Ɔlɔtɔ ndo ɔlɔngɔswɛlɔ ami wa divo mbaki otakanya le mi

KƆNDWAMA OMA LE EILEEN BRUMBAUGH

DIMI lakodiama l’ɔtɛmwɛlɔ wa waa Frères baptistes allemands du vieil Ordre (Old Order German Baptist Brethren), ndo ɔtɛmwɛlɔ ɔsɔ fɔnaka la wa waa Amish ndo waa Mennonite. Ɔtɛmwɛlɔ akɔ wakatatɛ l’Allemagne lo 1708 ndo vɔ waki l’atei w’ɛtɛmwɛlɔ w’eyoyo wakawelɛka ɔnɛ piétisme. Dibuku dimɔtshi (Encyclopedia of Religion) mbutaka di’ɛtɛmwɛlɔ wakawelɛka ɔnɛ piétisme waketshaka “di’anto wekɔ l’ohomba wa evanjiliɔ wa Kristo.” Wetshelo ɔsɔ mbakayokonyaka di’ɔtɛmwɛlɔ ɔsɔ ntoma wa misiɔnɛrɛ lo wedja efula.

Lo 1719, djui mɔtshi y’anto ya l’ɔtɛmwɛlɔ ɔsɔ wakalɔmbwamaka oma le Alexander Mack wakakome l’osomba welamɛ nshi nyɛ ɔnɛ Pennsylvanie l’États-Unis. L’ɔkɔngɔ wa laasɔ, ɔtɛmwɛlɔ wakayatɔnaka lo tolui tolui ko anto l’anto wakatatɛ nembetshiya lo yoho yawɔ wetshelo waki Alexandre. Yaato yaso y’ɔtɛmwɛlɔ yaki l’anto oko 50. Yaato yakɔ yakakekeshaka anto awɔ dia mbadiakaa Bible efula ndo dia vɔ kitanyiyaka akambo tshɛ wakawatɛka ɔtɛmwɛlɔ.

Nkumbo kaso kaki lɔlɔnga la sato la mbɔtɔ yo yaato y’ɔtɛmwɛlɔ shɔ ndo tɔ kakakukutɛ dietawɔ ndo yoho ya lɔsɛnɔ l’ɔtɛmwɛlɔ ɔsɔ. Dimi lawɔ lakɔtɔ l’ɔtɛmwɛlɔ ɔsɔ ndo lakabatizama lam’akimi l’ɛnɔnyi 13. Lakodiama la dietawɔ di’ɔnɛ hatokoke nkamba la mutuka, trakɛtɛrɛ, telefɔnɛ, kaanga radio kana ɛngɔ kekina tshɛ kakamba la kura. L’ɔtɛmwɛlɔ aso wamato kɔndɔtaka lo yoho ya kawotake, sho kominyaka divo ndo kotshikaka ɔtɛ hwe. Apami wa l’ɔtɛmwɛlɔ aso wakatshikaka ndɛdu. Le so monga aha anto wa l’andja ɔnɛ akalembetshiyaka ntona dia ndɔta oko anto akina, ntona dia nkita pudrɛ, ntona dia ndɔta azama, tɔshɛnɛtɛ, kana dɛngalɛnga dikina nɛ dia ɔsɔ aki oko pɛkato le so.

Wakatetshaka dia mbɔsa Bible la nɛmɔ di’efula, nɛ dia tɔ mbakatoleshaka lo nyuma. Lushi tshɛ la pindju la ntondo ka sho ndɛ, papa akasalaka wadielo wa tshapita mɔtshi ya Bible ndo sho tshɛ takadjasɛka lo salɔ dia mpokamɛ wadielo ndo nde akalembetshiyaka kɛnɛ kakinde oma la mbadia. Ndo sho tshɛ takakaka adwe etena kakasalaka papa dɔmbɛlɔ. Oma laasɔ, mama akatomaka Dɔmbɛlɔ dia Shɛso lele l’olongo. Lakakombolaka ntena tshɛ monga la pindju l’ɔtɛmwɛlɔ wa lo nkumbo, nɛ dia nkumbo k’otondo taki kaamɛ dia mbidja yimba l’akambo wa lo nyuma.

