LE ATSHUKANYI
1: Ntshikala lo diwala
KƐNƐ KALEMBETSHIYA DUI SƆ
Wadi l’omi wayashikikɛ dia ntshikala lo diwala diawɔ mbɔsaka dui sɔ oko dimama diatshikala pondjo, ndo dui sɔ mbakonyaka dia vɔ monga lo ekokelo lam’asawɔ. Olonganyi tshɛ mongaka l’eshikikelo dia vɔ akɔ tshɛ wayotshikala lo diwala oyadi lo tena dia wolo.
Atshukanyi amɔtshi tshutshuyamaka dia ntshikala kaamɛ oma lo shɛngiya yele la nkumbo kana angɛnyi awɔ. Koko, kɛnɛ koleki dimɛna ele, ndjashikikɛ kawɔ dia ntshikala kaamɛ lo diwala pombaka pikama lo ngandji ndo lo dilɛmiɛlɔ lam’asawɔ.
TƆNDƆ DIA LO BIBLE: “Omi hahombe ntshika wadɛnde.”—1 Kɔrɛtɔ 7:11.
“Naka wɛ ndjashikikɛ dia ntshikala kaamɛ lo diwala, kete tongake suke dia momala esadi. Wɛ pombaka monga esadi dia dimanyiya ndo esadi dia nɔmba edimanyielo. Ɔsa ekakatanu oko wekamu koko aha oko awui wahakoke kandɔma wakonya lo odiakelo wa diwala.”—Micah.
OHOMBA WA DUI SƆ
Etena kahomanawɔ l’ekakatanu, atshukanyi wahayashikikɛ dia ntshikala kaamɛ lo diwala ndjokomɛka lo mbuta ɔnɛ: ‘Sho kofundamɛ dia mbidjasɛ kaamɛ sho ahende’ ndo vɔ nyangaka toho ta ndjaka diwala.
“Anto efula watshukana mongaka la kanyi y’ɔnɛ, naka diwala diawɔ ‘hongi l’ɔngɛnɔngɛnɔ,’ kete vɔ koka tsho ndjaka diwala. Etena katshukana anto la kanyi y’odiakelo wa diwala, yɛdikɔ yawɔ ya ntshikala kaamɛ lo diwala shishɔka oma l’etatelo.”—Jean.
KƐNƐ KAKOKAYƐ NSALA
YASƐDINGOLA WƐMƐ
Etena katomba owanu . . .
-
Onde wɛ ndjonyangaka lo woho wakayatshukana la olonganyi ayɛ?
-
Onde wɛ kanyiyaka onga l’onto okina lele bu olonganyi ayɛ?
-
Onde wɛ mbutaka awui wele oko, “layokɔsɛka” kana “layoyanga onto okina lananga”?
Naka wɛ nkadimola eelo lo dimbola ɔtɔi kana efula l’atei wa ambola anɛ, kete ɔnɛ ekɔ etena ka wɛ takeketshisha yɛdikɔ yanyu ya ntshikala kaamɛ lo diwala.
SAWOLA L’OLONGANYI AYƐ LO AMBOLA WAYELA ANƐ
-
Onde yɛdikɔ ya ntshikala kaamɛ lo diwala diaso, yekɔ lo takitakita? Naka ngasɔ, lande na?
-
Wanya akɔna wakokaso ntakola oma ko kakianɛ dia nkeketsha yɛdikɔ yaso ya ntshikala lo diwala?
ALAKO
-
Kofundɛke olonganyi ayɛ nɔtɛ mɔtshi ya ngandji lo tena dimɔtshi
-
Ɛnya ndjashikikɛ kayɛ dia ntshikala lo diwala lo nkitsha foto ka olonganyi ayɛ lo dihole diakambayɛ olimu
-
Elɛ, fundɛ kana sala yoho mɔtshi yakokayɛ mbeya woho wele olonganyi ayɛ lushi tshɛ etena keyɛ l’olimu kana keyɛ bu lalende
TƆNDƆ DIA LO BIBLE: “Onto atokakitolake kɛnɛ kakamamatanya Nzambi.”—Mateo 19:6.
