TƆNDƆ DIA LO BIBLE: “Onto lahoke nkɛlɛ esadi ndeka pami ka wolo, ndo ɔnɛ layakimɛ ndeka ɔnɛ lalɛndja osomba.”​—Tokedi 16:32.

KƐNƐ KALEMBETSHIYA DUI SƆ: Naka sho nsala la wolo dia mbahemɛ nkɛlɛ kaso, kete tayokondja wahɔ. Kaanga mbele lo tena dimɔtshi sho koka monga l’ɔkɔkɔ wa momala, naka hataheme nkɛlɛ kaso, kete tɔ koka monga l’etombelo wa kɔlɔ efula. Anyangiyangi amɔtshi wa nshi nyɛ mɛnyaka dia mbala efula, anto wele la nkɛlɛ mbutaka kana salaka awui wayowonyangaka l’ɔkɔngɔ.

KƐNƐ KAKOKAYƐ NSALA: Eka woho wa mbahemɛ nkɛlɛ kayɛ la ntondo ka tɔ kahemɛ. Anto amɔtshi fɔnyaka di’akanga wa nkɛlɛ wekɔ la wolo, ko tete le vɔ wekɔ wɔdu. Bible mbutaka ɔnɛ: “Oko osomba wambohandjɔ, waha la lokombo, ngasɔ mbele onto lahayakimɛ.” (Tokedi 25:28) Yoho mɔtshi ya dimɛna ya mbahemɛ nkɛlɛ kayɛ, ele nyanga dia mbeya kɛnɛ kakatombi mɛtɛ la ntondo ka mbuta kana nsala dui dimɔtshi. ‘Lo mɛtɛ, shɛnɔdi yele l’onto kitshakitshaka nkɛlɛ kande.’ (Tokedi 19:11) Ayonga dimɛna sho mpokamɛ la yambalo tshɛ wedi akɔ ehende, ko dui sɔ diayotosha shɛnɔdi yayotokimanyiya dia nkitshakitsha nkɛlɛ kaso.

TƆNDƆ DIA LO BIBLE: “Nyɛnya dia nyekɔ la lowando.”​—Kɔlɔsayi 3:15.

KƐNƐ KALEMBETSHIYA DUI SƆ: Anto mbutaka dia paka onto lele la lowando mbakoka monga l’ɔngɛnɔngɛnɔ. Kaanga anto amɔtshi wambovushaka wakiwɔ amɔtshi wa ngandji kana ema kɛmɔtshi ka nɛmɔ kokaka mbuta dia dui sɔ diekɔ mɛtɛ. Vɔ mbutaka dia kɛnɛ kakaakimanyiya dia ntondoya  ele monga la lowando lo kɛnɛ kele la wɔ lo dihole dia kanyiyaka paka kɛnɛ kakawashisha.

KƐNƐ KAKOKAYƐ NSALA: Lushi tshɛ, salaka listɛ l’awui weyɛ la lowando lɔkɔ. Aha paka awui wa weke ato. Kana yimba kaanga lo awui wa totshitshɛ, ɛnyɛlɔ woho wonga wonya olangala etena kayawatombe, etena kamɔtshayɛ sawo la lakiyɛ ɔmɔtshi la ngandji, kana lo woho wamboyohotoya lushi lokina la lɔsɛnɔ. Awui asɔ koka ndeka kosha ɔngɛnɔngɛnɔ naka wɛ kanaka la wɔ yimba ndo monga la lowando l’ɔtɛ w’awui akɔ.

Naka wɛ nkanyiya lande na keyɛ la lowando lo dikambo dia nkumbo kayɛ ndo di’angɛnyi ayɛ, kete dui sɔ diayoleka kokimanyiya. Etena kɛnayɛ dui dimɔtshi diangɛnangɛnayɛ le anto akina, tɛwɔ dui diakɔ, oyadi okoko l’okoko kana lo mukanda, lo mbofundɛ mesajɛ l’Ɛtɛrnɛtɛ kana lo telefɔnɛ. Ondo dui sɔ diayokeketsha lɔngɛnyi lanyu ndo diayokokimanyiya dia monga l’ɔngɛnɔngɛnɔ waya lo mbisha.​—Etsha 20:35.

EWƆ EWANU.

“Ntatɛ la ta ekɔ oko mbikola nkonge, la ntondo k’owanu ntomba, nya demba.”​—TOKEDI 17:14.

TOYAKIYANYAKE OKIYANYAKIYANYA DIKAMBO DIA NSHI YAYAYE.

“Tanyoyakiyanyake pondjo dikambo dia loyi, nɛ dia loyi ayonga la ekiyanu alɔ. Lushi la lushi lekɔ la ekakatanu alɔ.”​—MATEO 6:34.

TOSALAKE AKAMBO LO NDJELA WOHO WAYAOKAYƐ, NKANA YIMBA DIMƐNA NTONDO KA NSALA DUI DIMƆTSHI.

“Dikoka di’ekanelo ka yimba diayokolamaka, ndo shɛnɔdi yayokokokɛka.”​—TOKEDI 2:11.