Takadjasɛka l’ekambɔ kaso kaki suke l’osomba wa Delphini la Indiana, lɛnɛ akatonɛka diangɔ weho la weho. Takatshɔka otsha la vilɛ lo mponda kakatakotolaka pusupusu kakatalɔngɛ diangɔ dia tosondja dlo toshinga kana lo soko la soko. Takafɔnyaka dia olimu wa wolo wakatasalaka ɔsɔ waki etenyi k’olimu wakatakambɛka Nzambi. Diakɔ diakatayashaka efula l’olimu, onyake lushi la lomingu, lushi lele sho kokokaka nkamba “olimu wa wolo.” Lo ntena dimɔtshi, nkumbo kaso kakayashaka l’olimu wa dikambɔ ko akongaka yema wolo sho ndjasha l’akambo wa lo nyuma.

Diwala ndo nkumbo

Lo 1963, lam’akimi la ɛnɔnyi 17, takatshukana dimi la James, nde aki ɔmɔtshi la l’ɔtɛmwɛlɔ aso. Lo nkumbo kawɔ, ɔnɛ lakote tshɛnde mbaki onto la ntondo lo nkumbo kawɔ l’ɔtɛmwɛlɔ ɔnɛ. Sho akɔ ahende taki la nsaki ka kambɛ Nzambi ndo taki la mbetawɔ ɔnɛ ɔtɛmwɛlɔ aso mbaki tshɔi y’ɔtɛmwɛlɔ wa mɛtɛ.

Oya lo 1975 taki l’ana asamalo, ndo oya lo 1983 ɔnaso l’esambele ndo la komelo akotɔ. Rebecca, ɔnaso la hende aki tshɔi y’ɔnaso la womoto. Sho takakambaka efula, koko taki ya yoomba ya dikuta, ndo takasɛnaka lɔsɛnɔ l’ɔsɛlɛngɛ. Takahembe dia monɛ l’etema w’anaso atɔndɔ wa lo Bible wakateke oma le ambutshi aso ndo oma l’ɔtɛmwɛlɔ wa waa “Vieux Frères.”

Ɛnamelo ka l’andja k’onto mbaki ohomba efula le wɔ. Lam’ele ndooko onto lakoka mɛna kɛnɛ kele l’otema, ɛnamelo kande mɛnyaka woho w’onto wende mɛtɛ. Laasɔ naka ɔna womoto mbɛla mɛshɛ, kete kɛsɔ mɛnyaka dia nde ekɔ kanga otako. Naka onto ambɔlɔta dihɔndɔ dimɔtshi diele la sango dia woke efula, ɔsɔ nto ekɔ djembetelo y’otako. Lo ntena dimɔtshi, takalelaka ndjela awui asɔ oleki ndo kɛnɛ kofundami lo Bible.

Dui dimɔtshi diakatombe lo lokanu

L’ekomelo k’ɛnɔnyi wa 1960, ɔnango omɛmi lakawelɛkaJesse, lakodiama nde lawɔ l’ɔtɛmwɛlɔ aso akadjama lo lokanu nɛ dia nde akatone mbɔtɔ l’olimu w’ɔsɔlayi. Etena kakinde lo lokanu nde akahomana l’Ɛmɛnyi wa Jehowa wakeyaka vɔ lawɔ ɔnɛ mbɔtɔ l’olimu w’ɔsɔlayi ndo ndɔ ta hɔtɔnɛ l’atɔndɔ wa lo Bible. (Isaya 2:4; Mateo 26:52) Jesse akasawolaka l’Ɛmɛnyi ɛsɔ akambo efula wa lo Bible, ndo nde akasɛdingolaka la yambalo tshɛ dionga diawɔ. Oma l’ɔkɔngɔ wa nde mbeka Bible l’etenyi k’otale, nde akabatizama ko akakome Ɔmɛnyi wa Jehowa, dui diakiso kɔngɛnangɛna kaanga yema.

Jesse akatɛ omɛmi awui wakandeke. Nde akasale tshɛ dia James kondjaka mbala tshɛ Tshoto y’Etangelo ndo Emɔ! Wadielo wa periodikɛ shɔ wakokimanyiya dia nde ndeka ndjasha lo akambo wa lo Bible. Kaanga mbakalangaka James kambɛ Nzambi, nde kondjaokaka suke suke la nde, koko nde akayashaka efula lo dui tshɛ diakakokaka mbosukanya suke suke la Nzambi.

