Dimanyiya nembetshiyaka minya yimba lo kɔlɔ ndo minya oseka kumbɛkumbɛ tshɛ yakoka monga la kɔlɔ kakɔ. Edimanyielo hɛnya dia wɛ ambɔnyɔla kɔlɔ kokosalewɔ kana nsala diele oko tɔ hongi.

TƆNDƆ DIA LO BIBLE: “Nyotetemale mbikikanɛ kɔlɔ ndo nyodimanyiyanake l’otema ɔtɔi lam’asanyu, oyadi kaanga onto ekɔ la dikambo dia nyangɛ osekande.”​—Kɔlɔsayi 3:13.

“Etena kalangayɛ onto ɔmɔtshi, wɛ hatodja yimba paka lo wandja ande koko wɛ ayodja yimba lo woho w’onto wasalande dia monga.”​—Aaron.

Naka wɛ nama kumbɛkumbɛ, kete wɛ koka ndanya yoonge yayɛ ya demba ndo yimba, ndo wɛ koka nto ndanya diwala dianyu.

“Mbala kɛmɔtshi omɛmi akanɔmbɛ edimanyielo lo dui dimɔtshi diakambisha paa efula l’asolo. Aki dui dia wolo efula le mi dia mbodimanyiya. Lakayoodimanyiyaka l’ɔkɔngɔ, koko lekɔ la lonyangu lo woho wakimi kosala dui sɔ aha la ntshimbatshimba. Dui sɔ diakela ekiyanu w’anyanya lo diɔtɔnganelo diaso.”​—Julia.

YASƐDINGOLA WƐMƐ

Mbala kayaye kayoyonyanga oma lo dui dimɔtshi diayota kana diayosala olonganyi ayɛ, yambola wate:

• ‘Onde dimi lekɔ yomalomala?’

• ‘Onde kɛnɛ kakandasale kekɔ kɔlɔ ka woke kele pombaka paka nde nɔmbami edimanyielo, ko kana dimi koka tsho mbohɛ?’

SAWOLA L’OLONGANYI AYƐ LO AMBOLA WAYELA ANƐ

• Mbala efula, mbɔsaka edja ka ngande dia sho dimanyiyana lam’asaso?

• Kakɔna kakokaso nsala dia sho dimanyiyanaka aha la ntshimbatshimba?

ALAKO

• Etena kakosalɛwɔ kɔlɔ, toyangake dia mɛnya dia olonganyi ayɛ mbele l’eyango wa kɔlɔ.

• Sala la wolo dia dimanyiya olonganyi ayɛ, lo mbohɔ dia “sho tshɛ takanaka mbala efula.”​—Jakɔba 3:2.

“Ekɔ dui dia wɔdu dimanyiya etena kele nyu akɔ ahende nyekɔ la munga, koko ekɔ dui dia wolo etena kele mɛnamaka dia munga kekɔ le onto ɔtɔi. Mbetawɔ nɔmba edimanyielo ndo dimanyiya nɔmbaka okitshakitsha wa mɛtɛ.”​—Kimberly.

TƆNDƆ DIA LO BIBLE: ‘Totshimbatshimbake dia tadjisha akambo l’ɔnɔngɔ.’​—Mateo 5:25.