Oyango bu tsho dɔ, mbuta ate dui dimɔtshi diakombolayɛ dia diɔ diayosalema. Eyango w’amɛna nɔmbaka dia ndjakongɛ, ndjaɔtɔnganyiya l’akambo ndo dui sɔ keema ɔtɔmbɔ l’esɔ, koko nɔmbaka dia nkamba olimu efula.

Eyango koka mbɔsa (nshi kana mingu, ngɔndɔ, ɔnɔnyi kana ndekana dia mbakotsha). Eyango ɛmɔ wa lo nshi yayaye koka kotshama l’ɔkɔngɔ wa nkotsha eyango ekina.

Kotsha eyango ayoleka kokonya dia wɛ monga la wɛkamu, nkeketsha lɔngɛnyi layɛ ndo pamia ɔngɛnɔngɛnɔ ayɛ.

Ndjaɛkɛ le yɛ: Etena kayadjɛyɛ eyango wa totshitshɛ ndo kawakotshayɛ, wɛ mongaka la wɛkamu dia ndjadjɛ eyango wa weke. Wɛ mongaka nto la wɛkamu w’efula etena kahomanayɛ l’ekakatanu wa lushi la lushi, ɛnyɛlɔ oko aha mbetawɔ di’anto akina kotshutshuya dia nsala dui dia kɔlɔ.

Lɔngɛnyi: Anto ngɛnangɛnaka monga la le anto wele l’ekanelo ndo l’eyango w’amɛna, mbuta ate wanɛ weya kɛnɛ kalangawɔ ndo wele suke dia kikotsha. Laadiko dia laasɔ, yoho mɔtshi yoleki dimɛna ya nkeketsha lɔngɛnyi ele lo nkamba l’onto okina kaamɛ dia nkotsha oyango akɔ waamɛ.

Ɔngɛnɔngɛnɔ: Etena kayadjɛyɛ ndo kakotshayɛ eyango, wɛ mongaka l’ɔlɔ.

“Dimi nangaka monga l’eyango. Vɔ kimanyiyakami dia dimi monga l’awui wa nsala ndo dui dimɔtshi dia nkotsha. Ndo etena kakotshayɛ oyango ɔmɔtshi, ɔngɛnɔngɛnɔ w’efula mongaka etena kendayɛ kɛnɛ kosadiyɛ ndo katayɛ wate: ‘Mama lɛ, dimi mɛtɛ lakasadi! Lakasadi kɛnɛ kakamatshi dia nsala.’”​—Christopher.

TƆNDƆ DIA LO BIBLE: “Naka wɛ nkonga polo paka etena kayonga lɔpɛpɛ kana kayɔlɔ mvula, kete wɛ honɛki ndo hanaki pondjo ndooko ɛngɔ.”​—Ondaki 11:4, Today’s English Version.

Dja yimba lo awui wayela anɛ ndo kotsha eyango ayɛ.

Shihodia. Sala listɛ la eyango ɛmɔtshi wahombayɛ ndjadjɛ, ndo lɔngawɔ lo ndjela wɛnɛ woleki ohomba, lo nsɔna wɛnɛ wakokayɛ mbetsha lo dihole dia ntondo, dia hende, dia sato ndo tayelanaka.

Kongɛ. Lo oyango tshɛ, sala awui wayela anɛ:

• Sɔna datɛ dimɔtshi diakoka.

• Kongɛ wanya wahombayɛ ntakola.

• Eya dia ekakatanu koka monga ndo kana yimba lo woho wakokayɛ mbakandola.

Yasha. Tokongake polo paka wɛ ambokotsha oseka kiambokambo tshɛ ko wɛ ndjotatɛ. Yambola wate: ‘Naa dui dia ntondo diakokami nsala dia nkotsha oyango ami ɔnɛ?’ Oma laasɔ, sala dui diakɔ. Tayelaka ehamelo watayasale etena katayatakola ena tshɛ.

TƆNDƆ DIA LO BIBLE: “Asangwelo wa kanga etete konyaka mɛtɛ lo otondoyelo.”​—Tokedi 21:5.