Dikumanyi diaso wakatokeketshaka dia sho mbadiaka ekanda wa waa Amish, wa waa Mennonite, ndo w’ɛtɛmwɛlɔ wa totshitshɛ wakatombe oma l’ɔtɛmwɛlɔ wa waa “Vieux Frères,” kaanga mbakatɔsaka ɛtɛmwɛlɔ ɛsɔ dia wekɔ ase andja ɔnɛ. Koko papa aki la tokanyi ta kɔlɔ otsha le Ɛmɛnyi wa Jehowa. Ndo nde konangaka kaanga yema dia sho mbadia Tshoto y’Etangelo kana Emɔ! Diakɔ diakimi kɔngɛnangɛna mɛna James adia ekanda akɔ. Laki la wɔma wa nde ndjokotwama otsha lo wetshelo wa kashi.

Koko oma k’edjedja, James aki la taamu lo kɛnɛ kendana la wetshelo ɛmɔtshi w’ɔtɛmwɛlɔ wa waa “Vieux Frères,” wakandɔsaka dia hawɔtɔnɛ la Bible, djekoleko wetshelo wakataka dia ekɔ pɛkato nkamba “oseka olimu tshɛ wa wolo” Lushi la lomingu. Ɛnyɛlɔ, ɔtɛmwɛlɔ wa waa “Vieux Frères,” waketshaka dia keema kɔlɔ nɔsha dongalonga ashi Lushi la lomingu, koko ekɔ kɔlɔ mɔmbɛ adiyo. Dikumanyi kokoka mbosha ɔkɔkɔ w’oma l’Afundelo wendana la ɔlɛmbɛ ɔsɔ. Yema yema dimi lawɔ lakayotatɛka monga la taamu lo wetshelo ɛsɔ.

Lam’ele oma k’edjedja taketawɔka dia paka ɔtɛmwɛlɔ aso oto mbetawɔma le Nzambi ndo takeyaka kɛnɛ kakoka tokomɛ naka sho mimɔ oma lɔkɔ, takɛnyi dia ekɔ wolo sho ntomba oma l’ɔtɛmwɛlɔ wa waa “Vieux Frères,” koko, nkum’etema yaso kokoka totshika ki naka sho ntshikala l’ɔtɛmwɛlɔ wamboteya ɔnɛ hawoyele tshɛ lo tshɛ atɔndɔ wa Bible. Diakɔ diele lo 1983, takafunde mukanda wakalembetshiyaka ɛkɔkɔ wakatalange mimɔ ndo takaalɔmbɛ dia vɔ mbadia mukanda akɔ la ntondo k’ɔtɛmwɛlɔ. Takatshanyema oma lo ɔtɛmwɛlɔ ɔsɔ.

Oyangelo w’ɔtɛmwɛlɔ wa mɛtɛ

Oma laasɔ, takatatɛ nyanga ɔtɛmwɛlɔ wa mɛtɛ. Takayangaka ɔtɛmwɛlɔ wa mɛtɛ wele anto wa lɔkɔ wekɔ lo nsala akambo wetshawɔ anto akina. Ntondotondo, ɔtɛmwɛlɔ ɔsɔ takawahombe nsukɛ akambo w’ata. Ndo takangɛnangɛnaka ɛtɛmwɛlɔ “wahayasha l’ɛngɛnɔngɛnɔ wa lo lɔsɛnɔ,” nɛ dia takafɔnyaka dia lɔsɛnɔ l’ɔsɛlɛngɛ ndo mbewɔ ndɔta oko anto akina mbɛɛnya di’ɔtɛmwɛlɔ bu wa l’andja ɔnɛ. Oma lo 1983 polo 1985, takatshungola etena ka mbeteta lo wodja aso, lo tasɛdingolaka ɔtɛmwɛlɔ ɔtɔi ɔtɔi, ɛnyɛlɔ wa waa Mennonites, wa waa Quakers, ndo ɛtɛmwɛlɔ ekina “wahayasha l’ɛngɛnɔngɛnɔ wa lo lɔsɛnɔ.”

