LE ƐLƆNGƆLƆNGƆ
9: Woho w’onto weyɛ
KƐNƐ KALEMBETSHIYA DUI SƆ
Woho w’onto weyɛ hakomɛ tsho lo lokombo ndo ɛnamelo kayɛ. Dui sɔ mendanaka ndo la atɔndɔ, waetawɔ ndo dionga diayɛ. Lo mɛtɛ, woho w’onto weyɛ ekɔ dui tshɛ diakokonya dia monga woho weyɛ, oyadi l’etei kana l’andja.
OHOMBA WA DUI SƆ
Etena keyɛ la lonto la dimɛna, wɛ mamɛka waetawɔ ayɛ lo dihole dia wɛ mbetawɔ dia asekayɛ kɔsɛngiya dia kɔlɔmbɔla.
“Anto efula wekɔ oko waa manekɛ wɛnayɛ lo waa makashinyi wasalawɔ piblisite. Vɔ hawɔsɔnɛ ahɔndɔ walɔtawɔ, paka anto akina mbaasɔnɛ.”—Adrian.
“Lakeke woho wa mamɛ kɛnɛ kele ɔlɔlɔ oyadi kaanga etena kele dikambo sɔ wolo nsala. Dimi koka mbuta woho wele angɛnyi ami wa mɛtɛ oma lo etsha awɔ ndo oma lo woho wasalami akambo lalewɔ.”—Courtney.
TƆNDƆ DIA LO BIBLE: “Nyotshike tshikitanyema oma le dikongɛ di’akambo nɛ, koko nyohilwame lo nɔngɔsɔla timba tanyu.”—Rɔmɔ 12:2.
KƐNƐ KAKOKAYƐ NSALA
Kɛnɛmɔla woho w’onto weyɛ nshi nyɛ ndo woho w’onto wakombolayɛ monga lo nsɛdingola awui amɔtshi w’amɛna wasalayɛ, wɛɔdu ndo dietawɔ diayɛ. Yoho ya dimɛna ya ntatɛ ele lo nkadimola lo ambola wayela anɛ.
Awui amɔtshi w’amɛna wasalayɛ: Diewo ndo akoka akɔna wele la mi? Naa awui wemi l’akoka wa nsala? (Ɛnyɛlɔ: Onde dimi lekɔ onto lalɛmiya wenya? lekɔ la ndjakimɛ? kambaka olimu wolo? lekɔ la lokaho?) Naa awui amɔtshi w’ɛlɔlɔ wasalami?
DAKO: Onde mongaka wolo le yɛ dia mbohɔ kiambokambo tshɛ y’ɔlɔlɔ yakayasadi kana yakayatshi? Mbola ombutshi ɔmɔtshi kana ɔngɛnyi ɔmɔtshi wɛkɛyɛ otema awui amɔtshi w’amɛna wɛnande le yɛ ndo lande na.
TƆNDƆ DIA LO BIBLE: “Onto l’onto asɛdingole etsha ande hita, ko nde ayoyonga la ɔkɔkɔ wa ngɛnangɛna lo kɛnɛ kasalande ndamɛ, koko aha lo ndjaɛdika l’onto okina.”—Ngalatiya 6:4.
Wɛɔdu: Awui akɔna wendana la lonto lami wahombami ndeka ndjalowanya? Etena kakɔna djekoleko kemi suke dia pembama dia nsala kɔlɔ? Lo awui akɔna wakokami ndeka nkɛnɛmɔla solo dia lotutsha?
TƆNDƆ DIA LO BIBLE: “Naka sho mbuta shate: ‘Sho keema la pɛkato,’ kete tekɔ lo ndjakesa.”—1 Joani 1:8.
Waetawɔ: Naa atɔndɔ wendana la lɔkɛwɔ wayelami ndo lande na? Onde dimi lekɔ la mbetawɔ le Nzambi? Tolembetelo takɔna tambetawoya ɔnɛ Nzambi ekɔ? Awui akɔna wɔsami dia wekɔ kɔlɔ ndo lande na? Awui akɔna wemi la mbetawɔ ɔnɛ wayokotshama lo nshi yayaye?
TƆNDƆ DIA LO BIBLE: “Dikoka di’ekanelo ka yimba diayokolamaka, ndo shɛnɔdi yayokokokɛka.”—Tokedi 2:11.
Enda ndo lo...
EKADIMWELO LO AMBOLA 10 WAYAOKA ƐLƆNGƆLƆNGƆ
Dimi eemi?
Mbeya kɛnɛ keyɛ mɛtɛ, akoka elelo ndo eyango ayokokimanyiya dia mbɔsa tɛdikɔ t’eshika la ntondo ka shɛngiya.
