LE ƐLƆNGƆLƆNGƆ
11: Nkamba olimu efula
KƐNƐ KALEMBETSHIYA DUI SƆ
Anto wakamba olimu efula hawewɔ dia nkamba. Koko, vɔ ngɛnangɛnaka nkamba la wolo awɔ tshɛ dia nkotsha ehomba awɔ ndo nkimanyiya anto akina, oyadi kaanga anto akina hawɔngɛnangɛna olimu wakambawɔ.
OHOMBA WA DUI SƆ
Oyadi sho nanga kana hatolangi, lɔsɛnɔ ndola tɔɔ la ɛkɛndɛ. Lo andja ɔnɛ wele anto efula hawolange nkamba efula, nkamba efula ayokokondjiyɛ wahɔ.—Ondaki 3:13.
“Lakɛnyi dia etena kakambayɛ efula, wɛ mongaka la yoho mɔtshi y’ofunu ndo wɛ mongaka l’ɔlɔlɔ wa l’etei k’otema. Monga l’ɔlɔ ɔsɔ wa l’etei k’otema ambonkimanyiya mɛtɛ dia nanga olimu. Monga la mbekelo y’ɛlɔlɔ lo olimu ayokokimanyiya nto dia monga la lokumu l’ɔlɔlɔ.”—Reyon.
TƆNDƆ DIA LO BIBLE: “Olimu tshɛ wa wolo wekɔ la wahɔ.”—Tokedi 14:23.
KƐNƐ KAKOKAYƐ NSALA
Onga la kanyi y’ɔlɔlɔ lo dikambo di’olimu lo ndjela awui wayela anɛ.
Onga l’ofunu lo mbeka dia nsala akambo dimɛna. Oyadi wɛ ekɔ lo nkamba elimu wa la ngelo, ekɔ lo nsala adevɔara w’oma la kalasa, kana ekɔ lo nkamba olimu wa l’emunyi, koyashake tshɛ lo kɛnɛ kasalayɛ. Etena kasalayɛ olimu ɔmɔtshi dimɛna, yanga toho ta mpama, mbuta ate toho ta nsala kɛnɛ koleki dimɛna. Etena kayoyoleka ndjalowanya, mbayoyoleka ngɛnangɛna olimu ayɛ.
TƆNDƆ DIA LO BIBLE: “Onde wɛ ambɛnaka onto lakamba olimu ande dimɛna? Nde ayemala la ntondo ka nkumi ya dikanga; nde hatemala la ntondo ka anto k’anto.”—Tokedi 22:29.
Tokomɛke tsho lo menda wahɔ ayɛ eto koko enda ndo w’anto akina. Lo suke la diaaso tshɛ, etena kɛmbayɛ ɛkɛndɛ ayɛ dimɛna, anto akina kondjaka wahɔ oma lɔkɔ. Ɛnyɛlɔ, etena kakambayɛ elimu wa la ngelo la wolo tshɛ, wɛ mbishaka ɛnyɛlɔ le anto akina wa lo nkumbo kayɛ.
TƆNDƆ DIA LO BIBLE: “Ɔngɛnɔngɛnɔ waya lo mbisha ndeka wa nongola.”—Etsha 20:35.
Sala kɛnɛ koleki kɛnɛ kakɔlɔmbawɔ. Lo dihole dia nsala tsho paka kɛnɛ kakawakɔlɔmbi, dja welo dia nsala efula ndeka kɛnɛ kakɔlɔmbawɔ dia nsala. Lo yoho shɔ, wɛ ayɛnya dia wɛ mbidjaka yimba lo lɔsɛnɔ layɛ, mbuta ate wɛ ayosala awui efula, aha l’ɔtɛ wakotshutshuyawɔ la wolo, koko l’ɔtɛ wakayasɔnɛ dia nsala ngasɔ.—Mateo 5:41.
TƆNDƆ DIA LO BIBLE: “[Sala] ɔlɔlɔ la lolango layɛ hita, koko aha lotshutshuya.”—Filɛmɔna 14.
Onga la wɛdimo. Anto wakamba olimu efula keema akanga wa nɛndɛ kana esuwa. Vɔ mongaka la wɛdimo, ngɛnangɛnaka olimu wa wolo wakambawɔ ndo momuyaka.
TƆNDƆ DIA LO BIBLE: “Ndeka dimɛna monga la yema ya diomuyelo tshitshɛ lo dihole dia monga la olimu efula wa wolo ko tatshanyaka lɔpɛpɛ.”—Ondaki 4:6.
Enda ndo lo...
TSHOTO Y'ETANGELO
Woho wa ngɛnangɛna olimu wa wolo
Lembetɛ toho tɔmɔtshi tasha Bible alako w’eshika takoka kokimanyiya dia nkondja ɔngɛnɔngɛnɔ ndo ɔlɔ l’olimu ayɛ
EMƆ!
Woho wa nkamba la wenya ayɛ dimɛna
Yoho mɔtshi ya nkamba dimɛna la wenya ayɛ ele nsɛdingola lɔsɛnɔ layɛ lo ndjela akambo ahende anɛ. Naa akambo akɔ?