L’etena kɛsɔ, Ɛmɛnyi wa Jehowa wakayaka lo ntena dimɔtshi ndjotembola l’ekambɔ kaso suke l’osomba wa Camden la Indiana. Takaahokamɛka, takaalɔmbaka dia nkamba paka la ekadimwelo ka Bible du roi Jacques. Lakasukɛka woho wakatonaka Ɛmɛnyi ndɔ ta. Koko aki dui dia wolo le mi dia mbaetawɔ nɛ dia lakafɔnyaka dia naka vɔ hawɛnyi ohomba wa ntshikitana l’andja ɔnɛ l’ɔlɔtɔ, kete vɔ hawokoke monga ɔtɛmwɛlɔ wa mɛtɛ. Lakate dia vɔ waki etako, ndo otako mbakaatshutshuyaka dia vɔ ndɔta otshikitanyi la woho wakatalɔtaka. Lakafɔnyaka dia monga l’ekondjelo ndo la lomombo konyaka onto otako.

James akatatɛ ntshɔ lo Mbalasa ka Diolelo k’Ɛmɛnyi wa Jehowa, ndo akatshɔka kaamɛ l’anaso amɔtshi w’apami. Dimi kɔngɛnangɛnaka. Omɛmi akankeketsha dia dimi ntshɔ kaamɛ la nde, koko dimi kombetawɔ. Lushi lɔmɔtshi nde akate ate “kaanga mbahayetawɔ wetshelo awɔ tshɛ, tshɔka tsho teende woho wasalanɛwɔ akambo.” Kɛsɔ kakawonanda efula.

L’ekomelo, lakayɔsaka yɛdikɔ ya ntshɔ kaamɛ la wɔ, koko laki la yewo y’efula. Lakɔtɔ lo Mbalasa ka Diolelo l’okutu ami w’otshobobo ndo lofulɛ l’ɔtɛ. Anaso amɔtshi waki ekolo hwe koko wakalɔtɛ woho akɔ waamɛ. Koko Ɛmɛnyi wa Jehowa wakaye oya le so ndo wakatolongola la ngandji tshɛ. Ko lakate nte: ‘Kaanga mbotshikitanyiso la wɔ, vɔ tetawɔka woho weso!’

Kaanga mbakamanandema lo woho wakawatɔkɛnɛmɔlɛ ngandji, dimi lakate dia layotokenda akambo paka la washo. Dimi komemala etena kakawembaka esambo awɔ. Oma l’ɔkɔngɔ wa nsanganya, lakawaoke ambola efula l’awui wakamafɔnyaka dia vɔ kosalaka dimɛna kana l’elembetshiyelo w’avɛsa amɔtshi. Kaanga mbakimi kombokaka ambola amɔtshi lo yoho ya dimɛna, onto tshɛ lakamokaka ambola akɔ akandjelaka la yambalo. Dui diakamambiyaka nto ele lakakokaka mboka dimbola ɔtɔi le anto wotshikitanyi, koko lakakondjaka paka okadimwelo akɔ waamɛ. Mbala mɔtshi wakafundɛka okadimwelo lo dikatshi, kɛsɔ akakimanyiyaka nɛ dia lakakokaka ndjɔsɛdingola awui akɔ dimɛ l’ɔkɔngɔ.

Lo nshi yɔwɔ ya lo 1985, nkumbo kaso kakatshu lo losanganya lɔmɔtshi la woke l’Ɛmɛnyi wa Jehowa la Mimphis (Tennessee)​—takatshu tsho dia sho teenda. James aki la ndɛdu kandaa, ndo sho takalɔtɛ woho watotɔlɔtaka l’ɔtɛmwɛlɔ aso. Wonya wa diomuyelo anto wakayaka ndjotosawoya wonya tshɛ. Takakotwama oma lo ngandji kawɔ, yambalo yawɔ oya le so ndo vɔ kombidjaka yimba lo ɛnamelo kaso kakatshikitana lawɔ. Dui dikina dia diambo ele kaamɛ kaki lam’asawɔ, nɛ dia dihole tshɛ diakatasanganaka, wetshelo waki woho waamɛ.

