Tonge la ngandji
Okakatanu
Totshelo ta nkanɛ anto kɔlɔ hashile esadi. Paka oko watɔsamaka etena k’otale ndo welo efula dia hemɔ nshila, mbele mbɔsaka etena ndo welo efula dia minya tshelo ya nkanɛ anto kɔlɔ. Kakɔna kakoka kokimanyiya dia minya tshelo ya nkanɛ anto kɔlɔ yele la yɛ?
Tɔndɔ dia lo Bible
“Nyɔlɔtɛ ngandji, nɛ dia tɔ kele dimama dia kokele.”—KƆLƆSAYI 3:14.
Kakɔna katetsha divɛsa nɛ? Salɛ anto akina akambo w’ɛlɔlɔ konyaka di’anto monga kaamɛ. Etena tshɛ kayoyotalekaka mɛnya anto akina ngandji, mbayotakitakitaka tshelo ya nkanɛ anto kɔlɔ yele la yɛ. Etena kayoyotalekaka mboka anto akina ngandji, mbayoyotalekaka minya lohetsho lele la yɛ otsha le anto akina.
Kɛnɛ kakokayɛ nsala
Yanga toho shikaa takokayɛ mɛnya ngandji otsha le anto wa l’olui wɔsayɛ dia ondo wekɔ anto wa kɔlɔ. Awui asɔ hɛnya dia paka sho mbeya oseka kiambokambo tshɛ. Hemba nsala dui ɔtɔi kana awui efula lo awui wayela anɛ:
Naka wɛ nsala totshelo ta toshitshɛ ta ngandji tɔsɔ, kete wɛ ayonya tshelo ya nkanɛ anto kɔlɔ
Ɛnya anto w’oma l’olui akɔ awui w’ɛlɔlɔ wele oko, mbadiholɛ lokuke kana tshikɛ ɔmɔtshi la l’atei awɔ dihole lo mutuka wɛmba anto.
Hemba ntatɛ nsawola la wɔ yema, kaanga mbewɔ hawoleke mbeya ɔtɛkɛta watɛkɛtayɛ dimɛna.
Onga la solo dia lotutsha etena kasalawɔ akambo lo yoho yahayashihodia.
Okawɔ kɛtshi etena katɛkɛtawɔ awui wendana l’ekakatanu awɔ.