Okadimwelo wa dimbola sɔ wekɔ la nshɛngiya lo woho wɔsaso lɔsɛnɔ.

Lande na kele Nzambi ɔnɛ lakatonge diangɔ di’elangala efula mbetawɔ dia sho nsowa?

Wanɛ wahatɛmɔla mbɔsaka di’asui mbele ɔkɔkɔ wɛnya ɔnɛ Nzambi bu. Vɔ fɔnyaka di’asui mɛnyaka dia 1) Nzambi bu l’akoka wa mbakomiya, 2) Nzambi hayakiyanya dia nkomiya asui, kana ɔnɛ 3) Nzambi bu.

Onde awui asɔ ato mbɛnya lande na kasowa anto?

Nzambi kototonga dia sho ndjosowaka.

Nde kombolaka dia sho ngɛnangɛna la lɔsɛnɔ.

“Ndooko ɛngɔ kele dimɛna le wɔ [le anto] oleki ngɛnangɛna ndo nsala ɔlɔlɔ lo lɔsɛnɔ lawɔ, ndo dia onto tshɛ pombaka ndɛ, nnɔ ndo ngɛnangɛna l’ɔtɛ wa olimu ande tshɛ wa wolo. Ɔsɔ ekɔ woshasha wa Nzambi.”​—ONDAKI 3:12, 13.

Nzambi akasha anto ahende wa ntondo ɛngɔ tshɛ kakiwɔ l’ohomba dia nsɛna lɔsɛnɔ laha l’ekiyanu.

Nde kombatonga dia vɔ kana anawɔ ndjosowaka.

“Nzambi akawatɛ ate: ‘Nyootane, nyofulane, nyolodia nkɛtɛ ndo nyoyiole.’”​—ETATELO 1:28.

Anto ahende wa ntondo wakasɔnɛ dia mpindolɛ Nzambi.

Etombelo waki la dui sɔ ele, vɔamɛ wakayaela asui ndo le tokanula tawɔ tshɛ.

“Oko wakɔtɔ pɛkato l’andja oma le onto 1 ndo nyɔi oma lo pɛkato, ɔnkɔnɛ nyɔi kakadiangana le anto tshɛ dikambo anto tshɛ wakasale pɛkato.”​—RƆMƆ 5:12. *

Nzambi kototonga la dikoka dia sho ndjalɔmbɔla shoamɛ.

Oko wele sho kotongama dia sɛnaka l’ɛse k’ashi, mbele ndo sho bu l’akoka wa ndjalɔmbɔla shoamɛ.

“Lam’akɛndakɛnda onto, nde bu la lotshungɔ la nɔmbɔla kaanga ekolo ande.”​—JƐRƐMIYA 10:23.

Nzambi hakombola dia sho nsowa.

Nde kombolaka dia sho nsɛna lo yoho ya mbewɔ ekakatanu naka kokaka.

“Otoyodja yimba lo ɛlɛmbɛ ami lee! Tshike wɔladi ayɛ wotonga oko ɔkɛdi w’ashi.”​—ISAYA 48:18.