James, akakotwama lo woho wakayasha Ɛmɛnyi le nde, ko nde akayetawɔka mbeka lawɔ Bible. Nde akasɛdingolaka akambo dimɛna dimɛna dia monga l’eshikikelo lo kɛnɛ kakandekaka. (Etsha 17:11; 1 Tɛsalɔnika 5:21) Yema yema, James akayetawɔka dia nde amboshola akambo wa mɛtɛ. Koko dimi komonga suke dia mbɔsa yɛdikɔ. Dimi lakalangaka nsala kɛnɛ kele ɔlɔlɔ, koko dimi konangaka “ntshikitanya yoho yami la lɔsɛnɔ” ko mbɔsama oko “ose andja ɔnɛ.” Etena kakametawɔ mbala kami ka ntondo dia mbeka Bible, laki la Bible du roi Jacques lo dwe nɛ ko Ekadimwelo k’andja w’oyoyo lo dwe dikina. Lakɛdikaka divɛsa tshɛ lo dikadimwelo diakɔ dihende dia Bible dia ndjashikikɛ ɔnɛ hawokesi.

Kɛnɛ kakakimanyiya dia mbetawɔ

Lam’akamatekaka l’Ɛmɛnyi, takeke dia Shɛso lele l’olongo ekɔ Nzambi ɔtɔi, koko aha nzambi shato lo nzambi ɔtɔi, ndo di’ɔnɛ sho tekɔ anima, koko aha ɔnɛ tekɔ la anima wahavu. (Etatelo 2:7; Eohwelo k’Ɛlɛmbɛ 6:4; Ɛzɛkiyɛlɛ 18:4; 1 Kɔrɛtɔ 8:5, 6) Sho takeke nto dia ifɛrnɔ ekɔ diombo di’anto tshɛ, koko aha dihole dialongola anto lo dja. (Jɔbɔ 14:13; Osambo 16:10; Ondaki 9:5, 10; Etsha 2:31) Mbeya kɛnɛ kele mɛtɛ lo dikambo di’Ifɛrnɔ aki dui dia diambo efula nɛ dia waa “Vieux Frères,” kombetawɔka kitshimudi y’ifɛrnɔ shɔ.

Koko, lakatetemala ndjambola ɔnɛ ngande wakoka ɔtɛmwɛlɔ w’Ɛmɛnyi monga ɔtɛmwɛlɔ wa mɛtɛ etena kɛnɛ kele lo kanyi yami lekɔ lo mbaɔsa oko ase andja ɔnɛ. Vɔ hawotone monga la lɔsɛnɔ la “ndjangɛnyangɛnya” lakamafɔnyaka dia lɔ bu ohomba. Koko kaanga mbediɔ ngasɔ, vɔ kitanyiyaka didjango diaki Yeso diendana la nsambisha anto tshɛ lokumu l’ɔlɔlɔ la Diolelo. Laasɔ, lakɔtɔ l’okandokando w’efula!​—Mateo 24:14; 28:19, 20.

L’etena ka wolo kɛsɔ, ngandji k’Ɛmɛnyi kakakimanyiya dia dimi ntetemala nsala eyangelo. Etshumanelo k’otondo kakadjaka nkumbo kaso yimba. Efula k’ase etshumanelo wakayaka ndjotembola, mbala mɔtshi lo mbisha tɛkɛ nɛndɛ ɔnɛ takaye ndjosomba abɛlɛ ndo ekele anyu, ko takayotatɛ mɛna dia vɔ waki mɛtɛ anto w’ɛlɔlɔ. Kaanga mbakaweyaka dia Ɔmɛnyi ɔmɔtshi akekaka la so Bible, kɛsɔ koshimba Ɛmɛnyi ekina dia mbɛtɔla lakaso, etena kakawetaka suke la lakaso. Taki l’ohomba wa ntatɛ mbeya Ɛmɛnyi dimɛna ndo takangɛnangɛnaka woho wakawayakashaka l’otema ɔtɔi le so ndo woho wakawatokaka ngandji.

