Lɔsɛnɔ la lo nkumbo ndo lɔngɛnyi
Anto efula wekɔ l’okakatanu dia ntetemala monga la diɔtɔnganelo dia dimɛna l’ase nkumbo ndo angɛnyi. Tayanga mɛna atɔndɔ amɔtshi wa lo Bible wakoka kokimanyiya dia ndeka monga la diɔtɔnganelo dia dimɛna l’anto akina.
TONGAKE KANGA LOKAKI
TƆNDƆ DIA LO BIBLE: “Tanyendake paka wahɔ anyu hita eto, koko nyendake ndo wahɔ w’anto akina.”—Filipɛ 2:4.
KƐNƐ KALEMBETSHIYA DUI SƆ: Naka wɛ mbika washo lo kɛnɛ kakokayɛ salɛ anto akina lo dihole dia mbika washo lo kɛnɛ kakokawɔ kosalɛ, kete wɛ ayonga la diɔtɔnganelo dia dimɛna la wɔ. Naka wɛ monga kanga lokaki kete wɛ koka ndanya diɔtɔnganelo diasayɛ l’anto akina. Ɛnyɛlɔ, otshukanyi wele la lokaki koka nshisha kɔlamelo le olonganyi ande. Ndo nto, ndooko onto layolanga mbɔtɔ lɔngɛnyi l’onto layafuna tena tshɛ l’ɔtɛ wa kɛnɛ kele la nde ndo l’ɔtɛ wa kɛnɛ keyande. Dibuku dimɔtshi dia nshi nyɛ mbutaka ɔnɛ: “Anto wayakiyanya paka dikambo dia wahɔ awɔ to ndo wahayakiyanya dikambo di’anto akina, wayonga l’ekakatanu efula.”
KƐNƐ KAKOKAYƐ NSALA:
-
Kimanyiya anto akina. Angɛnyi w’eshika mbɛkanɛka etema ndo mongaka suke dia kimanyiyana tena tshɛ. Wekelo ɛmɔtshi mɛnyaka dia wanɛ wakimanyiya anto akina hawoleke monga l’ɔkɔmwɛlɔ ndo mongaka l’ɔngɛnɔngɛnɔ.
-
Oka anto akina kɛtshi. Mboka onto kɛtshi kɛdikɛdi nkanyiya paa kele la nde ndo ndjadja lo dihole diande. Naka wɛ mbokanaka kɛtshi, kete ayonga wolo wɛ nkamba l’ɛtɛkɛta wa diɔnyɔ, mbuta ate ɛtɛkɛta wokɛma oko wa shɛkɛsɛkɛ ko tetele wekɔ lo nyangiya onto okina.
Naka wɛ mbokanaka kɛtshi, kete wɛ hatodja yimba lo munga y’anto akina. Ɔnkɔnɛ, naka wɛ mbokanaka kɛtshi, kete dui sɔ diayokokimanyiya diaha kanɛ anto akina kɔlɔ ndo mbɔtɔ lɔngɛnyi l’anto wele la mbekelo yotshikitanyi kana w’oma l’ahole akina.
-
Etshaka wenya kaamɛ l’anto akina. Etena ketshayɛ wenya efula kaamɛ l’anto akina mbayoyotalekaka mbaeya dimɛna. Wɛ pombaka sawolaka l’anto akina asawo w’amɛna l’oyango wa mbɔtɔ lɔngɛnyi l’oshika la wɔ. Ɔnkɔnɛ, onga onto lahokamɛ dimɛna. Ɛnya dia wɛ mbidjaka yimba lo kɛnɛ kayakiyanya ɔngɛnyi ayɛ. Wekelo ɔmɔtshi weke kasalema mbutaka dia “asawo w’eshika mbeyaka mɛtɛ mbisha anto ɔngɛnɔngɛnɔ w’efula.”
SƆNA ANGƐNYI LA LOMBA
TƆNDƆ DIA LO BIBLE: “Lɔngɛnyi la kɔlɔ ndanyaka mbekelo y’ɛlɔlɔ.”—1 Kɔrɛtɔ 15:33, nɔtɛ.
KƐNƐ KALEMBETSHIYA DUI SƆ: Anto wetsha la yɛ wenya kaamɛ mongaka la shɛngiya ya wolo le yɛ, y’ɔlɔlɔ kana ya kɔlɔ. Wanɛ weka waonga w’anto mbutaka dia angɛnyi w’onto kokaka monga la shɛngiya ya wolo l’awui efula wa lo lɔsɛnɔ lande. Ɛnyɛlɔ, onto ɔmɔtshi mbeyaka ntatɛ nnɔ mfɔka kana nyanga dia ndjaka diwala naka nde ekɔ l’angɛnyi wasala awui asɔ.
KƐNƐ KAKOKAYƐ NSALA: Ɔtɔ lɔngɛnyi l’anto wele la waonga ndo wele l’atɔndɔ walangayɛ mbokoya. Ɛnyɛlɔ, sala la wolo dia mbɔtɔ lɔngɛnyi l’anto wele la shɛnɔdi, wele la dilɛmiɛlɔ, wele la lokaho ndo walongɔna.
ATƆNDƆ AKINA WA LO BIBLE
Enda tovidɛo tele l’awui w’oma lo Bible takasalema dia nkimanyiya atshukanyi, ana watomangase ndo ɛlɔngɔlɔngɔ dia ndeka monga la lɔsɛnɔ la nkumbo la dimɛna
EWƆ TONDJANƐ EFATA.
“Ɛtɛkɛta w’otondjatondja watohomuyaka oko lokuwa.”—TOKEDI 12:18.
ONGA LA LOKAHO.
“Kanga lokaho ayɔngɔna.”—TOKEDI 11:25.
SALƐ ANTO AKINA AKAMBO WOHO WALANGAYƐ VƆ KOSALƐ.
“Akambo tshɛ . . . walanganyu anto nyosalɛ, nyu la wɔ pombaka mbasalɛwɔ.”—MATEO 7:12.
