LE ƐLƆNGƆLƆNGƆ
10: Onga onto lɛkɛwɔ otema
KƐNƐ KALEMBETSHIYA DUI SƆ
Anto wɛkɛwɔ etema kondjaka wɛkamu oma le ambutshi, angɛnyi ndo ewandji w’olimu awɔ. Vɔ kambaka la atɔndɔ, kotshaka alaka awɔ ndo mbutaka mɛtɛ nshi tshɛ.
OHOMBA WA DUI SƆ
Suke la mbala tshɛ, lotshungɔ lakondjayɛ nemanɛka mbala kakɔ ɔtɔi la wɛkamu wakondjayɛ l’edjedja ka wonya.
“Yoho yoleki dimɛna dia ambutshi ndjaɛkɛ le yɛ ele lo mɛnya dia wɛ ekɔ onto lambotshunda ndo lakoka mɛmba ɛkɛndɛ, aha paka wonya weyɛ la le ambutshi ayɛ koko ndo wonya weyɛ bu la lewɔ.”—Sarahi.
TƆNDƆ DIA LO BIBLE: “Nyotetemale mɛnya woho w’anto wenyu.”—2 Kɔrɛtɔ 13:5.
KƐNƐ KAKOKAYƐ NSALA
Oyadi kaanga wɛ ekɔ lo nanga dia ambutshi ndeka ndjaɛkɛ le yɛ kana wɛ nangaka dia ambutshi nyomoyaɛkɛ le yɛ nto, awui wayela anɛ koka kokimanyiya.
Onga la losembwe. Anto wayotshika esadi eto ndjaɛkɛ le yɛ naka wɛ mbutaka kashi. Etena kasawolayɛ l’anto, naka wɛ mbuta akambo hwe hwe ndo monga la losembwe djekoleko lo dikambo dia wandja ayɛ, kete anto akina koka ndjaɛkɛ le yɛ.
“Ekɔ wɔdu monga la losembwe naka akambo wekɔ lo tatshu dimɛna. Koko naka wɛ monga la losembwe la ntondo ka dui dimɔtshi diɛnayɛ kɔlɔ, kete anto wayoleka ndjaɛkɛ le yɛ.”—Caiman.
TƆNDƆ DIA LO BIBLE: “Sho kombolaka monga la losembwe lo akambo tshɛ.”—Hɛbɛru 13:18.
Ɛnya dia vɔ koka mbɛkɛ otema le yɛ. Lo eyangelo ɛmɔtshi wakasalema l’États-Unis, pursa, 78 y’anto wakamba lo waa kɔpanyi wakate dia “l’atei w’awui asato woleki ohomba dia mbɔsa onto l’olimu, dui dimɔtshi ele nde pombaka monga onto lakokawɔ mbɛkɛ otema.” Mbeka dia monga onto lɛkɛwɔ otema nshi nyɛ ayokokondjiyɛ wahɔ etena kayoyokoma opalanga.
“Ambutshi ami mɛnaka etena kakotshami ɛkɛndɛ ami ndo etena kasalami elimu wa la ngelo aha paka vɔ mboholakami tena tshɛ. Etena tshɛ katamaleke ndjasha lo nsala ngasɔ, mbalekawɔ ndjaɛkɛ le mi.”—Sarah.
TƆNDƆ DIA LO BIBLE: “Lekɔ l’eshikikelo dia wɛ ayokitanyiya, . . . leya dia wɛ ayosala oleki ndo kɛnɛ kotshimi.”—Filɛmɔna 21.
Onga la solo dia lotutsha. Otshikitanyi la woho watole onto lo demba wɛnama le anto akina, mbala efula mbɔsaka etena di’anto akina ndjoshola dia wɛ ambotshunda ndo ambokoka mɛmba ɛkɛndɛ.
“Mbɔsaka etena ndo welo efula dia ambutshi ndo anto akina ndjaɛkɛ le yɛ, wɛ hakoke nongamɛ di’anto akina ndjaɛkɛ le yɛ paka l’ɔtɛ wakayɛmbɛ ɛkɛndɛ mbala ɔtɔi. Koko wɛ koka tasalaka dikambo sɔ yema yema naka wɛ tatetemalaka mɛmba ɛkɛndɛ l’edja katete nshi.”—Brandon.
TƆNDƆ DIA LO BIBLE: “Nyɔlɔtɛ . . . solo dia lotutsha.”—Kɔlɔsayi 3:12.
Enda ndo lo...
ESANGELO WA LO DIBAYA
Ngande wakokami nsawola la ambutshi ami?
Ngande wakokayɛ nsawola l’ambutshi ayɛ aha la wɛ monga oko onto lahoke mposa ka ntɛkɛta?