Aha paka Ɛmɛnyi waki l’etshumanelo kaki suke la so ato mbakayashaka le so. Lam’ele lakayakiyanyaka lo kɛnɛ kendana l’ɔlɔtɔ ndo l’ɔlɔngɔswɛlɔ wa divo, Kay Briggs, Ɔmɛnyi ɔmɔtshi waki l’etshumanelo kaki suke la so laki kɔndɔtaka oko anto tshɛ ndo laki kombidjaka dɛngalɛnga akaye ndjomenda. Laki l’ɔngɛnɔngɛnɔ efula ndo lakasawola la nde aha l’okakatanu. Lushi lɔmɔtshi Lewis Flora, lakodiama nde lawɔ l’ɔtɛmwɛlɔ aso wahawalangaka monga la “lɔsɛnɔ lele oko l’anto tshɛ” akaye ndjomenda. Nde akakoke mɛna ɔkɛyi waki l’elungi kami, nde akatofundɛ mukanda waki la ndjɛkɛ dikumi, dia mpemba kimanyiyami. Mukanda ɔsɔ wakakɛdia asɔyi, ndo lakawadia mbala efula.

Lakambola omendji ɔmɔtshi weteta, ɔnangɛso O’Dell, dia nde nembetshiyami Isaya 3:18-23 ndo 1 Petero 3:3, 4. Lakawombola nte: “Shi avɛsa anɛ mɛnyaka dia sho pombaka ntona dɛngalɛnga ndo ɔlɔtɔ wele oko w’anto tshɛ dia sho ngɛnyangɛnya Nzambi?” Nde akakadimola ate: “Onde ekɔ kɔlɔ onto ndɔta kitambala kana lofulɛ? Onde mbɛla divo ekɔ kɔlɔ?” L’ɔtɛmwɛlɔ wa waa “Vieux Frères,” takɛlaka ana w’akɛnda avo, koko epalanga wakalɔtaka tambala kana tofulɛ. Lakakoke mɛna di’otshikitanu w’efula wakikɔ, koko lo wedi okina, lakambe efula lo menda solo dia lotutsha ndo dilɛmiɛlɔ diaki la omendji weteta ɔsɔ.

Yema yema, lakayotatɛ mbetawɔ akambo efula, koko aki la dui dimɔtshi dakatshindjaka wɔɔngɔ, dui diakɔ ko woho wakanyaka wamato avo. Dikumanyi di’Akristo wakakane la mi yimba lo nembetshiyami di’avo wa wamato amɔtshi mongaka tomondo, koko avo wa wamato akina mongaka etale efula. Onde kɛsɔ nangaka nembetshiya dia avo wa wamato amɔtshi ndeka wa wamato akina dimɛna? Vɔ wakakimanyiya nto dia mɛna ɔkɛndɛ wele la nkum’otema lo kɛnɛ kendana l’ɔlɔtɔ ndo l’ɔlɔngɔswɛlɔ wa divo ndo wakambisha ekanda ɛmɔtshi wa l’akatshi dia dimi tadia la ngelo.

Takatatɛ nkamba la kɛnɛ kakateke

Takatayangaka ɔtɛmwɛlɔ watɔ elowa w’ɔlɔlɔ ndo takawoshola. Yeso akate ate: “Oma lo dikambo nɛ, anto tshɛ wayeya dia nyu nyekɔ ambeki ami, naka nyayokana ngandji lam’asanyu.” (Joani 13:35) Takashikikɛ dia Ɛmɛnyi wa Jehowa wekɔ anto wɛnya ngandji ka mɛtɛ. Kaanga mbakidiɔ ngasɔ, dui sɔ diakadje nondo diaso mpende Nathan nde la Rebecca l’okandokando l’etena kɛmɔtshi, nɛ dia vɔ wakashile mbetawɔ ɔtɛmwɛlɔ wa was “Vieux Frères,” ndo wakabatizama lɔkɔ. Koko l’ekomelo vɔ wakayonandemaka l’akambo wa mɛtɛ wa lo Bible wakataasambisha ndo la ngandji k’Ɛmɛnyi.

