlɔ?’
SAWOLA L’OLONGANYI AYƐ LO AMBOLA WAYELA ANƐ
-
Awui ndo ɛtɛkɛta akɔna wayokoka nyokimanyiya dia nyu nɛnyana lam’asanyu?
-
Awui ndo ɛtɛkɛta akɔna wanyokonya diaha nyu nɛnyana lam’asanyu?
ALAKO
-
Funda toho tosato talangayɛ vɔ kɔlɛnya. Olonganyi ayɛ asale woho akɔ waamɛ. Nyengɔnya listɛ, ndo nyosale la wolo dia mɛnyanya dilɛmiɛlɔ lo toho takanyafundji.
-
Sala listɛ la waonga wangɛnangɛnayɛ le olonganyi ayɛ. Oma laasɔ, tɛ olonganyi ayɛ woho wangɛnangɛnayɛ waonga asɔ.
“Nɛmiya omɛmi nembetshiyaka dia dimi pombaka mbɛnya oma l’etsha ami dia dimi mbɔɔsaka la nɛmɔ ndo dimi nangaka dia nde monga l’ɔngɛnɔngɛnɔ. Mbala efula oma lo towuiwui ta totshitshɛ tawotɛmi kana tawosalɛmi mbakokami mɛnya dia dimi mbɔlɛnyaka l’otema ɔtɔi.”—Megan.
L’ekomelo, bu ohomba dia wɛ mbeya dia kana wɛ ekɔ onto lalɛmiyana kana bu, koko kɛnɛ kele ohomba ele dia wɛ mbeya dia kana olonganyi ayɛ nɛmiyamaka.
TƆNDƆ DIA LO BIBLE: “Nyɔlɔtɛ kɛtshi k’efula, ɔlɔlɔ w’otema, okitshakitsha, memakana ndo solo dia lotutsha.”—Kɔlɔsayi 3:12.
Enda ndo lo...
TSHOTO Y'ETANGELO
Salɛka olonganyi ayɛ akambo la dilɛmiyɛlɔ
EMƆ!
Woho wa mɛnya lowando
Etena kadja wadi l’omi weolo dia nshihodia ndo mɛna waonga w’amɛna w’onto l’onto, mbala efula diɔtɔnganelo diele lam’asawɔ ndowanaka. Kakɔna kakoka kokimanyiya dia monga la lowando?
