Onto lele l’ekikelo ndjaokaka dimɛna esadi eto l’ɔkɔngɔ wa dui dimɔtshi dia kɔlɔ mbokomɛ. Akambo wakomɛ onto mbookonya dia monga la dikoka sɔ. L’ɛnyɛlɔ k’ɔna dikɛnda lahakoke mbeka lɔkɛndɔ ko hakwɛ lo tena dimɔtshi, mbele ndo onto hakoke ntondoya lo lɔsɛnɔ aha la mpomana l’ekakatanu lo tena dimɔtshi.

Ana amɔtshi kɔmɔka etena kahawatondoya dia nsala dui dimɔtshi, kahomanawɔ l’ekakatanu, kana kawaɔnyɔla anto akina. Akina pekɔka. Koko, vɔ pombaka nshihodia awui wayela anɛ:

• Aha mbala tshɛ mbayototondoyaka l’awui tshɛ wasalaso.​—Jakɔba 3:2.

• Onto tshɛ ayohomana l’ekakatanu lo lɔsɛnɔ lande.​—Ondaki 9:11.

• Wɛ kokaka ndjalowanya naka onto ɔmɔtshi ambokotɛ dia kɛnɛ kasalayɛ kekɔ kɔlɔ.​—Tokedi 9:9.

Ekikelo ayokimanyiya ɔnayɛ dia ndɔshana l’ekakatanu wa lo lɔsɛnɔ l’eshikikelo tshɛ.

Naka ɔnayɛ hakotshisha.

TƆNDƆ DIA LO BIBLE: “Nɛ dia onto ɔlɔlɔ mbeyaka nkɔ mbala 7, ko nde ayetɔ nto, koko akanga wa kɔlɔ wayotakana l’ɔtɛ wa mpokoso.”​—Tokedi 24:16.

Kimanyiya ɔnayɛ dia mbeya nshikikɛ dia kana okakatanu wekɔ wolo kana bu. Ɛnyɛlɔ, kakɔna kakokande nsala naka nde hakotshisha lo kalasa? Nde mbeyaka mpekɔ lo mbuta dia “ndooko k’ɔlɔ kakokami nsala.”

Kimanyiya ɔnayɛ dia nde mbeya woho wakokande nkotsha mbala kekina. Ngasɔ mbakokande nkandola okakatanu ɔsɔ lo dihole dia ndjakiyanya.

L’etena kakɔ kaamɛ, ewɔ dia kandolɛka ɔnayɛ ekakatanu wahomana la nde. Koko kimanyiyande dia nde mbeya woho wa ndjakandolɛka ekakatanu. Wɛ mbeyaka mombola ɔnɛ: “Akokayɛ nsala dia ndeka nshihodia dui dimɔtshi diakandeki?”

Etena katomba awui wa kɔlɔ.

TƆNDƆ DIA LO BIBLE: “Nyu hanyeye kɛnɛ kayonyokomɛ loyi.”​—Jakɔba 4:14.

Lɔsɛnɔ tshikitanaka. Onto lele ɔngɔnyi ɛlɔ mbeyaka monga wola loyi; onto lele la demba dia dimɛna ɛlɔ,  mbeyaka monga la hemɔ loyi. Bible mbutaka ɔnɛ: “Aha wanɛ wadja lowango mbatodjaka nshi tshɛ otshumba, aha akanga wa wolo mbalɛndja ta, nɛ dia tena ndo awui wa shashimoya mbakomɛka vɔ tshɛ.”​—Ondaki 9:11.

Oko weyɛ ombutshi, wɛ salaka tshɛ kakokayɛ nsala dia nkokɛ ɔnayɛ oma lo waale. Koko, wɛ hakoke nkokɛ ɔnayɛ oma lo dui tshɛ dia kɔlɔ diakoka mpomana la nde.

Lo mɛtɛ, mbeyaka monga ko ɔnayɛ atonge l’ɛnɔnyi wahombama dia mbikikɛ oshishelo w’olimu kana w’ekondjelo kande. Koko, wɛ koka mbokimanyiya dia ndɔshana l’ekakatanu ekina, ɛnyɛlɔ etena kahembɔ lɔngɛnyi lasande l’onto ɔmɔtshi kana kavushande ose nkumbo ɔmɔtshi. *

Etena katɛwɔ ɔnayɛ dia ndjalowanya l’awui amɔtshi.

TƆNDƆ DIA LO BIBLE: “Hokamɛ dako . . . dia wɛ ndjonga kanga lomba lo nshi yayaye.”​—Tokedi 19:20.

Naka onto ɔmɔtshi ambotɛ ɔnayɛ dia ndjalowanya lo dui dimɔtshi, dui sɔ hɛnya dia nde nangaka momadia kana nyangiya ɔnayɛ, koko nde nangaka mbokimanyiya dia ntshikitanya dui dimɔtshi diahombande ntshikitanya.

Naka wɛ mbetsha ɔnayɛ dia mbetawɔ engwelo, kete nyu ahende nyayokondja wahɔ. Ombutshi ɔmɔtshi welɛwɔ John mbutaka ɔnɛ: “Naka ana hawongɔma l’ɔtɛ wa munga yasalawɔ, kete vɔ hawotokondja wetshelo. Vɔ wayonga l’ekakatanu efula lo lɔsɛnɔ ndo oko weyɛ ombutshi, wɛ ayohomba ntetemala mbakandolɛ ekakatanu wayayangɛwɔ. Dui sɔ diayetɛ lɔsɛnɔ l’ambutshi ndo l’ana ololo.”

Ngande wakokayɛ nkimanyiya ɔnayɛ dia nkondja wahɔ oma lo engwelo kawosha anto akina? Naka wambongola ɔnayɛ lo kalasa kana dihole dikina tshɛ, totake ɔnɛ totowokoka mbongola lo yoho shɔ. Koko, wɛ koka mombola ɔnɛ:

• “Oko le yɛ, lande na kakawakongola lo yoho shɔ?”

• “Ahombayɛ nsala dia ndjalowanya lo dui diakɔ?”

• “Kakɔna kayoyosala mbala kekina kayoyohomana la dui diakɔ diaamɛ?”

Eya dia engwelo kayokimanyiya ɔnayɛ aha tsho l’etena kɛnɛ, koko polo ndo lam’ayondonga opalanga.