Ɛnyɛlɔ Rebecca akakombolaka monga la diɔtɔnganelo dia ma ma la Nzambi. Nde komonga nto l’okakatanu dia nɔmba Nzambi etena kakandeke dia nde kotashikike la ntondo kɛnɛ kayosala onto l’onto kana woho wayonga nshi yayaye y’onto l’onto. Nde akaleke nto ndjasukanya la Nzambi etena kakandashihodia dia nde bu ɔtɔi ɔmɔtshi wa lo Losato l’osanto, koko ɔnɛ nde ekɔ onto la mɛtɛ mɛtɛ lakokande mbokoya. (Ɛfɛsɔ 5:1) Ndo nde aki l’ɔngɛnɔngɛnɔ dia mbeya dia nde komonga nto l’ohomba wa nkamba la tɔtɛkɛta t’edjedja ta lo ekadimwelo ka Bible du rois Jacques etena kakandalɔmbaka Nzambi. Etena kakandeke atɔndɔ wa Nzambi lo kɛnɛ kendana la dɔmbɛlɔ, ndo sangwelo diande dia woke di’ɔnɛ anto wayɔsɛna pondjo pondjo lo paradiso ka la nkɛtɛ, nde akayaoke suke suke la Otungi ande.​—Osambo 37:29; Ɛnyɛlɔ 21:3, 4.

Waɛsɛ wakatakondja sho tshɛ

Dimi la James kaamɛ ndo anaso atanu w’epalanga​—Nathan, Rebecca, George, Daniel, ndo John​—takabatizama oko Ɛmɛnyi wa Jehowa lo nshi y’ɔwɔ ya l’ɔnɔnyi wa 1987. Harley akabatizama lo 1989, ndo Simon lo 1994. Nkumbo kaso ndjashaka l’olimu wakasha Yeso Kristo ambeki ande dia vɔ nsala, mbuta ate olimu w’esambishelo ka lokumu l’ɔlɔlɔ la Diolelo diaki Nzambi.

Anaso atanu w’epalanga​—Nathan, George, Daniel, John, ndo Harley​—kaamɛ ndo ɔnaso la womoto Rebecca​—vɔ tshɛ wakakambe lo Béthel k’Ɛmɛnyi wa Jehowa ka l’États-Unis. George eke lo Béthel polo ɛlɔ ndo nde ambokamba oko ɛnɔnyi 14, ndo Simon lakamane kalasa lo 2001 nde lawɔ aya ose nkumbo ka Béthel atete edja. Anaso tshɛ w’apami wekɔ lo nkamba oko dikumanyi kana ekambi wakimanyiya lo tshumanelo di’Ɛmɛnyi wa Jehowa. Omɛmi ekɔ lo nkamba oko ekumanyi l’etshumanelo ka Thayer la Missouri ndo dimi ndjashaka efula l’esambishelo.

Ɛlɔ kɛnɛ taya la ekana esato​—Jessica, Latisha, ndo Caleb ndo tekɔ l’ɔngɛnɔngɛnɔ wa mɛna woho wakɔkɔmiya ambutshi awɔ akambo wa mɛtɛ l’etema awɔ. Nkumbo kaso k’otondo tekɔ l’ɔngɛnɔgɛnɔ lo woho wakatokotola Jehowa oya le nde ndo woho wakandatokimanyiya dia sho mbishola ekambi ande wɛmba lokombo lande diɛsɛ la ngandji kakɛnɛmɔlawɔ.

Sho kanyiyaka nto dikambo di’anto akina wakombola ngɛnyangɛnya Nzambi, koko nkum’otema kawɔ kakekiyama oma le anto wadingi, koko aha oma lo Bible. Sho kombolaka dia lushi lɔmɔtshi, vɔ lawɔ monga l’ɔngɛnɔngɛnɔ wele laso ɛlɔ kɛnɛ, wa ntshɔ lo soko la soko aha dia tosondja diangɔ di’oma lo dikambɔ diaso, koko dia tewoya anto losango lendana la Diolelo diaki Nzambi ndo akambo wa diambo wayondosala lo nshi yayaye. Dimi kɛdiaka asɔyi w’ɔngɛnɔngɛnɔ etena kakanyiyami solo dia lotutsha ndo ngandji kaki la anto watɛmbɛ lokombo la Nzambi oya le so!

[Esato]

Dimi lam’akimi l’ɛnɔnyi oko esambele, ndo lam’ayami opalanga

[Osato]

James, George, Harley, la Simon, la ɔlɔtɔ wele oko w’anto tshɛ

[Osato]

Foto kami katamɛmbɛ diangɔ otsha lo lobingu kakatombe lo jurnalɛ mɔtshi ya lo ngelo

[Efundelo wɛnya kanga]

Journal and Courier, Lafayette, Indiana

[Osato]

Nkumbo kaso ɛlɔ kɛnɛ