Lande na kele ekɔ ohomba mbeya ɔnɛ Otungi ɔmɔtshi ekɔ

MPOKAMƐ LO

Lande na kele ekɔ ohomba mbeya dia kana Otungi ɔmɔtshi ekɔ? Naka wɛ ekɔ la tolembetelo takoshikikɛ dia Nzambi Kanga-Wolo-Tshɛ ekɔ, kete laasɔ wɛ ayokombola nsɛdingola tolembetelo tɛnya dia Bible ndja oma le nde. Ndo naka wɛ ndjaɛkɛ lo kɛnɛ kata Bible, kete wɛ ayokondja wahɔ lo awui wayela anɛ:

Wɛ ayonga la lɔsɛnɔ lele l’oyango

BIBLE MBUTAKA ƆNƐ: “[Nzambi akasale] akambo w’ɛlɔlɔ lo nyɔlɔshɛ avula oma l’olongo, lo nyosha deko diangɔnya diangɔ ndo lo ndodia etema anyu la mbo ya ndɛ ndo l’ɔngɛnɔngɛnɔ.”—Etsha 14:17.

KƐNƐ KALEMBETSHIYA DUI SƆ: Ɛngɔ tshɛ ka ngɛnangɛnayɛ la tɔ l’andja ɔnɛ kekɔ woshasha woma le Otungi. Wɛ ayonga la lowando lo weshasha ɛsɔ tshɛ etena kasholayɛ polo lo yɛdikɔ yakɔna yayakiyanya Ombishi adiɔ lo dikambo diayɛ.

Tana alako w’amɛna wayokɔlɔmbɔlaka lo lɔsɛnɔ la lushi la lushi

BIBLE MBUTAKA ƆNƐ: “Wɛ ayoshihodia kɛnɛ kele ɔlɔlɔ, losembwe ndo osembɔki, mboka k’otondo ka kɛnɛ kele ɔlɔlɔ.”—Tokedi 2:9.

KƐNƐ KALEMBETSHIYA DUI SƆ: Oko Otungi ayɛ, Nzambi mbeyaka kɛnɛ keyɛ la tɔ ohomba dia wɛ monga la ɔngɛnɔngɛnɔ. Etena kayoyadiaka Bible, wɛ ayokoka mbeka awui efula wayokoka kokondjiyɛ wahɔ l’etena kɛnɛ.

Kondja ekadimwelo lo ambola ayɛ

BIBLE MBUTAKA ƆNƐ: “Wɛ ayotana ewo ka Nzambi.”—Tokedi 2:5.

KƐNƐ KALEMBETSHIYA DUI SƆ: Mbeya ɔnɛ Otungi ekɔ, koka kokimanyiya dia nkondja ekadimwelo lo ambola w’ohomba anɛ: Oyango akɔna wele la lɔsɛnɔ? Lande na kambololanɛ asui? Ngande wongaso etena kavɔso? Wɛ koka ntana ekadimwelo w’amɛna lo Bible.

Kondja elongamelo kendana la nshi yayaye

BIBLE MBUTAKA ƆNƐ: “‘Dimi mbeyaka dimɛna tokanyi takanyiyami dikambo dianyu,’ mbata Jehowa, ‘tokanyi ta wɔladi, koko aha ta mpokoso, dia nyosha nshi yayaye ndo elongamelo.’”—Jɛrɛmiya 29:11.

KƐNƐ KALEMBETSHIYA DUI SƆ: Nzambi ekɔ lo ndaka dia lo nshi yayaye nde ayonya awui wa kɔlɔ, asui ndo kaanga nyɔi. Etena kayaɛkɛyɛ lo alaka wa Nzambi, elongamelo kayɛ ka nshi yayaye kayokokimanyiya dia ndɔshana la dihonga tshɛ ekakatanu wa lushi la lushi.

Woho wakakondja anto amɔtshi wahɔ lo monga la mbetawɔ le Otungi

“L’ekɔ lo ntetemala mamba etena kɛnami woho watokimanyiya Nzambi lo awui efula wa lo lɔsɛnɔ. Nde tokimanyiyaka dia mbeya kɛnɛ koleki ohomba lo lɔsɛnɔ, woho wa nsɛna l’anto akina ndo monga ɔngɛnyi wa Nzambi.”—Cyndi, ÉTATS-UNIS.

“Monga la mbetawɔ le Otungi ambokimanyiya dia monga la lɔsɛnɔ l’ɔngɛnɔngɛnɔ. Dimi kokiyana pondjo ntatɛ lam’akamonge la mbetawɔ le Nzambi, ekɔ awui efula wahombami mbeka lo dikambo dia Nde, di’etongelo kande ndo dia Ɔtɛkɛta ande.”—Elise, France.

“Kamba la kɛnɛ katetsha Otungi oma lo Bible ambokimanyiya dia monga onto lele l’ɔngɛnɔngɛnɔ. Dui sɔ ambokimanyiya diaha dimi monga kanga diɔnyɔ, ndeka ndjasha le anto, ndo ndeka monga l’ɔngɛnɔngɛnɔ. Dui sɔ ambokimanyiya nto dia monga papa ka dimɛna efula.”—Peter, Pays-Bas.

“La ntondo ka dimi mbeka awui wendana la Nzambi, awui wakamalekaka ndjasha lɔkɔ ele ndɛ, ndala djɔ ndo salaka la wolo dia komaka la wonya l’olimu. Lakikɔ l’ekiyanu efula! Wonya ɔnɛ lɛɛna dia lɔsɛnɔ lekɔ woshasha wa diambo efula wakakongɛma dia ngɛnangɛna lalɔ ndo mboliɔsaka la nɛmɔ.”—Liz, Estonie.

“Dimi lekɔ onto layakiyanya efula. Koko mbeya ɔnɛ awui wa kɔlɔ, awui wa wɛngiya ndo asui wayokomɛ lushi lɔmɔtshi, dui sɔ kimanyiyakami dia mbikikɛ.” Adrien, France.

Enda ndo lo...

EMƆ!

Mboka k’ɔngɛnɔngɛnɔ—Oyango lo lɔsɛnɔ

Nkondja ekadimwelo w’eshika lo ambola w’ohomba wa lo lɔsɛnɔ ekɔ dui dimɔ diasha ɔngɛnɔngɛnɔ.

EMƆ!