LE ATSHUKANYI
2: Nkamba kaamɛ
KƐNƐ KALEMBETSHIYA DUI SƆ
Etena kakambawɔ kaamɛ lo diwala, wadi l’omi mongaka oko pilɔtɛ la okimanyedi ande watafumbɔ lo aviyɔ akɔ waamɛ. Kaanga etena katomba ekakatanu, olonganyi tshɛ kambaka la tshɛkɛta “sho” lo dihole dia “dimi.”
TƆNDƆ DIA LO BIBLE: “Vɔ keema anto 2 nto, koko waya demba 1.”—Mateo 19:6.
“Diwala hongaka onto ɔtɔi. Pami la womoto pombaka nkamba kaamɛ dia vɔ ntondoya.”—Christopher.
OHOMBA WA DUI SƆ
Etena katomba okakatanu ɔmɔtshi, wadi l’omi wanɛ wahakambe kaamɛ ndekaka mbidja yimba dia mbeya onto lele lo dindja lo dihole dia mbidja yimba dia nkandola okakatanu. Ekakatanu watotshitshɛ kadimɔka ekakatanu wa weke.
“Nkamba kaamɛ ekɔ ohomba lo diwala. Otondongaka dimi l’omɛmi kokamba kaamɛ, tshike totonga oko anto wadjasɛ luudu ɔtɔi koko aha oko atshukanyi, mbuta ate totonga anto ahende wadjasɛ kaamɛ koko wahɔshi tɛdikɔ t’ohomba kaamɛ.”—Alexandra.
KƐNƐ KAKOKAYƐ NSALA
YASƐDINGOLA WƐMƐ
-
Onde dimi mbɔsaka dia falanga yakondjami oko “tshɛ yekɔ yami”?
-
Onde paka olonganyi ami bu laawɔ ko dimi nkɔkɔla demba dimɛna?
-
Onde dimi mbewɔka ndjasha le ewotɔ w’olonganyi ami oyadi kaanga nde ekɔ ma ma lawɔ?
SAWOLA L’OLONGANYI AYƐ LO AMBOLA WAYELA ANƐ
-
Lo dui (awui) diakɔna dia lo diwala diaso diakambaso dimɛna kaamɛ?
-
Lo dui (awui) diakɔna diakokaso ndjalowanya?
-
Wanya akɔna wakokaso ntakola dia mpamia yimba ya nkamba kaamɛ?
ALAKO
-
Ohɔsa dia nyekɔ lo nkɛnya ponde ka tennis ko nyu akɔ ahende nyekɔ lo wedi wotshikitanyi w’ɔtɛyi. Lo dihole dia nsala ngasɔ, kakɔna kakokayɛ nsala dia wɛ l’olonganyi ayɛ monga wedi akɔ waamɛ oko ekipɛ?
-
Lo dihole dia mbuta ɔnɛ: ‘Ngande wakokami mbidja otshumba?’ ayoleka dimɛna wɛ mbuta ɔnɛ: ‘Ngande wakokaso sho ahende mbidja otshumba?’
“Ohɛ akambo wa mbeya ɔnɛ lamboyinga ndo ɔnɛ lele lo dindja. Awui asɔ bu ohomba dia monga la wɔladi ndo kaamɛ lo diwala dianyu.”—Ethan.
TƆNDƆ DIA LO BIBLE: “Tanyendake paka wahɔ anyu hita eto, koko nyendake ndo wahɔ w’anto akina.”—Filipɛ 2:3, 4.
