Sawo dia dimɛna salemaka etena katanɛnyu tokanyi ndo nsaki wɛ la anayɛ.

Sawo koka monga tshondo y’okakatanu djekoleko etena kele ana waya l’ɛnɔnyi dikumi l’ɛmɔtshi. Ondo atete edja k’efula dibuku dimɔtshi (Breaking the Code) diakɛnya dia “etena kele ana akɛnda vɔ mbutɛka ambutshi awɔ dui tshɛ. Koko etena katawonge epalanga, vɔ hawoyoleka nsawola dimɛna l’ambutshi awɔ, diakɔ diele ambutshi hawoyeya tokanyi ndo nsaki y’anawɔ.” Kaanga mbele mɛnamaka dia ana hawoyolanga nsawola l’ambutshi awɔ, ɔnɛ mbele etena koleki dimɛna kahomba ana nsawola dimɛna l’ambutshi awɔ!

Onga suke dia sawolaka la anayɛ etena tshɛ katanawɔ diaaso. Sala dui sɔ oyadi kaanga l’otsho wa bi.

“Ondo wɛ koka ndjota ɔnɛ: ‘Wonya ɔnɛ mbalangayɛ nsawola la mi? Lakikɔ layɛ lushi otondo!’ Ko ngande wakokaso ndjoyakiyanya naka anaso wekɔ lo nanga todiholɛ etema? Shi kɛsɔ mbalongamɛ ombutshi tshɛ?”​—Lisa.

“Kaanga mbele dimi nangaka ndala esadi, asawo amɔ woleki amɛna wakamasawola l’anami wele l‘ɛnɔnyi dikumi l’ɛmɔtshi akikɔ l’ɔkɔngɔ wa midi k’otsho.”​—Herbert.

TƆNDƆ DIA LO BIBLE: “Onto l’onto atetemale nyanga wahɔ w’onto okina, koko aha wahɔ ande hita.”​—1 Kɔrɛtɔ 10:24.

Tetawɔke dia mbekola yimba. Ombutshi ɔmɔtshi wa pami mbutaka ate: “Mbala efula dimi tanemaka ko lekɔ lo nkanyiya awui akina etena kasawolami l’anami. Ndo vɔ koka mɛna dia dimi lekɔ lo nkanyiya awui akina ndo hawahokamɛ!”

Naka televiziɔ kana dihomɔ diele oko telefɔnɛ diambokekola yimba, kete dimadɔ. Dja yimba lo kɛnɛ kakotɛ ɔnayɛ, ndo ɔsa okiyanu ande la nɛmɔ ndo dja yambalo y’efula oyadi kaanga mɛnamaka dia bu ohomba le yɛ.

“Sho pombaka nshikikɛ anaso dia woho wayaokawɔ ekɔ dui di’ohomba le so. Naka vɔ mɛna dia woho wayaokawɔ bu ohomba le so, kete hawotototɛ woho wayaokawɔ ndo wayotshɔ dihole dikina dia toyanga ekimanyielo.”​—Maranda.

“Tomalake oyadi kaanga ekanelo k’ɔnayɛ bu dimɛna kaanga yema tshitshɛ.”​—Anthony.

TƆNDƆ DIA LO BIBLE: “Nyodje yimba lo woho wahokamɛnyu.”​—Luka 8:18.

Kondja wahɔ oma l’asawo wa lo tshakitudi. Mbala efula ana sawolaka dimɛna efula etena kewɔ bu la le ambutshi awɔ.

“Takakondja wahɔ lo wɔtwɛlɔ wa lo mutuka. Mbidjasɛ ma ma lo dihole dia ɔnɛ lo tshuku nɛ ɔnɛ lo tshuku dikina akatokonyaka l’asawo w’amɛna.”​—Nicole.

Wonya w’oleelo ekɔ diaaso dikina diakonya lo sawo dia lo tshakitudi.

“Wonya w’oleelo, ɔmɔmɔ la l’atei aso mbutaka awui wa kɔlɔ ndo w’amɛna waketshi lushi longo. Mbekelo kɛsɔ salaka dia sho monga kaamɛ ndo tokimanyiyaka dia mbeya ɔnɛ tayongaka l’ohomba w’onto okina dia tokimanyiya dia sho nkandola ekakatanu aso.”​—Robin.

TƆNDƆ DIA LO BIBLE: ‘Onga suke dia mpokamɛ ndo ɔkɔkɛ dia ntɛkɛta.’​—Jakɔba 1:19.